كادەسىيدان قۇر قالماڭىز!
بيىل ەلوردامىزدىڭ ەنشىسىنە تيگەن ەكسپو كورمەسىنىڭ بيلەتتەرى ساتىلىمعا تۇسكەنىنەن حاباردارمىز. تالايىمىز كاسسالاردان الىپ, ميلليوندار قاتىساتىن شارانى كۇن ساناپ تاعاتسىزدانا توسىپ جۇرگەنىمىز دە راس. ال سونىڭ ىشىندە قۇنى 20 مىڭ تەڭگە تۇراتىن بيلەتتىڭ ەرەكشەلىگى نە ەكەنىن بىلەسىز بە؟ ول كيىزدەن جاسالعان. بۇيىرسا, باس شاھاردىڭ تورىنە قادام باسقان قوناقتار كيىزدەن جاسالعان بيلەتكە قول جەتكىزە الادى. ونى كادەسىي رەتىندە دە ساقتاۋعا بولادى.
ارنايى تاپسىرىسپەن باسپادان شىققان بيلەتتەردىڭ سانى شەكتەۋلى. «استانا ەكسپو-2017» ۇلتتىق كومپانياسى كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمباەۆ ولاردىڭ بار-جوعى 10 مىڭ دانا ەكەنىن ايتادى. ەڭ باستىسى, كيىزدەن جاسالعان بيلەتتەر كورمەنىڭ كەز كەلگەن كۇنىنە جارامدى ءارى ونى تىركەتۋدىڭ قاجەتى جوق.
«كيىزدەن جاسالعان بيلەتتەر شەتەلدىكتەرگە مىندەتتى تۇردە ۇنايدى. ولاردىڭ كوبى قازاقتىڭ ۇلتتىق بۇيىمدارىنا قىزىعادى. بۇل رەتتە كيىزدەن جاسالعان بيلەتتەر ءبىزدىڭ تابيعاتىمىزعا دا جاقىن. بيلەت ءارى كادەسىي تۇرىندەگى بۇيىم بولعاندىقتان, كوپتىڭ كوڭىلىنەن شىعاتىنى ءسوزسىز», دەيدى تەرى بۇيىمدارىنىڭ شەبەرى ەلوردالىق دارحان كەبەكباەۆ.
«كوسموستىڭ» جۇلدەسى قوماقتى
ەكسپو-2017 كورمەسىنىڭ تاعى ءبىر قىزىعى – ۇزدىك يننوۆاتسيالىق جوبا ءۇشىن قۇنى 20 مىڭ ەۋرو بولاتىن «كوسموس» سىيلىعى بەرىلەدى. وسىمەن بەسىنشى رەت تاعايىندالعان جۇلدەنىڭ ازىرگە كىمگە بۇيىراتىنى بەلگىسىز؟
«استانا ەكسپو-2017» ۇك» اق حالىقارالىق قاتىسۋشىلارمەن جۇمىس جونىندەگى دەپارتامەنت ديرەكتورى يليا ورازاقوۆتىڭ ايتۋىنشا, بۇل – ەكسپو-90 حالىقارالىق قورى مەن حالىقارالىق كورمەلەر بيۋروسىنىڭ الەۋمەتتىك جوباسى. مولشەرى, جوعارىدا ايتقانىمىزداي, قوماقتى. ول جوبانى دامىتۋعا ارنالعان ستارتاپ تۇرىندە تابىستالادى, ياعني حالىقارالىق كورمە اياسىندا الەۋمەتتىك سالادا ۇزدىك دەپ تانىلعان يننوۆاتسيالىق جوباعا بەرىلەدى.
اتالمىش سىيلىق تۋرالى قۇجاتقا «استانا ەكسپو-2017» ۇلتتىق كومپانياسىنىڭ باسشىسى احمەتجان ەسىموۆ, حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس جانە «ەكسپو-90» قورىنىڭ باسشىسى نورياكي وتسۋكي قول قويعان بولاتىن. بۇگىندە حالىقارالىق كورمەلەر بيۋروسى مۇشەلەرىنەن ارنايى قازىلار القاسى قۇرىلىپ, بايقاۋدىڭ تاقىرىبى جاريالاندى. ۇدەدەن شىققان ۇزدىك جوبا استانادا وتەتىن كورمەنىڭ جابىلۋ سالتاناتى كەزىندە انىقتالاتىن بولادى.
ۇلتتىق مۋزەيدەگى ءۇش كەرەمەت
ەكسپو-2017 حالىقارالىق مامانداندىرىلعان كورمەسىنىڭ ەرەكشە سىيلىقتارىنىڭ ءبىرى – تەرراكوت اسكەرى, ەجەلگى مىسىر ەسكەرتكىشتەرى جانە ەرميتاجداعى ەكسپوناتتار. قوناقتار بۇل قۇندىلىقتاردى استانادان الىستاماي-اق كورە الادى. العاشقىسىن ۇلتتىق مۋزەيدەن تاماشالايسىز. اتى اڭىزعا اينالعان يمپەراتور تسين ءشيحۋانديدىڭ تەرراكوت اسكەرى مۋزەيىنىڭ كورمەسى 9 ماۋسىمنان 10 قىركۇيەككە دەيىن جالعاسادى. يۋنەسكو-نىڭ مادەني مۇرالار تىزىمىنە ەنگەن تسين ديناستياسى جاۋىنگەرلەرىنىڭ مۇسىندەرى – ناعىز ونەر تۋىندىسى. وندا ەلۋگە جۋىق ارحەولوگيالىق بۇيىم قويىلادى. اتاپ ايتساق, اسكەرلەردىڭ مۇسىندەرى, قارۋ-جاراقتار, ىدىس-اياقتار, التىن جانە كۇمىس اشەكەيلەر.
كەلەسىسىمەن دە اتالعان نىساندا قاۋىشا الاسىز. مىسىردىڭ مادەنيەتىمەن, تاريحىمەن ەتەنە تانىسۋعا مۇمكىندىك العان كەلۋشىلەر پاتشانىڭ التىن جالاتىلعان اعاش كۇيمەسىن, وتىرعان تاعىن, ساركوفاگىن, اسىل تاستارمەن ورنەكتەلگەن پەرعاۋىننىڭ التىن جاعاسىن جانە قىز ءمۇسىنىن كورەدى. گرەك-ريم كەزەڭى ريمدىك ايەل بەينەسىنىڭ ءمۇسىنى ارقىلى اسپەتتەلەدى. اسەم جازۋلارمەن بەزەندىرىلگەن شىراعدان جانە گۇلمەن كومكەرىلگەن فارفور تاباق جادىگەرلەرى يسلام كەزەڭىن قامتيدى. بۇل 23 ماۋسىمنان باستاپ ەلوردالىقتار مەن قوناقتاردىڭ نازارىنا ۇسىنىلادى.
ال ءۇش ميلليونعا جۋىق جادىگەرى بار الەمدەگى ەڭ ۇلكەن مۇراجاي ەرميتاجدان كەلگەن قارۋ-جاراق كورمەسى 3 شىلدەدەن 10 قىركۇيەككە دەيىن جالعاسادى. ۇلتتىق مۋزەيدە بولاتىن «ەرميتاج كۇندەرىندە» شىعىس پەن باتىستىڭ جەتپىسكە جۋىق قارۋ-جاراق ۇلگىسى قويىلادى. ونىڭ ىشىندە تۇركيا, يران, ءۇندىستان, جاپونيا, فرانتسيا, يتاليا, گەرمانيا, يسپانيا ەلدەرىندە اسكەردە, اڭشىلىقتا, مەرەكەدە پايدالانىلعان قارۋلار بار.
