نۇرتاي ابىقاەۆ: شانحاي ىنتىماقتاستىق ۇيىمىنىڭ باستى ۆەكتورى – ايماقتىق قاۋىپسىزدىكتى قامتاماسىز ەتۋ

قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى نۇرتاي ابىقاي ۇلى ابىقاەۆپەن سۇحبات – قۇرمەتتى نۇرتاي ءابى­قاي­ ۇلى! ساناۋلى ۋاقىتتان كەيىن تاۋەلسىز ەلى­مىز­دىڭ تورىندە تا­عى ءبىر ءدۇبىرلى وقيعا وتكەلى تۇر. ول – شانحاي ىنتىماق­تاس­تىق ۇيىمىنىڭ (شىۇ) 10 جىل­دىعىنا ارنالعان مەرەيتويلىق سامميت. وسىدان ون جىل بۇرىن پرەزي­دەنت­تىڭ قىتايعا ساپارىن گازەتتە كورسەتۋ ماقساتىندا شانحايعا بار­عا­نىمىز, «شانحاي ىنتىماقتاستىق­قا شاقىرا­دى» دەگەن ماقالا جاز­عا­نى­مىز ەسىمىزدە.  وسى ۇيىمنىڭ قالىپ­تا­سۋى مەن دامۋى ءسىزدىڭ كوز الدىڭىزدا وتكەنى بەلگىلى. ولاي بولسا, ەۋروپا مەن ازيا ماتەريكتەرى اراسىندا ترانزيتتىك ءرول اتقاراتىن, گەوساياسي جانە گەوسترا­تە­گيالىق جاعىنان ورنالاسۋى ەرەكشە ەلىمىزدىڭ وسىنداعى الاتىن ورنى قان­داي, وتكەن جىلدار ىشىندە اتالعان ۇي­ىم ءوزىنىڭ مىندەتىن قانشالىقتى اق­تا­دى دەپ ويلايسىز؟ سۇحباتى­مىز­دى وسىنداي ماسەلەلەردەن باستاساق؟ – ساۋالىڭىز ورىندى. قىزمەت با­بى­نا بايلانىستى وسى ۇيىمنىڭ قۇرى­لۋى­نا قاتىستى بىرقاتار ۇيىمدىق جۇمىس­تاردىڭ باسىندا بولعانىم راس. دۇنيە جۇزىندەگى كەز كەلگەن مەملەكەت ءوزىنىڭ وركەندەپ دامۋى ءۇشىن ەڭ الدىمەن قاۋىپسىزدىك ماسەلەسىنە تەرەڭ كوڭىل ءبو­لەدى. قازاقستان تاۋەلسىزدىگىن العان كۇن­نەن باستاپ ەلباسىمىز نۇرسۇلتان ءابىش­ ۇلى نازارباەۆ بۇل ماسەلەنى ءاردايىم قىراعى نازاردا ۇستاپ كەلەدى. بيىلعى جول­داۋىندا: «ۇستىمىزدەگى جىلدىڭ ماۋ­سى­مىندا استانادا شانحاي ىنتىماق­تاس­تىق ۇيىمىنىڭ مەرەيتويلىق ءسامميتى وتەدى. شانحاي ىنتىماقتاستىق ۇيى­مى ءبىزدىڭ بەلسەندى قاتىسۋىمىزبەن قۇ­رىلعان بولاتىن جانە ءبىز ونىڭ نىعايۋى ءۇشىن بارلىق قاجەتتى نارسەنى جاساۋعا ءتيىسپىز. مۇنىڭ ءبارى قازاقستاننىڭ اي­ماق­تىق جانە عالامدىق تۇراقتىلىقتى نىعايتۋعا قوسقان قوماقتى ۇلەسى بولۋعا ءتيىس», دەپ ەرەكشە اتاپ ءوتتى. اتالعان ۇيىم اياسىندا ەلىمىزدىڭ ماڭىزدى ورىن الاتىندىعى ەلباسىنىڭ وسى سوزىنەن كورىنىپ تۇر. وسىدان ون جىل بۇرىن شانحاي ىن­تى­ماقتاستىق ۇيىمىن قۇرۋ تۋرالى شە­شىمنىڭ قابىلدانۋى ستراتەگيالىق جا­عى­نان وتە دۇرىس تاڭداۋ بولعاندىعىن ۋاقىتتىڭ ءوزى دالەلدەپ بەردى. ازعانتاي ۋاقىتتىڭ ىشىندە الدىنا قويعان مىندەت-ماقساتتاردى تابىسپەن اتقاراتىن قۋات­تى جانە پەرسپەكتيۆالى ۇيىم رەتىندە تانىلدى. شەكارامىزدىڭ بويىندا قاۋىپ­سىزدىك پەن سەنىمدىلىكتىڭ كەڭ اۋماعى قۇ­رىلدى. قازىرگى كەزدە ۇيىمنىڭ نەگىزىن التى مەملەكەت قالاپ وتىر: قازاقستان, قىتاي حالىق رەسپۋبليكاسى, قىر­عىز­ستان, رەسەي فەدەراتسياسى, تاجىكستان جانە وزبەكستان. ايماقتاعى بەيبىت ءومىردى, قاۋىپسىزدىك پەن تۇراقتىلىقتى ساقتاۋ, قازىرگى زامان­عى قاۋىپ-قاتەرلەرگە قارسى بىرلەسىپ قي­مىلداۋ سەكىلدى باستى مىندەتتەر جۇزەگە اسىپ وتىر. تەرروريزم, سەپاراتيزم, ەكسترەميزم, زاڭسىز ەسىرتكى جانە قارۋ-جاراق اينا­لى­مىنا, ترانسۇلتتىق قىلمىس, زاڭسىز مي­گراتسياعا, ادام ساۋداسىنا توسقاۋىل قويۋ سەكىلدى تاعى دا باسقا باعىتتاردا ۇي­ىم­نىڭ ايماقتىق انتيتەررورلىق قۇرىلى­مى­نىڭ كەڭەسى مەن اتقارۋشى كوميتەتى قوماقتى جۇمىس جۇرگىزىپ كەلەدى. ال, ەكونوميكالىق, عىلىمي-تەحنيكالىق ىن­تى­ماقتاستىق جانە گۋمانيتارلىق باي­لا­نىستار وڭىردەگى حالىقتىڭ دامۋى مەن گۇلدەنۋىنە جاڭاشا سەرپىن بەرۋدە. وسى­دان-اق ۇيىم بولاشاعىنىڭ زور ەكەندىگىن باعامداۋعا بولادى. – شانحاي ىنتىماقتاستىق ۇيى­مى­­نىڭ بەلسەندى ءبىر مۇشەسى تاۋەلسىز قا­زاقستان دەيتىن بولساق, سونىڭ ىشىندە ءوزىڭىز باسقارىپ وتىرعان ۇلتتىق قاۋىپ­­سىزدىك كوميتەتىنىڭ اتالعان ۇيىم­نىڭ دامۋى مەن قالىپتاسۋىنا قوسىپ وتىرعان ۇلەسى تۋرالى ايتىپ بەرسەڭىز. – قازاقستان رەسپۋبليكاسىنىڭ ۇلت­تىق قاۋىپسىزدىك كوميتەتى العاشقى كۇن­دەر­دەن باستاپ ۇيىمنىڭ جۇمىسىنا بەلسەندى قاتىسىپ كەلەدى. ويتكەنى, ۇقك تەرروريزمگە قارسى كۇرەس ءجۇر­گىزەتىن بىردەن-ءبىر قۇزىرلى ورگان بولىپ تابىلادى. ۇيىمنىڭ حاتشىلىعىمەن, ايماق­تىق انتيتەررورلىق قۇرىلىمنىڭ اتقا­رۋ­شى كوميتەتىمەن بىرلەسە وتىرىپ جان-جاق­تى جۇمىس ىستەۋ تۇراقتى جولعا قوي­ىلعان. لاڭكەستىككە توسقاۋىل قويۋ باعى­تىندا ءتيىستى باعدارلامالار جاساۋ, زاڭ جوبالارىن, قۇقىقتىق-نورماتيۆتىك اكتىلەردى دايىنداۋ, جوعارى دارەجەلى سامميت, كەزدەسۋلەر مەن كەلىسسوزدەر, وقۋ-جاتتىعۋلارىن وتكىزۋ, عىلىمي كونفەرەنتسيالار, سەمينارلار ۇيىمداستىرۋ سەكىلدى كوپتەگەن شارالارعا ۇقك تا­راپى­نان ۇلكەن كوڭىل بولىنەدى. بىلتىرعى جىلى الماتى قالاسىندا ۇيىمنىڭ ايماقتىق انتيتەررورلىق قۇ­رى­­لى­مى كەڭەسىنە قازاقستان رەسپۋب­لي­كاسى توراعالىق ەتىپ, ونىڭ كەزەكتى 17-ءشى ءما­جىلىسى الماتى قالاسىندا وتكىزىلدى. اي­ماقتىق انتيتەررورلىق قۇرىلىمى ات­­قارۋشى كوميتەتىنىڭ ديرەكتورى مەم­لەكەتىمىزدىڭ تاراپىنان بەكىتىلدى. پرەزيدەنتتىڭ تاپسىرماسىمەن قۇ­رىل­عان ۇقك انتيتەررورلىق ورتالىعى بۇگىنگى تاڭداعى قاۋىپ-قاتەرلەردىڭ جو­لىن كەسۋ باعىتىندا تۇراقتى جۇمىس جۇرگىزۋدە. قازاق­ستان­نىڭ باسقا قۇزىرلى ورگاندارى دا قاۋىپ­سىزدىكتى قامتاماسىز ەتۋگە وزىندىك ۇلەس­تەرىن قو­سىپ كەلەدى. مىسالى, توعىز مەملەكەتتىك ورگاننىڭ وكىلدەرى قاتى­سا­تىن ۆە­دوم­ستۆو­ارالىق ۇيلەستىرۋ كەڭە­سىن­دە وسى بويىنشا ناقتىلاي جۇمىستار اتقارىلادى. ۇيىمنىڭ قۇزىرلى ورگاندارىن قا­جەت­تى اقپاراتپەن قامتاماسىز ەتۋ ماق­ساتىندا ارنايى قورعالعان دەرەكتەر بانكى قۇرىلۋدا. ۇقك باستاماسىمەن ەكس­ترە­ميستىك ۇيىمداردىڭ ءىس-ارەكەتىنە قارسى بىرلەسە قيمىلداۋ ءۇشىن ساراپشىلار توبى ۇيىمداستىرىلدى. وسى جىلعى اقپان ايىندا الماتىدا «قاۋىپسىزدىك پەن ىنتىماقتاستىق جو­لىن­داعى – 10 جىل: شانحاي ىنتىماق­تاس­تىق ۇيىمى كەڭىستىگىندەگى قازىرگى زامان­عى قاۋىپ-قاتەرلەرگە قارسى ءساتتى ءتا­جى­ريبە­لەر» دەگەن تاقىرىپپەن ءوت­كى­زىلگەن عىلى­مي-تاجىريبەلىك كونفەرەنتسيا­دا ۇي­ىم­دى دامىتۋعا, جۇمىس پارمەن­دىلىگىن ارت­تىرۋ­عا قاتىستى ۇسىنىس-ءپى­كىرلەر كوپ ايتىلدى. سولاردىڭ بارلىعى الداعى ۋاقىتتا ەسكەرىلەتىن بولادى. – قالىپتى جۇمىس ىستەۋ ءۇشىن تو­لىق­قاندى زاڭدىلىق, ءنورماتيۆتى-قۇ­قىقتىق بازانىڭ بولۋى – قاجەتتى ال­عى­شارتتاردىڭ ءبىرى. قازىرگى ۋاقىتقا دەيىن اتالعان ۇيىمنىڭ قۇقىقتىق نە­گىزى تولىعىمەن قالىپتاسىپ بولدى ما؟ – ۇيىمنىڭ قۇقىقتىق نەگىزى تولى­عىمەن قالىپتاسىپ بولدى. ۇقك تارا­پى­نان ۇسىنىلعان شانحاي ىنتىماقتاستىق ۇيىمىنىڭ جۇمىس ىستەۋىنە قاجەتتى مەم­لەكەتارالىق وننان استام كونۆەنتسيالار, زاڭدار, ءنورماتيۆتى-قۇقىقتىق اكتىلەر پار­لامەنتتە راتيفيكاتسيالاندى. ولار­دىڭ ىشىندە «شانحاي ىنتىماقتاستىق ۇيىمىنىڭ تەرروريزمگە قارسى كۇرەس كون­ۆەنتسياسى», «شانحاي ىنتى­ماق­تاس­تىق ۇيىمىنا مۇشە ەلدەردىڭ اۋماعىندا تىيىم سالىنعان تەرروريستىك, ەكس­ترە­ميس­تىك جانە سەپاراتيستىك ۇيىمداردىڭ ءتىزىمى», «تەرروريستىك نەمەسە ەكسترە­ميس­تىك ارەكەتى ءۇشىن ىزدەۋ جاريالان­عان­دار­دى ىزدەستىرۋدىڭ بىرەگەي رەەسترى», «بىرلەسكەن وقۋ-جاتتىعۋلارىن وتكىزۋ تۋ­را­لى», «اق­پارات الماسۋ تۋرالى», «جەدەل ىزدەستىرۋ تۋرالى», «قارۋ-جاراق پەن وق-دارىلەردىڭ زاڭسىز اينالىمىنىڭ جولىن كەسۋ تۋ­رالى», «تەرروريزمدى قارجىلان­دىرۋ تۋ­رالى» جانە تاعى دا باسقا قۇجاتتار بار. سونداي-اق, وتكەن جىلدار ىشىندە ان­تيتەررورلىق قۇرىلىم كەڭەسىنىڭ ءما­جىلىستەرىندە قابىلدانعان 200-دەن استام شەشىمدەر دە جۇمىس ىستەۋگە قولايلى جاعداي جاساۋدا. «شانحاي ىنتىماقتاستىق ۇيىمىنا مۇشە مەملەكەتتەردىڭ 2010-2012 جىل­دار­عا ارنالعان تەرروريزممەن, سەپاراتيزممەن جانە ەكسترەميزممەن كۇرەس بوي­ىنشا ىنتىماقتاستىق باعدارلاماسى» دا باسىم باعىتتاردىڭ قاتارىندا. وسىنداي زاڭدىق اكتىلەر بويىنشا ەلىمىزدە ءتيىستى ءىس-شارالار جۇزەگە اسى­رىلۋدا. مىسالى, جوعارعى سوتتىڭ شەشىمىمەن وننان استام تەرروريستىك, ەكس­ترەميستىك ۇيىمداردىڭ ءىس-قيمىلىنا رەسپۋبليكا كولەمىندە تىيىم سالىندى. مۇنداي جۇمىستى ۇيىمنىڭ باسقا مۇشەلەرى دە جۇزەگە اسىرۋدا. زامان اعىمىنا ساي بۇل باعىتتاعى جۇ­مىستار ءالى دە جالعاسا بەرەتىن بولادى. – كەز كەلگەن سالادا ينتەگراتسيا­لىق ۇدەرىستەردىڭ ايتارلىقتاي ورىن الاتىندىعى بەلگىلى. وسى جاعىنان كەل­گەندە ۇقك-نىڭ شەتەلدىك ارناۋلى قىز­مەتتەرمەن ارىپتەستىك قارىم-قاتى­ناس­تارى قانداي دەڭگەيدە؟ – ۇيىم اياسىندا ۇلتتىق قاۋىپسىزدىك كو­ميتەتى بارلىق ارناۋلى قىزمەتتەرمەن ارىپتەستىك بايلانىستار ورناتىپ, ولارمەن ەكىجاقتى, كوپجاقتى كەلىسىمدەر جاسادى. تمد ەلدەرىنىڭ انتيتەررورلىق ورتا­لىقتارىمەن قىزمەتتىك بايلانىس ءوز دەڭ­گەيىندە جۇمىس ىستەپ تۇر. قاۋىپ-قاتەر­لەر­دىڭ الدىن الۋ بويىنشا اقپارات الماسۋ, بىرلەسكەن وپەراتسيالار وتكىزۋ تۇ­راقتى جولعا قويىلعان. بۇدان بولەك, ەگەمەن ەلىمىزدىڭ تى­نىش­تىعىن ساقتاۋدا, سونداي-اق قوعام­دىق-ساياسي سيپاتتاعى, سپورتتىق سالا­دا­عى, باسقا دا ماڭىزدى شارالاردىڭ قاۋىپسىز­دىگىن قام­تاماسىز ەتۋ كەزىندە ءبىر-بىرىنە ارىپتەستىك كومەك كورسەتۋ كەڭىنەن قول­دانىلىپ كەلەدى. ماسەلەن, ەۋروپاداعى قاۋىپسىزدىك جانە ىنتى­ماق­تاستىق ۇيى­مى­نىڭ ءسامميتى, پەكين مەن استانا-الماتى قالالارىندا وتكەن وليم­پيادا جانە قىسقى ازيا ويىن­دا­رى, «شانحاي-ەكسپو» كورمەسى سەكىلدى شارالار كەزىندە جۇزەگە استى. ارناۋلى قىزمەت باسشىلارىمەن جوعارى دەڭگەيدەگى كەزدەسۋلەر تۇراقتى وتۋدە. وندا ماڭىزدى دەگەن ءتۇرلى ماسە­لە­لەر تالقىلانىپ, شەشىمىن تابۋدا. جا­قىندا عانا قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى – قو­عام­دىق قاۋىپسىزدىك مينيسترىمەن بول­عان كەزدەسۋ بارىسىندا ۇيىمنىڭ نەگىزگى باعىت­تارى ءسوز بولدى. ونىڭ ىشىندە ەكى ەلدىڭ قاۋىپسىزدىك ورگاندارى مەن قۇقىق­ قورعاۋ ورگاندارىنىڭ اراسىنداعى ىن­تى­ماق­تاستىقتى ودان ءارى نىعايتۋ, مەملەكەتتىك شە­كارانى كۇزەتۋ, تەرروريزم مەن ەكس­ترە­ميزم قاۋىپ-قاتەرىنە قارسى كۇرەسۋ, حا­لىق­ارالىق ەسىرتكى اينالىمى, زاڭسىز مي­گراتسياعا قاتىستى ماسەلەلەر تالقى­لان­دى. وسىنداي كەزدەسۋلەردى قىرعىز­ستان, رەسەي, تاجىكستان, وزبەكستانداعى قۇزىرلى ورگاندارمەن وتكىزۋ داستۇرگە اينالعان. – شىۇ كولەمىندە شەشىلمەگەن ماسەلەلەر بار دەپ ايتۋعا بولا ما؟ – وتكەن ون جىل ىشىندە كوپتەگەن ءما­سەلەلەردىڭ شەشىلگەندىگىن ايتۋمەن قا­تار, شەشىلمەگەن شارۋالاردىڭ دا بار ەكەندىگىنە توقتالۋعا ءتيىسپىز. بارشاعا بەلگىلى, تەررورلىق اكتىلەر كور­شىلەس ەلدەردە بولىپ جاتىر. قا­زاق­ستان شەكاراسى ولاردان تاياق تاستام جەردە تۇرعاندىعىن ۇمىتپاۋىمىز كەرەك. ءما­سەلەن, سوڭعى ۋاقىتتارداعى ءماس­كەۋ­دىڭ «دومودەدوۆو» اۋەجايىنداعى نەمەسە مينسك قالاسىنىڭ مەتروپوليتەنىندە بول­عان الاپات جارىلىستار ەلدى شو­شىن­دىرعانى راس. بۇعان ىرگەمىزدەگى قىر­عىز­ستان, تاجىكستان ەلدەرىندەگى قايعىلى وقي­عالاردى قوسىڭىز. مىنە, ارنايى قىز­مەتتەر وسى جاعىنا كوبىرەك كوڭىل ءبولىپ, بىرلەسە قىزمەت ەتۋى كەرەك. تەرروريزم, سەپاراتيزم جانە ەكسترە­ميزمنىڭ ترانسۇلتتىق ءتۇر-سيپاتىنىڭ تارالۋىنا بايلانىستى ناقتىلاي شا­رالاردىڭ قاجەتتىلىگى سەزىلىپ وتىر. – شانحاي ىنتىماقتاستىق ۇيى­مى­نىڭ اياسىندا وتكىزىلەتىن وقۋ-جات­تىعۋلاردا قانداي تاسىلدەردىڭ پىسىق­تالاتىندىعى, ولاردىڭ ساپاسى مەن ناتيجەسى تۋرالى ايتىپ وتسەڭىز؟ – شانحاي ىنتىماقتاستىق ۇيى­مى­نىڭ ايماقتىق انتيتەررورلىق قۇر­ى­لى­مى جوسپارلى تۇردە وقۋ-جاتتى­عۋلارىن ۇيىمداستىرىپ كەلەدى. وقۋ-جاتتىعۋلار ۇيىمعا مۇشە ءاربىر ەلدىڭ اۋماعىندا كەزەكتەسىپ وتەدى. وندا نەگىزىنەن ءتيىستى قۇ­رىلىمداردىڭ ءوزارا بىرلەسىپ قي­مىل­داۋى, جەكە قۇرامنىڭ كۇش-قۋات جۇمىل­دىرۋى, اسكەري تەحني­كا­لار­دىڭ پارمەن­دىلىگىن بايقاۋ سەكىلدى تاسىلدەر پىسىقتا­لادى. وتكەن جىلدار ىشىندە ۇيىم شەڭ­بە­رىندە «ۆوستوك-انتيتەررور-2006», «يس­سىك-كۋل-انتيتەررور», «نوراك-انتيتەررور», «ساراتوۆ-انتيتەررور» سەكىلدى وننان استام بىرلەسكەن جات­تىعۋلار ۇيىم­داستى­رىل­دى. «تيان-شان-انتي­تەررور №1» جات­تىعۋى قا­زاق­ستان مەن قىتاي اۋماعىن­دا وتكىزىلدى. ال اسكەري ۆەدومستۆولاردىڭ اراسىندا ءبىز­دىڭ ەلىمىزدە وتكەن «بەيبىت ميسسيا-2010» جات­تىعۋىنا ۇقك ارناۋلى بولىمشەسى قا­تى­سىپ, وزدەرىنىڭ جوعارى دايىندىقتارىن كورسەتتى. وسى جىلدىڭ مامىر ايىندا ۇقك-ءنىڭ وكىلدەرى قى­تاي­دىڭ قاشقار ايماعىنداعى تاۋلى مەكەندە وتكەن «تيان-شان-انتيتەررور №2» بىرلەسكەن وقۋ جاتتىعۋىنا قاتىستى. وقۋ-جاتتىعۋلاردىڭ ساپاسى, ءناتي­جە­سى تۋرالى ايتار بولساق, انتيتەررورلىق قۇرىلىمداردىڭ بىرلەسكەن تۇردە كەز كەلگەن ۋاقىتتا, كەز كەلگەن جەردە تەر­رورشىلارعا سوققى بەرۋگە دايىن ەكەندىكتەرىن بايقاۋعا بولادى. قۇزىرلى ورگاندار ايماقتاعى تىنىشتىقتى, قاۋىپ­سىز­دىكتى قامتاماسىز ەتۋگە كۇشتەرىنىڭ جەتەتىندىگىن دالەلدەپ وتىر. مۇنداي ءىس-شارالاردى الداعى كەزدە دە وتكىزۋ جوسپارلانعان. ول جاعى دۇرىس دەپ سانايمىن. اسكەري مامانداردىڭ «جاتتى­عۋدا قيىن بولسا, ۇرىستا جەڭىل بولادى» دەگەن قاعيداسىن ۇمىت­پاۋىمىز كەرەك. – «كادرلار ءبارىن دە شەشەدى» دەگەن ءسوزدى ەسكە الاتىن بولساق, كەز كەلگەن ءىس­تىڭ جوعارى دەڭگەيدە اتقارىلۋى بىلىكتى ماماندارعا بايلانىستى ەكەندىگى بەلگىلى عوي. – جالپى, كوميتەت جۇيەسىندە قىز­مەت­كە بىلىكتى ماماندار قابىلداۋ, داي­ىنداۋ ماسەلەسى وزىندىك قالىپتاسقان, ەرەكشە جۇيە بويىنشا جۇرگىزىلەدى. شانحاي ىنتىماقتاستىق ۇيىمىنىڭ قۇزىرلى ورگاندارى ءۇشىن ماماندار دايار­لاۋعا ۇقك ۇلكەن كوڭىل بولۋدە. «شان­حاي ىنتىماقتاستىق ۇيىمىنا مۇشە مەم­لەكەتتەردىڭ انتيتەررورلىق قۇ­رىلىم­دارى ءۇشىن ماماندار دايىنداۋ تۋرالى كەلىسىم» نەگىزىندە ءتيىستى ءىس-شا­رالار ات­قا­رىلۋدا. بۇل دەگەنىمىز – ۇي­ىم­نىڭ بولا­شاعىنا, دامۋىنا جاسالىپ وتىر­عان ءۇل­كەن قادام. دايىندىق بارى­سىندا تەرروريزمگە قارسى كۇرەس سالا­سىن­داعى مامان­داردىڭ تەو­ريا­لىق جانە پراكتيكالىق بىلىكتىلىگىن ارت­تى­رۋ, قا­زىر­گى زامانعى تاكتيكالىق تاسىلدەردى مەڭ­گە­رۋ, تاجىريبە الماسۋ جاعى قاراس­تى­رى­لىپ وتىر. قار­جى ماسەلەسى دە بىرلەسە شەشىلەدى. ماماندار ۇيىمعا مۇشە مەملە­كەت­تەردىڭ اسكەري وقۋ ورىن­دارىندا, ارنايى ورتالىقتاردا دايىندالادى. ونىڭ ىشىندە ۇقك اكادەمياسىندا, اسكەري اكادە­ميا­سىندا جانە ارنايى بولىمشەنىڭ وقۋ ور­تا­لىعىندا بىرلەسىپ وقۋ, سەمينار جانە ترەنينگتەر وتكىزۋ سەكىلدى باعدارلامالار بار. الداعى كەزدە دە بۇل باعىتتاعى جۇ­مىس­تى ودان ءارى دامىتۋ باستى نازاردا بولادى. – اڭگىمەڭىزگە راحمەت. قاۋىپسىز­دى­گى­مىز بەرىك بولسا, ەلىمىزدىڭ دە قۋاتتى بو­لا­تىنى داۋسىز. سۇحباتتاسقان ساۋىتبەك ابدراحمانوۆ.