يۋسۋپ كەليگوۆ, ءماسليحات دەپۋتاتى.
پارلامەنت سەناتى دەپۋتاتتىعىنا كانديداتتاردى تاڭداۋ جوعارى دەڭگەيدە وتكىزىلگەندىگىن ورىندى اتاپ وتكىم كەلەدى. سايلاۋ ۇدەرىسى جان-جاقتى كورسەتىلىپ, وعان كوپتەگەن بۇقارالىق اقپارات قۇرالدارى وكىلدەرىنىڭ قاتىسۋى مەنى قۋانتتى.
ودان باسقا حالىقارالىق ۇيىمدار مەن شەتەلدىك بايقاۋشىلاردىڭ جانە ءوزىمىزدىڭ قوعامدىق بىرلەستىك وكىلدەرىنىڭ سايلاۋ بارىسىن بايقاۋعا كوپتەپ كەلۋى دەموكراتيانىڭ جارقىن كورىنىسى ىسپەتتى بولدى. مەنىڭ پايىمىمشا, ءبىز سەنات دەپۋتاتتىعىنا لايىقتى ادامدى تاڭداپ وتىرمىز.
گۋرگەن وگانەسيان, تمد بايقاۋشىسى.
مەن ءوزىم ارمەنيادان كەلدىم, تمد بايقاۋشىلارى قۇرامىندامىن. بىزدە مۇنداي جاناما سايلاۋ تەك قالا اكىمىن سايلاۋ كەزىندە ورىن الادى. ءبىر پالاتالى پارلامەنت بولعاندىقتان, مەن ءۇشىن مىنا سايلاۋ جۇيەسى وتە قىزىعۋشىلىق تۋدىردى. ءوزىن ءوزى ۇسىنۋشى رەتىندە جاس ۇمىتكەرلەردىڭ دە سايلاۋعا ءتۇسىپ جاتۋى مەنى قۋانتتى.
ايتسە دە تاڭداۋشىلار ءومىر كورگەن, تاجىريبەلى ادامعا ءوز داۋىستارىن بەردى. ول تۇسىنىكتى دە. وسىنىڭ وزىنەن-اق سايلاۋدىڭ قانشالىقتى دەموكراتيالىق نەگىزدە ءوتىپ جاتقاندىعىن كورۋگە بولادى.
سەرگەي براگا, «ۋريادوۆي كۋرەر» گازەتىنىڭ رەداكتورى.
ۆ.رەدكوكاشيننىڭ جەڭىسكە جەتەرىنە ەشكىمنىڭ دە كۇمانى بولعان جوق قوي دەيمىن. جەڭىس ناتيجەسىن ونىڭ پارتيالىق ۇستانىمىندا ەمەس, ءتۇسىندىرۋ جۇمىستارىن جان-جاقتى جۇرگىزۋىنەن كۇتۋ كەرەك شىعار. ويتكەنى, ءبىر پارتيادان ەكى ۇمىتكەردىڭ ءتۇسۋى وسىنى مەڭزەپ وتىر.
ماسەلەن, ۋكراينادا جانامالى تۇردە سايلاۋشىلاردىڭ داۋىس بەرۋى دەگەن جوق. ونىڭ ۇستىنە بۇقارالىق اقپارات قۇرالدارىنىڭ كوزىنشە داۋىس بەرۋ ناتيجەسىن جاريا ەتۋ ماعان وتە ۇنايدى. ەڭ باستىسى – مۇنىڭ بارلىعى دا اشىق جانە ءادىل ءوتتى.
مۇحتار ەركەتاەۆ, ۆ.رەدكوكاشيننىڭ سەنىم بىلدىرىلگەن ادامى.
سەنات دەپۋتاتتىعىنا تۇسكەن كانديداتپەن ءبىز ەكەۋمىز كومسومول كەزىنەن بىرگە جۇمىس ىستەپ كەلەمىز. وسى ءوڭىردىڭ تۋماسى. تاڭداۋشىلاردىڭ بارلىعى دەرلىك ءوز داۋىستارىن ۆ.رەدكوكاشينگە بەرىپ جاتۋى ونىڭ جۇمىسىن بىلگەندىكتەن دەپ تۇيۋگە بولادى. ول – قاراپايىم جۇمىسشىدان وسىنداي دەڭگەيگە دەيىن كوتەرىلگەن تۇلعا.
ال سايلاۋدىڭ قالاي وتكەنىنە كەلەر بولساق, ونىڭ زاڭدى تۇردە جۇزەگە اسقانىنا ەشكىمنىڭ كۇمانى بولا قويماس. ويتكەنى, بارلىعى دا كوز الدىمىزدا ءوتتى. مەنىڭ ويىمشا, سەنات سايلاۋىن حالىققا كەڭىنەن ءتۇسىندىرۋ قاجەت. مەن ءوز تاراپىمنان بۇقارالىق اقپارات قۇرالدارى جانە وزگە دە جولدارمەن وسى ماسەلەنى حالىققا كەڭىنەن جەتكىزگەندەي بولدىم.
جازىپ العان اسقار تۇراپباي ۇلى.
