جۇمىسپەن قامتۋ جانە قولداۋ

ەلباسىنىڭ بيىلعى جول­داۋىن­دا جۇمىسپەن قامتۋدىڭ جاڭا سترا­تەگياسى بەلگىلەنىپ, «جۇمىس­پەن قامتۋ – 2020» باعدارلا­ماسىن ءاربىر قازاقستاندىقتاردىڭ وتباسىنا جەتكىزۋ كوزدەلسە, وسى تاپسىرما بۇگىندە كەڭىنەن جۇزەگە اسىرىلا باستادى. ىلە اۋدانىندا وتكەن جيىندا ماسەلەنىڭ ءمانى جان-جاقتى ايقىندالىپ, باعدار­لا­مانىڭ تۇساۋى كەسىلدى. باعدار­لامانىڭ بارلىق ماقسات-مىندەت­تە­رىن بەلگىلەگەن باسقوسۋ جۇمىس­پەن قامتۋدىڭ جاڭا جۇيەسىن تالداۋمەن, تۇسىندىرۋمەن جالعاسىپ, كوپشىلىكتەن قولداۋ تاپتى. بيىل جەتىسۋ ءوڭى­رىنە «جۇ­مىسپەن قامتۋ-2020» باع­دارلاماسىن جۇزەگە اسىرۋعا 1 ملرد. 176 ملن. تەڭگە بولىنگەن. اتالعان قارجى ءۇش نەگىزگى باعىت بويىنشا يگەرىلسە, ءبىرىنشى باعىت­تا 446 ادامدى كاسىپتىك جانە قاي­تا دايارلاۋ, بىلىكتىلىگىن ارتتىرۋ جوسپارلانعان. سونداي-اق, 228 ادامنىڭ ەڭبەكاقىسىن سۋبسيديالاۋ كوزدەلگەن. ال, ەكىنشى باعىت­تا جەكە كاسىبىن اشاتىن ازامات­تارعا ميكرونەسيەلەر بەرىلمەكشى. وعان 126,3 ملن. تەڭگە قاراستى­رىلسا, نەسيە بەرۋدى «جەتىسۋ» الەۋ­مەتتىك-كاسىپكەرلىك كورپورا­تسياسى جۇزەگە اسىراتىن بولدى. بۇگىنگى تاڭدا «جەتىسۋ» الەۋ­مەت­تىك-كاسىپكەرلىك كورپوراتسياسى نەسيەلىك ميكروقارجى بەرۋدى ۇيىم­داستىرۋشى ۇيىم رەتىندە تىركەلگەن. حالىقتى جۇمىسپەن قامتۋ مەن قولداۋعا باعىتتالعان باعدارلاما اياسىندا قارجى بەرۋ اتالعان مەكەمە ارقىلى تولىق جۇزەگە اسىرىلماقشى. نەسيە بەرۋ ۇيىمى تالدىقورعان وڭىرىندە جۇيەلەنسە, وزگە ايماقتاردا فيليال اشۋ قولعا الىنۋدا. ال, ءۇشىنشى باعىت بويىنشا حا­لىقتى الەۋمەتتىك جاعىنان قول­داۋ ماقساتىندا ءبىر اۋداننان ەكىنشى اۋدانعا نەمەسە ءبىر اۋىل­دان ەكىنشى اۋىلعا كوشىرۋ ماسە­لەسى قولدانىلاتىن بولدى. الەۋ­مەتتىك جاعىنان جەتكىلىكسىز قامتىلعاندارعا ارنايى باسپانا سالۋ دا جوسپاردا بار. وڭىردە وسىنداي 6 ەكونوميكالىق دامۋ ورتالىقتارى بەلگىلەنىپ, العاش­قى ۇيلەردىڭ قۇرىلىسىن بيىل باستاۋ كۇن تارتىبىنە قويىلعان. ەڭبەك جانە حالىقتى الەۋ­مەتتىك قورعاۋ مينيسترلىگىنىڭ جاۋاپ­تى حاتشىسى تامارا دۇيسە­نوۆا وبلىستا 150 وتباسى وسىن­داي تالاپپەن كوشىرىلەدى دەپ بولجايدى. سونداي-اق 16 اۋدان مەن 3 قالادا جۇمىسپەن قامتۋ ورتالىقتارىن اشۋعا رەسپۋب­ليكا­لىق بيۋدجەتتەن 230 ملن. تەڭگە جانە 221 شتاتتىق بىرلىك بولىنەتىنىن جەتكىزدى. باعدارلاما شىلدەنىڭ 1-نەن باستالدى. بيىل وسىنداي جۇيە­مەن ءوڭىر­دە 6 مىڭ ادام ەڭبەك­پەن قامتىلادى دەپ كۇتىلۋدە. الماتى وبلىسى.