وتكەن سەنبى كۇنى مەملەكەت باسشىسى نۇرسۇلتان نازارباەۆ «استانانىڭ باس جوباسى عىلىمي-زەرتتەۋ جوبالاۋ ينستيتۋتى» مكك-دا بولدى.
قازاقستاننىڭ ازاتتىعىن ايعاقتايتىن ەل تاۋەلسىزدىگىنىڭ 20 جىلدىق مەرەيتويىنا وراي, قازاقستاننىڭ ەلورداسى – استانا قالاسىندا سالتاناتتى قاقپا بوي كوتەرمەك. بۇل قاقپا 20 جىلدىق بەلەستى باعىندىرعان ەلىمىزدىڭ دامۋ تاريحى مەن گۇلدەنۋىنىڭ سيمۆولى ىسپەتتى دەسەك, ارتىق ايتقاندىق بولماس. استانا قالاسىنىڭ اكىمى يمانعالي تاسماعامبەتوۆ 20 جىلدىڭ بەدەرىندە تۇرعان مەملەكەتىمىزدىڭ ايتۋلى مەرەيتويى قارساڭىندا مەملەكەت باسشىسىنىڭ نازارىنا وسى سالتاناتتى قاقپانىڭ كەسكىندەمەلىك جوبالارىن ۇسىندى. سونىمەن قاتار, پرەزيدەنتكە قالا قۇرىلىسى جوبالارىنىڭ جۇزەگە اسىرىلۋ بارىسى جايىندا بايانداپ بەردى.
ءبىر اتاپ وتەرلىگى, بۇگىندە استانا قۇرىلىسى ءوزىنىڭ شەشۋشى كەزەڭىنە قادام باستى. قازاقستاننىڭ سيمۆولىنا اينالىپ ۇلگەرگەن باس قالا ءوزىنىڭ رۋحاني ورتالىق رەتىندەگى ورنىن دا مىقتاپ ايقىندادى. سول سەبەپتى دە مەملەكەت باسشىسىنىڭ نازارىنا ۇسىنىلعان, بولاشاقتا اسەم شاھار تورىندەگى عيماراتتاردىڭ قاتارىنان ساپ تۇزەيتىن بىرەگەي نىسانداردىڭ بارلىعىن دەرلىك ساۋلەت ونەرىنىڭ بۇگىنگى زامانعا ساي تاڭداۋلى ۇلگىلەرى مەن سونى شەشىمدەرى دەپ سەنىمدى تۇردە باعا بەرۋگە بولادى. ياعني, ولاردىڭ كەز كەلگەنى باس قالانىڭ باي ارحيتەكتۋرالىق ءانسامبلىن تولىقتىرا تۇسپەك. ال بۇل ءوز كەزەگىندە استانا كوركىنىڭ كۇن وتكەن سايىن ايشىقتالا, ادەمىلەنە, ساندەنە تۇسۋىنە ۇلەس قوساتىن بولادى.
سالتاناتتى قاقپا پرەزيدەنت نۇرسۇلتان نازارباەۆتىڭ يدەياسىنان تۋعان قۇندى جوبا. دەمەك, ول قالانىڭ كەزەكتى ءبىر نىساندارى قاتارىنان ورىن الىپ قانا قويمايدى, سالتاناتتى قاقپا – 20 جىلدىق مەرزىم ىشىندە بەدەلدى ءارى تۇراقتى مەملەكەت رەتىندە الەمدىك ساياسات ساحناسىنان ورىن العان جاس ەلدىڭ ەمبلەماسىنا دا اينالماق. وسى ورايدا, بۇل نىساندا ۇلتتىق ناقىش ۇلگىلەرى كورىنىس تاۋىپ, ول جاڭا زاماناۋي ارحيتەكتۋرالىق شەشىمدەرمەن شەبەر شەندەستىرىلۋى ءتيىس, دەدى مەملەكەت باسشىسى.
بۇدان كەيىنگى كەزەكتە نۇرسۇلتان نازارباەۆ قۇرىلىسى ءجۇرىپ جاتقان «استانا مەديا ورتالىق» تەلەراديو كەشەنىن ارالاپ كوردى. پرەزيدەنتكە بۇل نىساننىڭ جوباسىن ەلىمىزدىڭ بايلانىس جانە اقپارات ءمينيسترى اسقار جۇماعاليەۆ تانىستىردى. اتالعان كەشەننىڭ جالپى اۋدانى 75,5 مىڭ شارشى مەتردى قۇرايدى. مينيستردىڭ ايتۋىنشا, اۋقىمدى اۋماقتى الىپ جاتقان كەشەن قۇرامىندا اپپاراتتى-ستۋديالىق بلوكتار, كوپ ارنالى تەلەحابارلار تاراتۋ بلوگى, كوپ ارنالى راديوحابارلار تاراتۋ بلوگى, 100 ورىندىق كينوكونتسەرت زالى, ۇلتتىق مەديامۇراعاتتىڭ اپپاراتتىق كەشەنى بار. مۇنداي ورتالىقتىڭ نەگىزىن قالاۋداعى باستى ماقسات – مەملەكەتتىك تەلەارنالاردىڭ تەحنيكالىق بازاسىن قازىرگى زامان تالابىنا ساي كەلەتىن ستاندارتتارعا ساي كەلتىرۋ, مەدياكەڭىستىكتى ۇلتتىق مەدياكونتەنتپەن تولتىرۋ, ەفيرلىك ساندىق تەلەديدار مەن راديوتاراتۋ ءجۇيەسىنە ءوتۋ, ەلەكتروندى مەديامۇراعاتتى قۇرۋ بولىپ تابىلادى.
ياعني, «استانا مەديا ورتالىق» – امبەباپ كەشەن. ونىڭ ەرەكشەلىگى – بۇل جەرگە ەلىمىزدىڭ بارلىق مەملەكەتتىك ەلەكتروندى بۇقارالىق اقپارات قۇرالدارى شوعىرلانباق. ال ولاردىڭ بارلىعى وزىق تەحنولوگيالىق رەسۋرستارمەن بىرىكتىرىلمەك. مامانداردىڭ سوزىنە قاراعاندا, قازىرگى زاماننىڭ قايتالانباس تەحنولوگيالىق شەشىمدەرىنە سۇيەنە وتىرىپ, بوي كوتەرەتىن مۇنداي مەدياالاڭنىڭ بۇرىنعى پوستكەڭەستىك كەڭىستىك شەڭبەرىندە ەشقانداي بالاماسى جوق.
ءلايلا ەدىلقىزى.
سۋرەتتى تۇسىرگەندەر س.بوندارەنكو, ب.وتارباەۆ.
