مينيسترلىكتىڭ مالىمەتىنشە, قازىرگى كەزدە Android وپەراتسيالىق جۇيەسى بار ءموبيلدى قۇرىلعىلارعا زياندى باعدارلامالاردى جۇكتەپ, تاراتۋ فاكتىلەرى انىقتالعان.
بىلتىر ءىىم 85 ميلليوننان استام الاياقتىق قوڭىراۋدىڭ الدىن الدى
الاياقتار مۇنداي قوسىمشالاردى ءارتۇرلى تاسىلمەن تاراتادى. اتاپ ايتقاندا:
- مەسسەندجەرلەر مەن الەۋمەتتىك جەلىلەر ارقىلى فيشينگتىك سىلتەمەلەر جىبەرۋ;
- جالعان ءموبيلدى قوسىمشالار ۇسىنۋ;
- فوتو, بەينە نەمەسە قۇجات رەتىندە جاسىرىلعان زياندى فايلدار تاراتۋ;
- مەملەكەتتىك ورگانداردىڭ, بانكتەردىڭ نەمەسە جەتكىزۋ قىزمەتتەرىنىڭ اتىنان حابارلاما جولداۋ;
- اكتسياعا نە ۇتىس ويىنىنا قاتىستىرۋ سىلتاۋىمەن قوسىمشا ورناتۋدى تالاپ ەتۋ.
«زياندى باعدارلاما ورناتىلعان سوڭ, قاسكويلەر تەلەفونعا قاشىقتان قول جەتكىزە الادى. سونىڭ سالدارىنان شوتتاعى قاراجات ۇرلانۋى, ونلاين-نەسيەلەر راسىمدەلۋى, جەكە دەرەكتەر مەن حات-حابار تارالۋى نەمەسە قۇرىلعى بۇعاتتالىپ, اقشا تالاپ ەتىلۋى مۇمكىن», دەلىنگەن مينيسترلىك تاراتقان حابارلامادا.
ەسكە سالا كەتەيىك, ءوزىڭىزدى قورعاۋ ءۇشىن بەيتانىس ادامداردىڭ وتىنىشىمەن قوسىمشا جۇكتەمەڭىز, SMS ارقىلى كەلگەن كودتاردى ەشكىمگە بەرمەڭىز جانە كۇماندى سىلتەمەلەرگە وتپەڭىز. تەك رەسمي قوسىمشالاردى پايدالانىپ, انتيۆيرۋستىق باعدارلامانى ورناتىڭىز جانە بانك وپەراتسيالارى تۋرالى حابارلامالاردى قوسىپ قويىڭىز.
مينيسترلىك قاۋىپتى قوسىمشانىڭ بار ەكەنىن مىنا بەلگىلەر ارقىلى بايقاۋعا بولاتىن ايتادى:
- باتارەيانىڭ تەز تاۋسىلۋى;
- تەلەفوننىڭ شامادان تىس قىزۋى نەمەسە بەلگىسىز باعدارلامالاردىڭ پايدا بولۋى.
«كۇدىك تۋىنداعان جاعدايدا ينتەرنەتتى دەرەۋ ءوشىرىڭىز, بانكپەن بايلانىسىڭىز جانە قۇقىق قورعاۋ ورگاندارىنا جۇگىنىڭىز. ساق بولىڭىز. تسيفرلىق قاۋىپسىزدىك وزىمىزدەن باستالادى», دەلىنگەن حابارلامادا.
