قۇلاگەر – قازاق رۋحىنىڭ قاناتى

كوكشەتاۋ جۇرتشىلىعى شا­ھار­دىڭ كىرەبەرىس قاقپاسىندا كەرمارالداي كەرىلگەن اتاقتى قۇلاگەر ەسكەرتكىشىنىڭ اشىلۋ سالتاناتىنا قاتىسىپ, جۇرەكجاردى مۇباراك تىلەكتەرىمەن ءبولىستى. – حالقىمىزدىڭ تاريحى مەن دالا مادەنيەتىنىڭ اجىراماس ءبولى­گى سانالاتىن قۇلاگەر بەينەسى ءبىز ءۇشىن اسا قىمبات, – دەدى وبلىس اكىمى سەرگەي دياچەنكو قۇتتىقتاۋ ءسوزىن­دە. – قاسيەتتى كوكشە جەرىندە اقان سەرىنىڭ ءانى, قۇلاگەردىڭ ءىزى قال­عان. ول – قالىڭ قازاقتىڭ ار­عى­ماعى, بارشامىزدىڭ رۋح قا­نا­تى­مىز. اسەم بەزەندىرىلگەن ەسكەرتكىش حالىقتىڭ, جاستاردىڭ سۇيىك­تى ورنىنا اينالىپ, ەل سالتاناتى­نىڭ, قىزىق-قۋانىشىمىزدىڭ باي­­راعىنداي جەلبىرەيدى. ۇشقىر­لىق­تىڭ, سۇلۋلىق پەن تەكتىلىكتىڭ سيم­ۆولى سانالاتىن قىمبات جادىگەر ەل رۋحىنىڭ بەرىكتىگىن دە ايعاقتايدى. مىنە, اقجايما دا اعىتىلىپ ءتۇستى. بيىكتەگى 8,5 مەترلىك قۇس­قا­ناتتى قۇلاگەر سارىارقانىڭ كەرىمسال سامالىمەن ەكپىندەپ, ۇشىپ كەتكەلى تۇر. جۇرەك جەلپىنىسىندەگى تۇلپارىمىزدىڭ جەر جارعان داڭ­قى مەن قيىن تاعدىرىنىڭ ءتالىم­دەرىن ءتۇيىپ وسكەن جاسامپاز حال­قى­مىز دا جارقىن بولاشاعىنا سامعاي تۇسكەندەي ءتاتتى كۇي كەشتى. وسىنداي تولعانىس­تى ساتتە قازاق ەلى ۇلت­تىق ات سپورتى ءتۇر­لەرى اسسوتسياتسيا­سى­نىڭ ۆيتسە-پرەزيدەنتى, بىلتىر كوك­شەتاۋ-استانا اۆتو­با­نىنىڭ بويىندا قۇلاگەرگە ورناتىل­عان ەسكەرتكىش يدەيا­سى­نىڭ اۆتورى ءارى ۇيىمداستىرۋشىسى سادىبەك تۇگەل وبلىس اكىمىنىڭ يىعىنا شاپان جاپتى. كوكشە­نىڭ قادىرلى اقسا­قال­دارى بۇركىتباي با­تىر­حانوۆ, قاسقىر­باي ءابۋوۆ, مويسەي چجەن ەل قۋانىشىنا ورتاق­تا­سىپ, باتا­لا­رىن بەر­دى. بۇگىن­گى­نىڭ سەرىسى اتانعان يران تاسقارا اعامىز اقاننىڭ «قۇ­­­لاگەرىن» تەربەتىپ, جۇرتشى­لىق­تى تەڭسەلتىپ تاستادى. الاقاي شاشۋ شاشىلىپ, تەلەگەي ءان-كۇي توگىلدى. ءدال وسى كۇنى دەس بەرگەندەي قالا ىرگەسىندەگى يپپودرومدا ۇلت­تىق سپورت تۇرلەرى – كوكپاردان, قىز قۋ مەن تەڭگە الۋدان, اۋدا­رىس­پاقتان قازاق ەلى تاۋەل­سىز­دى­گى­نىڭ 20 جىلدىعىنا ارنالعان 7-ءشى رەسپۋبليكالىق چەمپيوناتتىڭ جا­لاۋى كوتەرىلدى. دودالى جا­رىس­قا بارلىق وبلىستاردان, استانا مەن الماتى قالالارىنان 300-گە جۋىق سپورتشى قاتىسۋدا. كوكشە جەرىن بەس كۇن بويى دۋمانعا ءبو­لەي­تىن جارىستىڭ العاشقى كۇنىندە كوكپارشىلار باق سىناستى. باقبەرگەن امالبەك, اقمولا وبلىسى.     سۋرەتتى تۇسىرگەن  تولەگەن قوسشىعۇلوۆ.