باستى بايلىق – باق-بەرەكە مەن تابىس

مەملەكەت باسشىسىنىڭ اتىنا قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي شەت مەملەكەتتەر باسشىلارىنان قۇتتىقتاۋلار كەلىپ تۇسۋدە, دەپ حابارلادى پرەزيدەنتتىڭ ءباسپاسوز قىزمەتى. «شيرەك عاسىردا قازاقستان ەكونوميكالىق, الەۋمەتتىك جانە عىلىمي-تەحنيكالىق دامۋدىڭ وزەكتى ماسەلەلەرىن شەشۋ جولىندا ەلەۋلى جەتىستىكتەرگە قول جەتكىزدى. رەسەي مەن قازاقستاننىڭ بايلانىسى تاتۋ كورشىلىك, ءوزارا قۇرمەت, بەرىك دوستىق داستۇرىنە نەگىزدەلىپ, قارقىندى دامىپ كەلەدى. سىزگە شىن جۇرەكتەن زور دەنساۋلىق, باق-بەرەكە مەن تابىس, ال بارشا قازاقستان ازاماتتارىنا بەيبىتشىلىك پەن يگىلىك تىلەيمىن», – دەلىنگەن رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ قۇتتىقتاۋ جەدەلحاتىندا. قازاقستان حالقىن رەسپۋبليكانىڭ تاۋەلسىزدىك كۇنىمەن قىتاي حالىق رەسپۋبليكاسىنىڭ توراعاسى سي تسزينپين قۇتتىقتادى. «قازاقستان مەن قىتاي اراسىنداعى قارىم-قاتىناسقا مەن زور ءمان بەرەمىن جانە قازاقستانمەن دوستىعىمىزدى قادىر تۇتامىن. دوستاس قازاقستاننىڭ ءوسىپ-وركەندەپ, قۋاتتى مەملەكەت بولۋىنا نيەتتەستىك بىلدىرەمىن, ال ونىڭ حالقىنا باقىت جانە بەرەكە-بىرلىك تىلەيمىن», – دەلىنگەن جەدەلحاتتا. وزبەكستان رەسپۋبليكاسىنىڭ پرەزيدەنتى شاۆكات ميرزيوەۆ نۇرسۇلتان نازارباەۆ پەن قازاقستان حالقىن مەرەيتويمەن قۇتتىقتاپ, قوعامدىق-ساياسي جانە الەۋمەتتىك-ەكونوميكالىق دامۋدىڭ بارلىق سالاسىنداعى ەلىمىزدىڭ جەتىستىكتەرىن ەرەكشە اتاپ ءوتتى. فرانتسۋز رەسپۋبليكاسىنىڭ پرە­زي­دەنتى فرانسۋا وللاند تا ءوز قۇت­تىقتاۋىن جولدادى. «قازاقستان شيرەك عاسىردا جا­ھاندىق ماسەلەلەردى شەشۋگە بەلسەنە اتسالىسىپ كەلە جاتقان نەگىزگى ەلدەردىڭ بىرىنە اينالدى. ءسىزدىڭ ەلدىڭ بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋى – وسىعان دالەل. مەن فرانتسيا مەن قازاقستان اراسىنداعى قارىم-قاتىناستىڭ ودان ارى تەرەڭدەي تۇسەتىنىنە سەنىمدىمىن, – دەلىنگەن قۇتتىقتاۋ جەدەلحاتىندا. سونداي-اق, سلوۆاكيا رەسپۋب­ليكاسىنىڭ پرەزيدەنتى اندرەي كيسكا مەن بولگاريا رەس­پۋبليكاسىنىڭ پرە­زيدەنتى روسەن پلەۆنەليەۆ قازاقستان حالقىنىڭ ودان ءارى ءوسىپ-وركەندەۋىنە نيەتتەستىك ءبىلدىرىپ, مول تابىس تىلەيدى. «سىزگە زور دەنساۋلىق, جاۋاپ­كەر­شىلىگى اسا جوعارى قىزمەتىڭىزگە تابىس, ال قازاقستان رەسپۋبليكاسىنىڭ ازاماتتارىنا بەيبىتشىلىك پەن باق-بەرەكە تىلەيمىن», – دەلىنگەن بولگاريا باسشىسىنىڭ قۇتتىقتاۋ حاتىندا. ەل تاۋەلسىزدىگىنىڭ 25 جىلدىق مە­رەيتويىنا وراي قۇتتىقتاۋلارىن جولداعان چەح رەسپۋبليكاسىنىڭ پرەزيدەنتى ميلوش زەمان مەن فين­ليانديا رەسپۋبليكاسىنىڭ پرە­زيدەنتى ساۋلي نينيستو قازاقستانمەن مەم­لەكەتارالىق ۇنقاتىسۋدىڭ ودان ءارى نىعايا بەرەتىنىنە سەنىم بىلدىرگەن. يتاليا رەسپۋبليكاسىنىڭ پرە­زي­دەنتى سەردجو ماتتارەللا استانا مەن ءريمنىڭ تىعىز جانە تابىستى قارىم-قاتىناسىنا توقتالا كەلىپ, جەكە ءوزىنىڭ جانە بۇكىل يتاليا حالقىنىڭ اتىنان بارشا قازاقستان ازاماتتارىنا باق-بەرەكە تىلەيدى. پاكىستان يسلام رەسپۋبليكاسىنىڭ پرەزي­دەنتى مامنۋن حۋسەين, اۋعان­ستان يسلام رەس­پۋب­ليكاسىنىڭ پرە­زيدەنتى موحامماد اشراف عاني, موڭعوليا حالىق رەسپۋبليكاسىنىڭ پرەزيدەنتى تساحياگين ەلبەگدورج قازاقستان حالقىن جاس مەملەكەتتىڭ تاۋەلسىزدىك تاريحىنداعى ۇلى مەرە­كەسىمەن قۇتتىقتاپ, ەلدەرىمىز اراسىن­داعى تىعىز ىنتىماقتاستىق اياسىنىڭ ودان ءارى كەڭەيە بەرەتىنىنە سەنىم بىلدىرەدى. تاۋەلسىز قازاقستاننىڭ قالىپ­تاسۋى مەن دامۋى جولىندا نۇرسۇلتان نازارباەۆتىڭ ماڭىزدى ءرول اتقار­عانىن ءوز قۇتتىقتاۋلارىندا ءۇندىستان رەسپۋبليكاسىنىڭ پرەزيدەنتى پرا­ناب مۋكەردجي, تايلاند كورولى ماحا ۆاچيرا­لونگ­كون جانە ۆەتنام سوتسياليستىك رەسپۋب­لي­كاسىنىڭ پرەزيدەنتى چان داي كۋانگ اتاپ وتكەن.