توپىراق قۇنارىن ساقتاۋعا قاجەتتى باسقا دا اگروتەحنيكالىق شارالار تولىعىمەن اتقارىلدى. سوڭعى كەزدە كەيبىر ۇساق شارۋا قوجالىقتارى تىڭايتقىشتاردى پايدالانۋ ىسىنە سالعىرت-سالاق قاراي باستاعاندارى دا جاسىرىن ەمەس. بيىل مۇنداي تەرىس تاجىريبەنىڭ تامىرىنا بالتا شابىلدى. سونىمەن بىرگە, ولار ءوز قولدارىنداعى بۇرىنعى ەسكى تەحنيكانى جاڭعىرتۋدا دا قام-قاراكەت تانىتۋدا.
سونداي-اق, وسى جىلى سەبىلەتىن تۇقىمنىڭ باسىم بولىگىن نەگىزىنەن ءبىرىنشى ساناتتاعى تۇقىم قورى قۇرايدى. تاعى ءبىر ايتا كەتەرلىك ماسەلە – 2016 جىلمەن سالىستىرعاندا بيىل وبلىستاعى ەگىستىك القاپتىڭ كولەمى 74,2 مىڭ گەكتارعا ۇلعايدى.
وسىلايشا, بيىلعى تاۋىق جىلى جالپى كولەمى 641 مىڭ گەكتار القاپقا ەگىستىك سالۋ جوسپارلانعان. بۇدان الىناتىن ءونىم مولشەرى قانداي بولماق؟ بۇل
جونىندە الدىن-الا بولجام جاساپ, بال اشۋ قيىن ارينە. سونىڭ ىشىندە سۋارمالى ەگىس ەمەس, نار تاۋەكەلدىككە نەگىزدەلگەن, ءتىپتى كەرەك دەسەڭىز جاز كەزدەرىندەگى جاۋىن-شاشىنعا دا تاۋەلدىلىگى بار ەگىستىك جاعدايىندا قانداي ءبىر بولماسىن ايقىن جورامال جاساۋ وڭايعا تۇسپەيدى. ايتسە دە قازىرگى كۇنى اگروتەحنيكالىق شارالار ويداعىداي جۇرگىزىلگەن جاعدايدا 480 مىڭ توننا استىق جيناۋعا بولاتىنى جونىندە ەسەپتەر جاسالعان.
بۇل ىستە قارعالى اۋدانىنىڭ ديحاندارى كوش باستاپ كەلەدى.
تەمىر قۇسايىن,
«ەگەمەن قازاقستان»
