ەلباسى نۇرسۇلتان نازارباەۆتىڭ وسى جىلى قازاقستان حالقىنا جولداعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ەكونوميكانى جەدەل تەحنولوگيالىق جاڭعىرتۋ ءبىرىنشى باعىتتا ايتىلدى. مەملەكەت باسشىسى ەلىمىزدەگى جاڭا يندۋستريالارمەن كەلەشەگى بار 3D باسپا, ونلاين ساۋدا, ءموبيلدى بانكينگ, ساندىق قىزمەت سياقتى سالالارعا باسا كوڭىل ءبولۋ كەرەك ەكەنىن ايتقان بولاتىن.
سونىمەن قاتار, عىلىمي جانە يننوۆاتسيالىق قۋاتتى جوعارعى وقۋ ورىندارى مەن يننوۆاتسيالىق تەحنولوگيالىق پاركتەردى الاتاۋ ايماقتىق بازاسىندا دامىتۋ كەرەكتىگىنە ەرەكشە توقتالعان ەدى. بۇگىنگى كوشپەلى وتىرىستىڭ دا نەگىزگى ماقساتى – ەلباسى جولداۋىندا ايتىلعان مىندەتتەردى ىسكە اسىرۋ. 2003 جىلى قۇرىلعان ەكونوميكالىق ايماققا مەملەكەت تاراپىنان 24 ملرد تەڭگە جۇمسالعان. قازىرگى تاڭدا يننوۆاتسيالىق جوبالاردىڭ الدى ساپالى ءونىم شىعارا باستادى. ءتىپتى, كوممۋنيكاتسيالىق قۇرالداردى وتاندىق نارىقپەن قاتار, كورشىلىس ەلدەرگە دە ەكسپورتتاۋدا.
بۇگىنگى باسقوسۋعا باستاماشى بولعان ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ قۇرامىندا كوميتەت توراعاسى اسقار بەيسەنباەۆ باستاعان تالعاتبەك ءابايدىلدين, ميحايل بورتنيك, بەكمىرزا ەلامانوۆ, مۇراتباي جولداسباەۆ, اسحات كۇزەكوۆ, ەلەۋسىن ساعىندىقوۆ سىندى جوعارى پالاتا وكىلدەرى يننوۆاتسيالىق باعىتتا جۇمىس ىستەيتىن ءوندىرىستىڭ قۋاتىمەن تانىستى. سونداي-اق, «نۇروتان» پارتياسى فراكتسياسى جانىنداعى ايماقتىق ساياسي كەڭەس مۇشەلەرى مەن پارلامەنت ءماجىلىسىنىڭ دەپۋتاتتارى دا شاعىن جانە ورتا بيزنەستى دامىتۋ تەتىكتەرى جايلى ويلارىن ورتاعا سالدى.
«الاتاۋ پاركىنىڭ جۇمىسىمەن تانىسۋ بارىسىندا, اتالمىش نىسان ديرەكتورىنىڭ ۇسىنعان جوسپارلارى مەن بولىسكەن ويلارى كوڭىلىمىزدەن شىقتى. قازاقستاننىڭ ءدال قازىرگى كەزدەگى ورنى, الداعى ۋاقىتتا تاعى دا قانداي ماقساتتار قويىلاتىنى, ولاردى ورىنداۋ جولدارى, نىسانداردى ارالاۋ بارىسىندا تولىق تالقىلاندى. اتالمىش ءوندىرىس ورنىندا شىعىپ جاتقان ونىمدەرمەن تانىسىپ قانا قويماي, وندىرۋشىلەرمەن سۇحباتتاسا كەلە قازىرگى زاڭنىڭ كەمشىن تۇستارى مەن ولارعا قانداي وزگەرىس ەنگىزۋ كەرەكتىگىن, ۇكىمەت تاراپىنان قانداي كومەككە مۇقتاج ەكەندىگىن بىزگە جەتكىزدى. بۇل كىسىلەردىڭ ايتقان وتىنىشتەرىن ءوز نازارىمىزعا الىپ كوميتەت وتىرىستارىندا ۇسىنىستارىمىزدى دايىندايتىن بولامىز. كوميتەتىمىزدىڭ نەگىزگى ماقساتى – كاسىپكەرلىكتى قولداۋ. ەلباسى تاپسىرماسىمەن شاعىن جانە ورتا بيزنەستىڭ كولەمىن ەڭ كەم دەگەندە 50%-عا ءوسىرۋ كوزدەلىپ وتىر. ەگەر شاعىن جانە ورتا بيزنەستىڭ كولەمى 50%-دان اساتىن بولسا قوعام ورنىقتى قوعام بولىپ سانالادى», دەيدى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆ.
جيىن بارىسىندا قاتىسۋشىلار تاراپىنان كاسىپكەرلەرگە كەدەرگى بولاتىن جاعدايلاردىڭ ءبىرى – مەملەكەتتىك فۋنكتسيالاردىڭ كوپتىگى مەن رۇقسات بەرۋ فۋنكتسيالارى ەكەندىگى ايتىلدى.
ء«بىز مەملەكەتتىك فۋنكتسيالاردىڭ بارلىعى «100 ناقتى قادام» ۇلتتىق جوسپارىنا بايلانىستى ءوزىن-ءوزى باسقارۋ جۇيەسىنە بەرىلۋگە ءتيىس دەپ ەسەپتەيمىز. ياعني, ۇكىمەتتىك پۋنكتسيا ۇكىمەتتىڭ تاراپىنان بيزنەسكە بەرىلۋى قاجەت. وسىعان توسقاۋىل بولاتىن كەدەرگىلەردىڭ بارلىعىن زاڭ جۇزىندە رەتتەۋىمىز كەرەك», دەدى كوميتەت مۇشەلەرى.
ارمان وكتيابر,
«ەگەمەن قازاقستان»
