41-ءدىڭ قاھارلى كۇزى

قازاقستاننىڭ رەسەيدەگى ەل­شى­لىگىنىڭ قولداۋىمەن ماسكەۋ­دەگى ۇلتتار ۇيىندە تاريح عى­لىم­دارىنىڭ دوكتورلارى, پروفەسسورلار ۆلاديسلاۆ گريگورەۆ (ماسكەۋ) پەن ءلايلا احمەتوۆا (الماتى) جازعان «ياروستنىي 1941. رازمىشلەنيا يستوريكوۆ» دەپ اتالاتىن كىتاپتىڭ تانىس­تىرىلىمى بولىپ ءوتتى. ول ۇلى وتان سوعىسىنىڭ باستالعانىنا 70 جىل تولۋىنا وراي ۇيىم­داس­تىرىلعان دوڭگەلەك ۇستەل تا­قى­رىبىمەن ۇندەسىپ, كوپشىلىكتىڭ ىقى­لاسىن تۋدىردى. كىتاپتىڭ قۇن­دى سيپاتىن نەگىزىنەن بۇعان دەيىن رەسەي, قازاقستان, گەرمانيا ەلدەرى مۇراعاتتارىندا ساق­تا­لىپ كەلگەن, تاياۋ مەرزىمدە اشىلعان ماتەريالداردىڭ – ءاس­كەري-مەمۋارلىق ادەبيەتتەردىڭ, كەڭەستىك جانە نەمىس اسكەرلەرى كومانديرلەرى كۇندەلىكتەرىنىڭ, سوعىسقا قاتىسۋشىلاردىڭ ەستەلىكتەرى مەن وي-تولعامدارىنىڭ جيناقتالىپ, تالدانا ۇسىنىل­عان­دىعىمەن بىلدىرۋگە بولادى. اۆتورلار كىتاپ تۋرالى جال­پى ماعلۇمات بەرە كەلىپ, تاقى­رىپ­قا كەلۋ, ماتەريالدار جيناق­تاۋ, حا­لىقتىڭ قاھارماندىعىن كورسەتۋ باعىتىنداعى شىعارما­شى­لىق ارە­كەتتەرى تۋرالى كەڭى­نەن بايان­دادى. كىتاپتا 1941 جىل­­عى شايقاستار­عا, سونىڭ ءىشىن­­دە برەست قامالىن قورعاۋعا قاتىس­قان قازاقستاندىق­تاردىڭ ءتىزىمى العاش رەت بەرىلگەن. سونداي-اق قازاقستاندا جاساق­تال­عان اتاقتى 8-گۆارديالىق ديۆيزيا تۋرالى جان-جاقتى جازىل­عان. كىتاپتا وسى تاقىرىپقا تىكەلەي قاتىستى ادام اتتارى, تسيفر­لار, اتاۋلار جانە باسقا ناقتى ماتەريالدار كوپتەپ كەزدەسەدى. 1941 جىلعى وقيعالاردى ءادىل تارازىلاي وتىرىپ, اۆتور­لار سوعىسۋشى تاراپتاردىڭ ءاس­كەري جاي-كۇيىنە, سوعىس قارسا­ڭىن­داعى كادر ساياساتى ماسەلە­سىنە, جەكەلەگەن اسكەري مەملەكەتتىك قايراتكەرلەر رولىنە توق­تالىپ, تۇتاستاي كەزەڭنىڭ قۇ­جات­­تىق شىندىعىن اشۋعا تى­رى­­سادى. دوڭگەلەك ۇستەل بارى­سىندا قاتىسۋشىلار سونداي-اق بۇل ەڭبەكتىڭ تالدامالى ءارى سالىستىرمالى تۇرعىدا جا­زىل­عانىنا ءمان بەرە كەلىپ, ونىڭ وقۋ قۇرالى ۇلگىسىندە جارىق كورۋى قالىڭ وقىرماندى, ءاسى­رەسە, قازاقستان مەن رەسەيدىڭ وقۋشى جاستارىن قاھارلى قى­رىق ءبىرىنشى جىلدىڭ شىنايى وقيعالارىمەن تەرەڭىرەك تانىس­تىرۋعا ىقپال ەتەتىنىنە باسا نازار اۋداردى. سەرىكقالي بايمەنشە, «ەگەمەن قازاقستان» – ماسكەۋدەن.