وتاندىق سپورتشىلاردى قازاقستاننىڭ ازەربايجانداعى ەلشىسى بەيبىت يساباەۆ قارسى الدى.
كەزدەسۋ بارىسىندا ەلشى سپورتشىلارىمىزدىڭ دودالى جارىستاردا جەمىستى ونەر كورسەتەتىندەرىنە سەنىم ءبىلدىرىپ, ساتتىلىك تىلەدى. سونىمەن قاتار ول ءىرى سپورت جيىنىنا قاتىسۋ قازاقستاننىڭ حالىقارالىق الاڭداعى بەدەلىن ارتتىراتىنىن ايتتى.
«قازاقستان مادەنيەت جانە سپورت مينيسترلىگى اتالمىش ويىندارعا قاتىسۋ نيەتىن ءبىلدىرىپ, سپورتتىق قۇرامدى تولىقتاي ىرىكتەۋ ارقىلى جاساقتادى. كەشە العاشقى سپورتشىلارىمىز – دزيۋدويستەر مەن بوكسشىلار كەلە باستادى. جۋىق ارادا وزگە دە سپورت تۇرلەرىنىڭ وكىلدەرى كەلەدى. وسى دودالى ويىندارعا ەلىمىز ەكىنشى رەت اتسالىسپاقشى. سپورتشىلار جاتتىقتىرۋشىلارمەن بىرگە بيىك ناتيجەلەر كورسەتۋگە دايىن. سپورتشىلارىمىزدىڭ ورنالاساتىن جەرلەرى جاقسى, ينفراقۇرىلىم جامان ەمەس, قوناقجايلى باكۋ قالاسى ءبىزدى جاقسى قارسى الدى. يسلام ويىندارىنىڭ سالتاناتتى اشىلۋىنا ارنالعان شەرۋدەن كەيىن جارىستار دا باستالادى», - دەپ حابارلادى قر مسم سپورت جانە دەنە شىنىقتىرۋ كوميتەتى توراعاسىنىڭ ورىنباسارى سەرىك جاقسىباەۆ.
سونىمەن قاتار, 11 مامىر كۇنى اتلەتيكالىق قالاشىقتا قاتىسۋشى-مەملەكەتتەردىڭ تۋىن كوتەرۋ ءراسىمى ءوتتى.
بۇگىن وتاندىق بوكسشىلار جۇلدەلەر ءۇشىن جارىستى باستايدى.
ەستەرىڭىزگە سالا كەتسەك, 2017 جىلعى 12-22 مامىر ارالىعىندا ازەربايجاندا IV يسلام ىنتىماقتاستىعى ويىندارى وتەدى. جارىسقا 54 مەملەكەتتەن 3500-گە جۋىق سپورتشى قاتىسادى. قازاقستان اتىنان 5 سپورت ءتۇرى: بوكس, دزيۋدو, تاەكۆوندو WTF, ەركىن جانە ايەلدەر كۇرەسىندە 32 سپورتشى باق سىناماق.
