قازاقتىڭ اسپالى شامى

ءيا, قاي جاعىنان الساق تا, ەبىن تاۋىپ ەڭبەك ەتسەك حالقىمىزدىڭ وركەندەۋ جولىنداعى ۇلگى مەن ونەگە­سى, ويىنداعى ۇشقىرلىق, بويىنداعى تالانت جەتىپ ارتىلادى. سونىڭ ءبىر كورىنىسىنە استانا كۇنىن­دە كۋا بولدىق. وسى كەزگە دەيىن وزگە جۇرت­تاردىڭ الۋان ءتۇرلى شامدالدارىنا تامسانىپ, سونى توبەمىزگە دە, تورىمىزگە دە ءىلىپ جۇرەتىن ەدىك. ديزاينىنە, ياعني قۇبىل­عان شىنىسىنا, ىلەتىن ىلگەگىنە – نەسىن ايتا­سىز, بارىنە قاراپ, مىناۋ ەۋروپانىكى, اناۋ قىتايدىكى دەپ سالىستىرىپ, سالماقتاپ باعاسىنا كەلگەندە قالتانى باسىپ, جەلكەنى قاسىپ جۇرەتىنبىز. ال مىنا شاڭىراق فورماسىنداعى ءوز شامدا­لى­مىز­دى كورگەن­دە ۇلتتىق مادەنيەتتىڭ ءبىر ادەمى جاۋ­ھارى كوزىمىزگە جىلىۇشىراپ, جانىمىزعا جىلۋ قۇيعان. جاڭ­عىرت­سا, جاقسىمىز بار ەكەن-اۋ دەگىزدى. ءار اسى­لىمىزدى وسىلايشا مىسقالداپ جاساپ, قاجەتىمىزگە جاراتا بەرسەك, ۇلتتىق ناقىشتاعى دۇنيەلەرىمىز بىرتە-بىرتە باسقانىڭ جىلتىراعى­نىڭ ورنىن باسىپ, جەتىلە كەلىپ, ونى ىعىستىرىپ شىعارارى ءسوزسىز. بۇل ار­قىلى تىرنەكتەپ تاپقان تەڭگەمىزدى ءوز قازىنامىزدا  قالدى­را­رىمىز انىق. «ءوزىڭ وندىرمەي وزەگىڭ جال­عانبايدى» دەگەن قاناتتى ءسوز وسىندايدا تۋسا كەرەك. وسى ۇلتتىق ناقىشتاعى دۇنيەنى جاساعان ازاماتپەن تىلدەسكەنىمىزدە, ول بۇل ءىسىن قازىر قىتاي كاسىپورىندارىمەن بىرىگىپ جۇزەگە اسىرىپ جاتقانىن جەتكىزدى. شاڭىراق ۇلگىسىندەگى شامدالدار (ليۋسترا) شەتەلدىك قوناقتاردى قابىلدايتىن سالتاناتى مول عيماراتتاردىڭ كىرە بەرىسىنەن باستاپ, ءار بولمەسىنە, قابىرعالارىنا ارناپ جاسالىپ جاتقانىن العا تارتتى. سول سەكىلدى كوپشىلىك ورىندارعا دا اتاپ ايتقاندا, بالاباقشالارعا, مەكتەپتەرگە, جوعارى وقۋ ورىندارىنا, جەكە ۇيلەرگە دە, ءتورت قۇبىلاسى تۇگەل دەلىنەتىن كوتتەدجدەرگە دە ىڭعايلاستىرىپ جاساپ جاتقانىنا مىسالدار كەلتىرىپ, الۋان فورمالاردى كورسەتتى. ول ازامات – الماتىلىق كاسىپكەر مەيرام قابدىراحمان ەدى. «مەن كوپتەن بەرى استانا كۇنىنە ءبىر تارتۋ تارتسام دەپ جۇرگەن ەدىم. بۇل جولعى ءدۇ­نيە­لەرىمنىڭ ءبارى ەلوردا ءۇشىن جاسالدى. پايىم­داۋىمشا, قازاق ەلىندە قازىرشە مۇنداي ۇلتتىق ناقىشتاعى شامدالدار جوق بولۋى كەرەك. مەن قاسيەتتى سانالاتىن كيىز ءۇيدىڭ شاڭىراعىن نەگىزگە الا وتىرىپ, الۋان تۇردەگى شامدالداردى جاساپ جاتىرمىن. ءونىم­دەرى­مە سۇرانىس از بولىپ تۇرعان جوق. قاناتتاس وتىرعان قىرعىز باۋىرلار: اعايىندى ەلمىز عوي, كيىز ءۇيدىڭ شاڭىراعى قازاق-قىرعىزعا ورتاق, بىرلەسىپ جۇمىس جاسايىق دەگەن ۇسىنىستارىن بىلدىرۋدە. بىراق مەن بۇل جۇمىستى ءوز وتانىمدا ورىستەتۋدى ماقۇل كورىپ وتىرمىن. دەمەۋشىلەر ءوز ەلىمىزدەن دە تابىلار دەگەن ۇمىتتەمىن», دەيدى م.قابدىراحمان. شىنىندا, ۇلتتىق جادىگەرىمىزدىڭ نەگىزىندە جاسالعان شام ادەمى. فورماسى وزگەشە. حالىقتىق قالىپ ايناداعىداي ايقىن. ونىڭ ۇستىنە ءار شاڭى­راققا وسى شامدالدان جارىق نۇرى شاشىلىپ تۇرسا, ول وي سانامىزدى ساۋلەلەندىرىپ,  ۇلتتىق رۋحىمىزدى جاڭعىرتىپ جاتسا, قانە. سۇلەيمەن مامەت.