ايتا كەتەيىك, تۇركىستاندا وتكەن شارانى وڭتۇستىك قازاقستان وبلىسى اكىمدىگى مەن حالىقارالىق تۇركى اكادەمياسى ۇيىمداستىرعان بولاتىن. وعان قازاقستان, ازەربايجان, باشقۇرتستان, بەلگيا, قىرعىزستان, وزبەكستان, تاتارستان مەن تۇركيا مەملەكەتتەرىنىڭ بۇقارالىق اقپارات قۇرالدارىنىڭ باسشىلارى مەن جۋرناليستەرى قاتىسىپ, تۇركى الەمىنىڭ ورتاق اقپاراتتىق كەڭىستىگىن قالىپتاستىرۋ – تۇركىتىلدەس مەملەكەتتەردىڭ ىنتىماقتاستىعىن نىعايتىپ, ورتاق مادەنيەت پەن وركەنيەت قالىپتاستىرۋ ماسەلەسىن تالقىلادى.
فورۋمنىڭ اشىلۋ سالتاناتىندا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ كىرىسپە ءسوز سويلەپ, اتالعان فورۋم «تۇركىستان - تۇركى الەمىنىڭ مادەني استاناسى» اياسىندا وتكىزىلەتىن ءىس-شارالاردىڭ ىشىندەگى ماڭىزدى جيىننىڭ ءبىرى ەكەندىگىن ايتىپ, بۇگىنگى فورۋمعا قاتىسۋشىلارعا اقپاراتتىق كەڭىستىكتەگى ماسەلەلەردى تالقىلاپ, بەلسەندى قاتىسۋعا شاقىردى. سونىمەن قاتار, ءوڭىر باسشىسى تۇركى ەلدەرىنىڭ رۋحاني بايلىعىن مولايتۋعا قوسقان ەلەۋلى ۇلەسى ءۇشىن حالىقارالىق تۇركى اكادەمياسىنىڭ پرەزيدەنتى دارحان قىدىرالىنى «وڭتۇستىك قازاقستان وبلىسىنا سىڭىرگەن ەڭبەگى ءۇشىن» مەدالىمەن ماراپاتتادى.
اشىلۋ سالتاناتىندا سونداي-اق, تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ, تۇركيا, ءازىربايجان, وزبەكستان, قىرعىزستان ەلدەرىنىڭ بەدەلدى باق باسشىلارى ءسوز سويلەپ, وزدەرىنىڭ پىكىرلەرىن, ۇسىنىستارىن ورتاعا سالدى.
دارحان قىدىرالى جۇرگىزگەن فورۋمنىڭ العاشقى وتىرىسىندا قاتىسۋشىلار «اقپارات الماسۋ ماسەلەسى» تاقىرىبى بويىنشا پىكىر الماستى. اتاپ ايتقاندا, ازەربايجان ءباسپاسوز وداعىنىڭ باسقارما مۇشەسى, «Şark» گازەتىنىڭ باس رەداكتورى اكيف اشىرلى ۆاليەۆ, وزبەكستاندىق «تۇركىستان پرەسس» اقپارات اگەنتتىگىنىڭ باس رەداكتورى ۋلۋعبەك اسروروۆ, رەسپۋبليكالىق «ايقىن» گازەتىنىڭ باس رەداكتورى نۇرتورە ءجۇسىپ, تۇركيالىق Anadolu Ajansı مەملەكەتتىك اقپارات اگەنتتىگىنىڭ باس رەداكتورى فارۋك توكات, قىرعىزستاندىق «كىرگىز تۋسۋ» باستى رەسمي گازەتىنىڭ جاۋاپتى حاتشىسى نازاربەك بايجيگيتوۆ پەن تۇركيالىق «Yeniçağ» گازەتىنىڭ ساراپشىسى كۇرشاد زورلۋ تۇركى الەمىنە ورتاق اقپارات الماسۋ تاقىرىبىندا باياندامالار جاسادى. ەكىنشى وتىرىستىڭ قاتىسۋشىلارى ەلباسى نۇرسۇلتان نازارباەۆتىڭ 2014 جىلعى بودرۋم سامميتىندە ۇسىنعان تۇركى دۇنيەسىنىڭ ورتاق تەلەارناسىن قۇرۋ ماسەلەسىن جان-جاقتى تالقىلاپ, ءوز ۇسىنىستارىن ءبىلدىردى.
فورۋم اياسىندا تۇركى الەمىن ءبىر-بىرىنە جانە الەم جۇرتشىلىعىنا ناسيحاتتاۋعا سىڭىرگەن ەڭبەگىن ماراپاتتاۋ جانە ىنتالاندىرۋ ماقساتىندا حالىقارالىق تۇركى اكادەمياسى تاعايىنداعان يسمايل گاسپىرالى اتىنداعى حالىقارالىق مەديا سىيلىقتىڭ يەگەرلەرى ماراپاتتالدى. اتاپ ايتقاندا, تۇركيالىق «Yeniçağ» گازەتىنىڭ ساراپشىسى كۇرشاد زورلۋ, ازەربايجاننىڭ بەلگىلى قالامگەر-ءجۋرناليسى ايدا ەيۆازوۆا, «قازاقپارات» حالىقارالىق اقپارات اگەنتتىگىنىڭ باس ديرەكتورى اسقار ۋماروۆ پەن تۇركيالىق NTV ارناسىنىڭ باعدارلاما رەداكتورى احمەت يەشيلتەپە مەديا سىيلىقتىڭ العاشقى يەگەرلەرى اتاندى.
عالىمجان ەلشىباي,
"ەگەمەن قازاقستان"
