«بيىل ۇلتتىق بىرىڭعاي تەستىلەۋ ەكى كەزەڭدە وتەدى. ءبىرىنشىسى قورىتىندى اتتەستاتتاۋ – بۇل مەملەكەتتىك ءبىتىرۋ ەمتيحانى. ەكىنشىسى ۇبت - جوعارى وقۋ ورىندارىنا ءتۇسۋ ەمتيحانى. كەزەڭ-كەزەڭىمەن وتەتىن وسى ماڭىزدى شارانى اسقان جاۋاپكەرشىلىكپەن وتكىزۋدى جاۋاپتى سالا باسشىلارىنا جۇكتەيمىن», دەدى جانسەيىت قانسەيىت ۇلى.
جيىن بارىسىندا بايانداما جاساعان وبلىستىق ءبىلىم باسقارماسى باسشىسىنىڭ مىندەتىن اتقارۋشى راۋشان ەرگاشوۆانىڭ ايتۋىنشا, وبلىستاعى ءبىلىم سالاسى ۇبت-عا تولىقتاي دايىن. وبلىسىمىزداعى 1429 تۇلەك «التىن بەلگى» بەلگىسىنە, 852 ءبىتىرۋشى ۇزدىك اتتەستاتقا, 9-سىنىپتى بىتىرۋشىلەردىڭ 3568-ءى ۇزدىك كۋالىككە ءۇمىتتى.
«بيىل ۇبت وڭتۇستىك قازاقستان وبلىسىندا 16 جەردە وتكىزىلەدى. ولاردىڭ تورتەۋى جوعارى وقۋ ورىندارىنىڭ, ۇشەۋى اۋدان ورتالىقتارىنداعى كوللەدجدەر, توعىزى جالپى ورتا مەكتەپتەردىڭ بازاسىندا ورنالاسقان.ء اربىر ۇبت وتكىزۋ پۋنكتتەرىندە 11-دەن 14-كە دەيىن اۋديتوريالار دايارلانىپ, تەستىلەۋ پۋنكتتەرى 237 ۇيالى تەلەفون سيگنالدارىن تۇنشىقتىرعىشتارمەن جابدىقتالىپ وتىر», دەدى راۋشان ەرگاشوۆا.
بيىل مينيسترلىكتىڭ تاپسىرماسىنا سايكەس 91 جاڭا ۇلگىدەگى 4G جيىلىكتەگى تۇنشىقتىرعىشتاردى الۋعا جەرگىلىكتى بيۋدجەتتەن قارجى قارالىپ, ساتىپ الۋ جۇمىستارى جۇرگىزىلۋدە. سونىمەن قاتار, تەستىلەۋ پۋنكتتەرىندە 26 رامالى مەتالىزدەگىشتەر, 226 سالقىنداتقىشتار, تەستىلەۋ كەزىندە بەينەجازبا جۇرگىزۋ ماقساتىندا 42 بەينەتىركەگىشتەر ورنالاستىرىلعان.
بيىل وبلىستا 33112 وقۋشى مەكتەپ بىتىرەدى. تۇلەكتەردىڭ 23760-ى, ياعني 71,8 پايىزى ۇلتتىق بىرىڭعاي تەست تاپسىرۋعا تىلەك بىلدىرگەن. سونداي-اق, بيىل ۇبت تاپسىراتىن 23760 ءبىتىرۋشىنىڭ 13585-ءى تاسىمالداۋدى, 12443-ءى تاماقتانۋدى, 1825 وقۋشى جاتىن ورىندى قاجەت ەتەدى. قازىرگى ۋاقىتتا جەرگىلىكتى بيۋدجەتتەن بىتىرۋشىلەردى تەستىلەۋ ورتالىعىنا تاسىمالداۋعا - 15677,5 مىڭ تەڭگە, جاتىن ورىنعا– 409,0 مىڭ تەڭگە, تاماقتانۋعا – 13128,8 مىڭ تەڭگە ءبولىنىپ, ۇيىمداستىرۋ جۇمىستارى جۇرگىزىلۋدە.
