بۇل كەزدەسۋ جادىرا بايبۇلانوۆانىڭ جاقىندا عانا باسپادان شىققان «قاعاز جۇرەك» اتتى ولەڭدەر جيناعىنىڭ تانىستىرىلىمىنا وراي ۇيىمداستىرىلىپ وتىر.
جەڭىمپازىن «جىلدىڭ ەڭ ۇزدىك اقىنى» اتالىمى بويىنشا ماراپاتتاپ, كىتابىن شىعارىپ بەرۋدى داستۇرگە اينالدىرعان جۇمابەك تاشەنوۆ اتىنداعى ءمۇشايرانىڭ بيىلعى باس جۇلدەسى جادىراعا بۇيىرعان. وسى يگى ءىس سەبەپ بولىپ, جارىق كورگەن, العى ءسوزىن اقىن كۇلاش احمەتوۆا جازعان «قاعاز جۇرەكتىڭ» تۇساۋىن اقىندار مۇرات شايماران, مارالتاي رايىمبەك, ماقپال مىسا كەستى. «قازىعۇرت» باسپاسىنىڭ ديرەكتورى تەمىرعالي كوپباەۆ, باقىت بەدەلحان باستاعان اقىندار; كومپوزيتور قادىرعالي كوبەنتاي مەن ءداستۇرلى ءانشى ەرلان تولەۋتاي; قاراعاندىدان ارنايى كەلگەن جاس اقىندار ولەڭ وقىپ, ءان ايتتى, كەش يەلەرىنىڭ شىعارماشىلىعى جايلى پىكىر ءبىلدىرىپ, تىلەكتەرىن جەتكىزدى.
ادەبيەت پەن ومىردە قول ۇستاسىپ كەلە جاتقان ەكى اقىننىڭ ولەڭمەن جاۋاپتاسقان, ولەڭ ارقىلى ءبىر-بىرىنە ءتىل قاتىسقان, سىر اشىسقان ساتتەرى بۇل كەزدەسۋدىڭ ەڭ باستى ەرەكشەلىگى بولدى دەۋگە بولادى. كەش يەلەرى وسىنداي كەزدەسۋدى الداعى ۋاقىتتا قاراعاندىدا دا وتكىزۋدى جوسپارلاپ وتىر.
«ەگەمەن قازاقستان» گازەتىنىڭ قاراعاندى وبلىسى بويىنشا مەنشىكتى ءتىلشىسى, ارىپتەسىمىز ميراستىڭ شاڭىراعىنداعى قوس قۋانىش باياندى بولسىن دەپ تىلەيمىز!
الماس ءنۇسىپ,
«ەگەمەن قازاقستان»
الماتى
