بۇل جارىستا ابىلايحان ءجۇسىپوۆتىڭ شوقتىعى بارىنەن دە بيىك. سەبەبى ونىڭ ۇرىسۋ ءستيلى تىم بولەك. ەكىنشىدەن, 69 كيلو – وليمپيادادا «قازاقتىڭ سالماعى» بولعالى قاشان! بىراق, جارتىلاي فينالداعى جەكپە-جەگى شىنى كەرەك, كوپشىلىك كوڭىلىنەن شىعا قويعان جوق. تورەشىدەن ەكى بوكسشى دا ەسكەرتۋ الدى. ال ءۇشىنشى راۋندتا ەكى بوكسشى باسپەن سوقتىعىسىپ, سوڭى ابىلايحاننىڭ قاباعى جارىلۋىمەن اياقتالدى. وسىلايشا كەزدەسۋ مەرزىمىنەن بۇرىن توقتاتىلدى. ناتيجەسىندە تورەشىلەردىڭ ءبىراۋىز شەشىمىمەن ابىلايحان موڭعول بوكسشىسى بيامبا تۋۆشينباتتان باسىم ءتۇستى. ا.ءجۇسىپوۆتىڭ كەلەسى قارسىلاسى قازاق جانكۇيەرلەرىنە ەتەنە تانىس شاحرام گياسوۆ بولماق. بۇحارا قالاسىنىڭ تۋماسى گياسوۆ 2016 جىلى ريو وليمپياداسىنىڭ فينالىندا ءبىزدىڭ دانيار ەلەۋسىنوۆكە ەسە جىبەرگەنىن ەستەرىڭىزگە سالا كەتەيىك.
الماس ماناپ,
«ەگەمەن قازاقستان».
تاشكەنتتەن
