ادەبيەت پەن ونەر وركەنى

م.اۋەزوۆ اتىنداعى ادەبيەت جانە ونەر ينستيتۋتىندا «تاۋەلسىزدىك جىلدارىنداعى ادەبيەت پەن ونەردىڭ دامۋ ءۇردىسى جانە بولاشاعى» اتتى حالىق­ارا­لىق عىلىمي-تەوريالىق كونفەرەنتسيا بولىپ ءوتتى. ول ەلىمىزدىڭ ۇلىق مەرەكەسىنە ارنالدى. وتاندىق, شەتەلدىك جەتەكشى عالىمداردىڭ قاتىسۋىمەن وتكەن وسىناۋ حالىقارالىق جيىن وتان­دىق ادەبيەت پەن ونەردىڭ تاۋەل­سىزدىك داۋىرىندەگى دامۋ ۇردىستەرىن, جەتىستىكتەرى مەن بولاشاعىن اي­قىن­داۋ, قازىرگى قوعامدىق-ءما­دەني ۇدەرىستەردىڭ ادەبيەت پەن ونەر سالالارىنا اسەر-ىقپالىن كورسەتۋ جانە ەڭ باستىسى – بۇگىنگى ەگەمەندى ءومىر شىندىعىنىڭ ونەر تۋ­ىندىلارىندا كوركەم بەينەلەنۋ ەرەكشەلىكتەرىن اشۋ ماقساتىن كوز­دەسە, سول ۇدەدەن شىقتى دەپ ءبىلۋىمىز كەرەك. قازاقستان تاۋەلسىزدىگىنىڭ 20 جىلدىعى اياسىندا ۇيىمداس­تىرىل­عان كونفەرەنتسيا قازىرگى ادەبيەتتانۋ, ونەرتانۋ سالالارى­نىڭ كەلەلى عىلىمي-تەوريالىق ماسەلەلەرىن شەشۋدىڭ ءتيىمدى جولدارىن تابۋعا دا ءوز سەپتىگىن تيگىزگەنى انىق. م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەك­تورى, ۇعا اكادەميگى سەيىت قاس­قاباسوۆ جيىندى كىرىسپە سوزبەن اشقاننان كەيىن ادەبيەتتانۋشى عالىمداردىڭ باياندامالارىنا جول بەرىلدى. اتاپ ايتقاندا, سەرىك قيراباەۆتىڭ «تاۋەلسىزدىك ءداۋىرى ادەبيەتىنىڭ بۇگىنگى جاعدايى مەن مىندەتتەرى», شەريازدان ەلەۋ­كەنوۆ­تىڭ «تاۋەلسىزدىك جانە تاريحي رومان ۇردىستەرى», دانداي ىسقاق­ ۇلىنىڭ «تاۋەلسىزدىك كەزەڭىندەگى ادەبي سىن», باقىتجان مايتانوۆ­تىڭ «قازىرگى پوەزياداعى پوستمودەرنيزم جانە ءبورى ارحەتيپى» جانە باسقا باياندامالار ىقىلاسپەن تىڭدالدى. سونداي-اق تەمىرحان تەبەگەنوۆ قازىرگى قازاق پوەزيا­سىنداعى ءدىني-يسلام دۇنيەتانى­مىنىڭ جىرلانۋ ەرەكشەلىكتەرىن, نۇربولات جۋانىشبەكوۆ تاۋەلسىز­دىك جىلدارىنداعى ادەبيەت دا­مۋىنىڭ باستى ۇردىستەرى مەن كەلەشەگىن, اڭگىمە وزەگىنە اينالدىرسا, ونەرتانۋشى عالىمدار سارا كۇزەمباەۆا ابىلاي حاننىڭ قازاق مۋزىكالىق-جىراۋلىق فولكلو­رىن­داعى بەينەسىن, رايحان ەرعا­ليەۆا تاۋەلسىزدىك كەزەڭىندەگى بەينەلەۋ ونەرىنىڭ جايىن ءسوز ەتتى. كونفەرەنتسيانىڭ «تاۋەلسىزدىك جىلدارىنداعى ادەبيەتتىڭ دامۋ ۇردىستەرى», «تاۋەلسىزدىك جىلدا­رىنداعى ونەر: بۇگىنى مەن بولاشا­عى» اتتى سەكتسيالار جۇمىسى بارى­سىندا ەگەمەندى ءداۋىر ادە­بيەتى مەن ونەرىنىڭ بۇگىنگى جاع­دايى مەن مىندەتتەرى, جەكەلەگەن جانرلىق تۇرلەردىڭ دامۋ ۇردىستەرى, قازىرگى ادەبي-كوركەمدىك جانە ونەر ۇدەرىستەرىندەگى ءداستۇر مەن جاڭاشىلدىق جانە وزگە دە جەكەلەگەن پوەتيكالىق ماسەلەلەر قاۋزا­لىپ, تىڭ يدەيالاردى ارقاۋ ەتكەن ساليقالى سوزدەر ايتىلدى. قورعانبەك امانجول.