ءماجىلىس دەپۋتاتى ساۋىتبەك ابدراحمانوۆ ورتالىق كوميتەتتە قىزمەت ىستەپ جۇرگەندە ەربول شايمەردەنوۆپەن قالاي, قانداي جاعدايدا تانىسقانى تۋرالى باياندادى. ول كەزدە ە.شايمەردەنوۆ «سوتسياليستىك قازاقستان» گازەتىنىڭ اقمولا وبلىسىنداعى مەنشىكتى ءتىلشىسى ەكەن. جۋرناليست جازىقسىز كۇيىپ, پارتيادان شىعارىلعان قازاق ازاماتىنا اراشا ءتۇسىپ, گازەتكە ماقالا جازادى. سونىڭ ناتيجەسىندە, ازامات اقتالىپ جاتسا, ءبىر دەپۋتات ماسكەۋدەگى «ترۋد» گازەتىنە ماقالا بەرىپ, ونىڭ اقتالۋىنا ءشۇبا كەلتىرگەن. سول كەزدە ورتالىق باسىلىمنىڭ سىنىنان ولەردەي قورقاتىن قازاقستان باسشىلارى ماقالانى تەكسەرۋگە ارناۋلى كوميسسيا شىعارىپ, اقمولاعا جىبەرەدى. سول كوميسسيانىڭ قۇرامىندا بولعاندا ەربولدىڭ بارلىق فاكتىلەردى اينىتپاي جازا بىلەتىن شەبەر, بىلگىر جۋرناليست بولعانىنا ءتانتى بولدىم, دەدى دەپۋتات. وسى تەكسەرىستىڭ ارقاسىندا ماقالاداعى فاكتىلەردىڭ دۇرىستىعى انىقتالىپ, ەربولعا جازا بەرۋدىڭ ورنىنا, كەرىسىنشە, قىزمەتى ءوسىرىلىپتى.
كەزدەسۋگە الماتىدان ارنايى كەلگەن بەلگىلى عالىم, قوعام قايراتكەرى راحمان الشانوۆ تا قىزىقتى ەستەلىكتەر ايتتى. قازاق مەكتەبىن بىتىرگەن ستۋدەنتتەر اراسىنان قازگۋ-ءدىڭ كومسومول كوميتەتىنە حاتشى سايلاۋدا تاڭداۋ جۋرفاكتىڭ 2-كۋرس ستۋدەنتى ەربول شايمەردەنوۆكە ءتۇسىپ, سول ۋاقىتتا ەربول العاشقى بولىپ فاكۋلتەتتەردە قازاق تىلىندە وقىتاتىن بولىمدەر اشۋدى ۇسىنادى. سول كەزدە وقيعانىڭ ورتاسىندا جۇرگەن ادام رەتىندە مەن بۇل ۇسىنىستى العاشقى بولىپ كوتەرگەن ەربول ەكەنىنە كۋالىك بەرە الامىن, دەدى ول. ەربول جاستار كوميتەتىنىڭ شەشىمىن دە قابىلداتىپ, ونى رەكتوراتقا رەسمي تۇردە ۇسىنۋعا مۇرىندىق بولعان ەكەن. مەن ەربول شايمەردەنوۆتىڭ ەسىمى پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان 100 جاڭا ەسىم جوباسىنا ەنگىزىلۋى كەرەك دەپ سانايمىن, دەدى راحمان الشانوۆ.
