جارامسىز جىلۋ قازاندىعىنىڭ كوك تىرەگەن مۇرجاسى 1962 جىلى سالىنعان ەكەن. 2003 جىلى اتالعان مۇرجا جارامسىز دەپ تابىلعان. سونى قۇلاتۋ بارىسىندا تۇراق باقانوۆ ەسىمدى ازامات ءۇيىندىنىڭ استىندا قالىپ قويىپ, قازا تاپتى. ال رىسقۇل ايتقۇلوۆ جاراقات الدى.
– نەگىزگى مەردىگەر «ابك قۇرىلىس» كومپانياسى بولاتىن. «التىن لتد» سەرىكتەستىگى قوسىمشا مەردىگەر بولىپ كىرىسكەن. مۇرجانىڭ اينالاسىندا «قىزىلوردا جىلۋ ەلەكتر ورتالىعى» مەكەمەسىنىڭ بىرنەشە عيماراتى بولعاندىقتان, وندا ادامدار قىزمەت ەتەتىندىكتەن, اتالعان جۇمىستى جەكسەنبى كۇنى جاسايىق دەگەن شەشىمگە كەلدىك. ويتكەنى, قىزمەتكەرلەردىڭ قاۋىپسىزدىگىن ساقتاۋىمىز كەرەك. بارلىق جۇمىس جوسپار بويىنشا ىسكە استى. وقيعا ورنىندا ءۇش ادام جۇمىس جاسادى. بىراق مۇرجا قۇلاعان كەزدە ءبىر ادام ءۇيىندى استىندا قالىپ قويدى. ەكىنشىسى جاراقات الدى. قازىر وسى ىسكە بايلانىستى قىلمىستىق ءىس قوزعالدى. ماسەلەنىڭ ءمان-جايى ءالى دە انىقتالادى, – دەدى «قىزىلوردا جىلۋ ورتالىعى» مەكەمەسىنىڭ ديرەكتورى باۋىرجان مادرايموۆ.
«وقيعا ورنىنا قىزىلوردا وبلىسى تجد جەدەل توبىنىڭ تەحنيكاسى مەن قىزمەتكەرلەرى, وڭتۇستىك ايماقتىق اەروموبيلدى جەدەل-قۇتقارۋ وتريادى, ءورت ءسوندىرۋ قىزمەتى مەن قىزىلوردا وبلىسى تجد اپاتتى-قۇتقارۋ قىزمەتكەرلەرى جۇمىلدىرىلدى. 60-قا جۋىق قۇتقارۋشى مەن ون تەحنيكا, ەكى كينولوگيالىق ەسەپ جۇمىس جۇرگىزدى», دەيدى وبلىستىق تجد توتەنشە جاعدايلاردى جويۋ ءبولىمىنىڭ باسشىسى باقتيار تۇرمانوۆ.
ال «التىن لتد» سەرىكتەستىگىنىڭ بريگاديرى مولداعالي ولجاعۇلوۆ قازا بولعان تۇراق باقانوۆتىڭ وتباسىنا بارلىق كومەك كورسەتىلەتىنىن, ال ر.ايتقۇلوۆتىڭ جاعدايى بىرقالىپتى ەكەنىن ايتادى. «مۇنداي توسىن وقيعادان ەشكىم ساقتاندىرىلماعان عوي. بارلىعى ويلاماعان جەردەن بولدى», – دەيدى ول. بىراق وسىندايى «ساقتانساڭ – ساقتارمىن» دەگەن ءسوز دە ەرىكسىز ەسكە تۇسەدى ەكەن. جۇمىسشىلاردىڭ تەحنيكالىق قاۋىپسىزدىگى ءبىرىنشى ورىنعا قويىلۋى كەرەك ەمەس پە ەدى؟! ال بەرىلەتىن كومەك وتاعاسىن الماستىرا المايدى عوي.
ەرجان بايتىلەس,
«ەگەمەن قازاقستان»
قىزىلوردا
