ونەر مەكتەبى 2012 جىلدان باستاپ ءتاربيەلەنۋشىلەرىنىڭ جۇمىستارىن كورەرمەن نازارىنا ۇسىنىپ كەلەدى. بۇل جولعى ەكسپوزيتسياعا ارقيلى مانەردە ورىندالعان 76 جۇمىس قويىلعان. اتاپ ايتقاندا, سۇڭعات, گرافيكا, لينوگراۆيۋرا, باتيك, پاپە-ماشە, ۆيتراج, كيىز باسۋ سياقتى نەبىر قولونەر تۋىندىلارىنىڭ وزىق ۇلگىلەرى بار. مۇراجايدىڭ عىلىمي-ەكسپوزيتسيا ءبولىمىنىڭ جەتەكشىسى يرينا سولوۆەۆانىڭ ايتۋىنشا, كورمەگە ۇسىنىلعان دۇنيەلەر وقۋشىلاردىڭ ساباقتا يگەرەتىن جۇمىستارىنىڭ بىراز بولىگى عانا ەكەن. وسىناۋ العاشقى ەڭبەكتەرىنە قاراپ, ولاردىڭ قورشاعان ورتاعا دەگەن قۇرمەتىن اڭعارۋعا بولادى. ونىڭ ۇستىنە جەكە شىعارماشىلىقتىڭ قالىپتاسۋى بەينەلەۋ ونەرىمەن اينالىسۋ كەزىندە پايدا بولادى ەكەن. ماليكا مۋسينا, ايدانا الدوڭعار سياقتى تالاپتىلار بولاشاعىنان ءۇلكەن ءۇمىت كۇتتىرەدى. ۇيىمداستىرۋشىلاردىڭ پىكىرىنشە, شىعارماشىلىقپەن اينالىسۋ ءار بالانى قۋانىش سەزىمىنە بولەيدى. ولار زاتتار مەن قۇبىلىس تۋرالى ويلانىپ, كەرەكتى ادىستەرىن مەڭگەرىپ, بەينەلەۋ ونەرىنىڭ قىر-سىرى تۋرالى ءبىلىم الاتىن بولادى.
راۋشان نۇعمانبەكوۆا
سەمەي
سۋرەتتەردى تۇسىرگەن اۆتور