قوعام قايراتكەرى ورازكۇل اسانعازى كەزىندە استانادا ء«تىل تۋرالى» زاڭنىڭ تالاپتارىن ورىنداتۋعا ەربول شايمەردەنوۆتىڭ باس پروكۋراتۋراعا جازعان حاتىنا كەلگەن جاۋاپتىڭ كوپ كومەگى تيگەنىن تىلگە تيەك ەتتى. ە.شايمەردەنوۆتىڭ جەرلەسى, جازۋشى جاراسباي سۇلەيمەنوۆ ەربولدىڭ التىنشى سىنىپتان باستاپ ولەڭ جازىپ, ونى وبلىستىق گازەتكە جاريالاتا باستاعانىنىڭ كۋاسى بولعانىن جەتكىزدى. اقىن سەرىك تۇرعىنبەكوۆ ونى «اسىلىمداي التىن ساقام ءوزىڭسىڭ, اسىعىنداي كورىنگەنمەن قۇلجانىڭ» دەپ باعالاعانىن ەسكە الدى. بەلگىلى قوعام قايراتكەرى سابىر قاسىموۆ ورتالىق كوميتەتتە بىرگە قىزمەت ىستەگەن جىلدارىندا ەربول ۇلتتىق دۇنيەلەردىڭ جاناشىرى بولعانىنا بىرنەشە مىسال كەلتىردى. ونىڭ ۇلتجاندى بولۋىنىڭ دىڭگەگى – ادامي تازالىقتان, ۇلتىنا ادالدىعى مەن ازاماتتىق جاۋاپكەرشىلىگىنىڭ جوعارى بولۋىنان, دەدى ول.
«ەگەمەن قازاقستان» گازەتىنىڭ بۇرىنعى باسشىسى, تانىمال قالامگەر ەرجۇمان سمايىل دا كوپ ادام بىلمەيتىن تىڭ دەرەكتەردى ورتاعا سالدى. سونىڭ ىشىندە جەلتوقسان وقيعاسىنان كەيىن بولعان سوت پروتسەستەرىن جازۋعا «سوتسياليستىك قازاقستان» گازەتىنەن ەربول ەكەۋىن جىبەرگەنىن, سوندا بارلىق جاساندىلىقتاردى, قولدان قۇراستىرىلعان قياناتتاردى كورۋمەن قاتار, قارا باستارىن اراشالاۋ ءۇشىن كەيبىرەۋلەردىڭ ساتقىندىققا بارىپ, ءوز جولداستارىن اشىق قارالاپ, جالا جاپقان جايتتارعا دا كۋا بولعاندارىن ايتتى. ەگەر سوت پروتسەسى سول كۇيىندە جازىلىپ, حالىققا جاريالاناتىن بولسا, جەلتوقساندىقتاردىڭ يگى ىستەرى اياققا تاپتالاتىنىن سەزگەن ەربول ماقالا جازۋدان باس تارتۋدى ۇسىنعان ەكەن. وسى پوزيتسيانى ۇستانعان ەكەۋىن رەداكتور دا قولداپ, اقىرى ماقالا جازىلماپتى.
ەسكە الۋ كەشىنىڭ قورىتىندىسىندا جۇرتتىڭ ءبارى دە ەربول شايمەردەنوۆتىڭ ۇندەمەي ءجۇرىپ, ۇلكەن ىستەردى تىندىرعانىن جاقسى بىلەتىندەرىن ايتتى. كۋرستاس دوسى سۇلەيمەن مامەتتىڭ سوزىمەن ايتقاندا, ول اقىندىعىنان باسقا: ءباسپاسوز حاتشىسى قىزمەتىن العاشقى قالىپتاستىرۋشى; ءرامىزتانۋ ءىسىنىڭ كوشباستاۋشىسى; قازاق دانالىعىن جيناعان العاشقى افوريزم قۇراستىرۋشى جانە ت.ب. جۇمىستاردى ابىرويمەن اتقارۋشى رەتىندە تاريحتا قالىپ, 100 جاڭا ەسىمنىڭ ورتاسىنان ويىپ ورىن الۋشى دەگەنگە جينالعانداردىڭ ءبارى دە ءبىراۋىزدان كەلىستى.
ەسكە الۋ كەشىندە كومپوزيتور مارات وماروۆ ە.شايمەردەنوۆتىڭ ولەڭىنە جازىلعان «ارمان قالا – استانا» ءانىن ورىندادى. ودان باسقا دا ونەرپازدار ءان شاشۋلارىن جاسادى, ال ۇلتتىق اكادەميالىق كىتاپحانا باسشىسى ءۇ.مۇڭالباەۆا اقىننىڭ جارى مەن قىزىنا ورامال جاپتى.
جاقسىباي سامرات,
«ەگەمەن قازاقستان»
