الەمدىك مۋزىكانىڭ ايگىلى ءدۇلد ۇلى – استانادا

قازاقستان حالقىنىڭ بىرلىگى كۇنى ەلورداداعى قازاقستان ورتالىق كونتسەرت زالىندا ونىنشى ماسكەۋ پاسحا فەستيۆالى شەڭبەرىندە سانكت-پەتەربۋرگتەگى ايگىلى ماريا تەاترى­نىڭ سيمفونيالىق وركەسترىنىڭ كەشى ءوتتى. كونتسەرتكە مەملەكەت باسشىسى نۇرسۇلتان نازارباەۆ قاتىسىپ, وركەستردىڭ ونەرىن تاماشالادى. پرەزيدەنت نۇرسۇلتان نازارباەۆ كونتسەرت باستالار الدىندا سيمفونيالىق وركەستردىڭ كور­كەم­دىك جەتەكشىسى ءارى باس ديريجەرى ۆالەري گەرگيەۆكە قازاقستاندىق كادرلاردى دايىنداۋداعى جانە ونىڭ قازاقستانعا دەگەن ءسۇيىس­پەن­شىلىگىنە دەگەن العىسىن ءبىلدىردى. مەملەكەت باسشىسى ودان ءارى ۆالەري گەرگيەۆتىڭ جوعارى دەڭ­گەيدەگى ماراپاتتار مەن كوپ­تەگەن حالىق­ارا­لىق سىيلىق­تار­دىڭ يەگەرى ەكەنىن, ونىڭ 22 جىلدان بەرى ماريا تەا­ترىنىڭ باس ديريجەرى قىزمەتىن ات­قارىپ جۇرگەنىن ايتا كەلىپ, قازاق­ستان ورتالىق كونتسەرت زالىندا قوناقتاردى تانىستىرا كەتتى. «جاڭا استانا­مىز­داعى مۇنداي زال ەۋرازيالىق سۋب­كون­تينەنتتىڭ ەشبىرىندە جوق. يتا­ليا­لىق مىقتى ارحيتەك­تور­لار­دىڭ قاتىسۋىمەن سالىنعان, سىيىم­دىلىعى 3500 ور­ىندى قامتيتىن كونتسەرت زا­لى­نىڭ اكۋس­تيكاسى دا حالىقارالىق ستان­دارتتارعا ساي. الداعى ۋاقىتتا ءسىزدى قازاق ۇلتتىق وپەرا تەا­ترى­نىڭ اشىلۋ راسىمىنە شاقىرامىز. ءسىزدىڭ ۇجىمىڭىز بەن ءبىزدىڭ مۋزى­كانتتاردىڭ دوستىعى ءارى قاراي جاقسى دەڭگەيدە جالعاسىن تابادى دەگەن سەنىمدەمىن», دەي كەلە ۆالەري گەرگيەۆكە قازاق­ستاننىڭ ەڭبەك سىڭىرگەن قايرات­كەرى اتاعىنىڭ بەرىلگەنىن حابارلاپ, وعان ونىڭ توسبەلگىسى مەن كۋالىگىن تاپسىردى. ەسىمى الەمگە تانىمال ديريجەر ۆالەري گەرگيەۆ قازاق ەلىنىڭ جاڭا استاناسىنىڭ سۇلۋلىعى مەن دامۋ قارقىنىنا تاڭدانىسىن جاسىرمادى. بۇل تۋرالى ول ەلوردادا ماريا تەاترى سيمفونيالىق وركەسترىنىڭ كونتسەرتى قارساڭىندا وتكەن ءباسپاسوز ءماسليحاتىندا: «استاناعا كەلگەن ءۇش ساعاتتىڭ ىشىندە مەن ءتىپتى بارلىق تەڭەۋدى ايتا الار ەمەسپىن. قالانىڭ قار­قىندى ءوسۋى مەن دامۋى ەڭ كوركەم سوزدەرمەن عانا باعالانۋعا لاي­ىق­تى», دەسە وسى جيىن ۇستىندە  قا­زاقستان رەسپۋبليكاسىنىڭ مادە­نيەت ءمينيسترى مۇحتار قۇل-مۇ­حاممەد جۋرناليستەر قاۋ­ى­مىن وركەستر ۇجىمىمەن, ونىڭ كوركەم­دىك جەتەكشىسىنىڭ مۋزىكا الەمىن­دەگى ورنىمەن كەڭىرەك تانىستىرا كەلىپ: «ۆالەري گەرگيەۆ –  وسى زا­مان­داعى ۇلى ديري­جەرلەردىڭ ءبىرى. ول ماريا تەاترى سيمفونيالىق وركەسترىنىڭ ديريجەرى عانا ەمەس, الەمدىك مادە­نيەتتىڭ دامۋىنا مول ۇلەس قوسقان تۇلعا», دەپ اتاپ ءوتتى. سونىمەن قاتار, مينيستر قازىرگى تاڭدا الەم­نىڭ كوپتەگەن وپەرا تەاتر­لارى­نىڭ قارجى داعدارىسىنا دۋشار بولىپ وتىرعاندىعىن, ال سانكت-پەتەربۋرگ پەن استانا قا­لا­سىندا وپەرا تەاترلارىنىڭ قۇ­رى­لىسى قارقىندى ءجۇرىپ جات­قاندىعىن دا تىلگە تيەك ەتتى. ۆالەري گەرگيەۆ قازاق­ستان­نىڭ ەڭبەك سىڭىرگەن قايراتكەرى اتا­عىنىڭ وزىنە بەرىلگەنى ءۇشىن ەلباسىنا العىسىن بىلدىرە كەلە: «ءسىزدى العاش كورگەنىمدە مەن جاس ديريجەر بولاتىنمىن. ءبۇ­گىن­دە مىنە, وزىڭىزبەن بەتپە-بەت تانى­سىپ, ءوز قولىڭىزدان وسىناۋ ءمار­تە­بەلى سىيلىقتى الىپ وتىر­عانىما العىسىم شەكسىز. سىزبەن ءالى دە كەزدەسەمىن دەگەن ويدامىن. بارشاڭىزعا دەنساۋلىق, باقىت, تابىس تىلەيمىن!»,  دەدى. فەستيۆال اياسى رەسەيدىڭ 40 قالاسى مەن ليتۆا, ۋكراينا, بەلارۋس رەسپۋبليكاسى جانە قا­زاق­ستاندى دا قامتىعانىن ايتساق,  24 ءساۋىر مەن 9 مامىر ارالىعىنا جوسپارلانعان 16 كۇن ىشىندە 100-دەن اسا كونتسەرتى بەرىلمەك كورى­نەدى. تاعى ءبىر قۋانتارلىعى, اس­تاناداعى كونتسەرتتە رەسەيدىڭ تا­لانتتى ءپيانيسى دەنيس ماتسۋەۆ پەن تانىمال وپەرا انشىلەرى دە ونەر كورسەتتى. كونتسەرت باعدار­لا­ماسىنا ساي بۇل كۇنى جۇرتشىلىق الەمدىك مۋزىكانىڭ ايگىلى شى­عارمالارىن تىڭداعان بولسا, كون­تسەرتتىڭ شىمىلدىعى ر.ششە­درين­نىڭ شى­عارماسىمەن اشىلدى. مۋزىكا الەمىندە ۆالەري گەر­گيەۆ ەسىمىن بىلمەيتىن ادام  كەم­دە-كەم دەسە دە بولادى. ءاري­نە, تەك مۋزىكانتتار قاۋىمى عانا ەمەس, جالپى جۇرتشىلىق تا ونىڭ ءار كونتسەرتىن اسىعا كۇتەدى. تۋما تالانتتىڭ ونەرىنە دەگەن ساعى­نىش تا وسى كەش بارىسىندا اي­قىن بايقالعان بولسا,  ماريا تەاترىنىڭ سيمفونيالىق وركەسترى دە كوپ كوڭىلىنە قارىز بولىپ قالعان جوق. جوعارى كاسىبي شەبەرلىگى مەن ءوز دەڭگەيىن كورەرمەن­دەرگە  العاشقى شىعارماسىنان-اق باي­قاتتى. كوپ­شىلىك قاۋىم جەت­پىسكە جۋىق مۋ­زىكانتتاردى قام­تيتىن وركەستر­دىڭ جاندى داۋ­سىن ەستىپ, عاجايىپ الەمگە ساپار شەك­تى.  ىرگەتاسى سوناۋ ءحVىى عاسىر­دا قا­لانعان تەاتردىڭ سيمفونيالىق وركەسترى, ونىڭ ديريجەرى ۆالەري گەرگيەۆ تۋرالى ايتا بەرسە, ءسوز تاۋسىلمايدى. دارا تالانت يە­سىنىڭ  كەز كەلگەن كونتسەرتى ەرەكشە, ءارى كەز كەلگەنى تاماشا شوۋعا اينالاتىنى الەم تاراپىنان موي­ىندالعان.  ەڭ باستىسى, مۋزى­كا سۇيەر قاۋىم كورنەكتى ديريجەر­دىڭ ءار  كونتسەرتىن اسىعا كۇتەدى. ەلوردادا وتكەن كەشتىڭ دە ەڭ اسەرلى ءساتى فورتەپيانوعا ارنال­عان كونتسەرت بارىسىندا ايقىن­دالا ءتۇستى. مۇندا دەنيس ماتسۋەۆ قالىڭ جۇرتشى­لىققا پيانينو ار­قىلى الەمدىك مۋزىكانىڭ ايگىلى كلاسسيكاسىن تارتۋ ەتتى. كونتسەرت سوڭى ەكاتەرينا سەمەنچۋكتىڭ ورىنداۋىندا ورىس جانە شەتەل كومپوزيتورلارى وپەرا­لارىنىڭ ءۇزىن­دىلەرىمەن اياقتالدى. مۋزى­كانى مادەنيەتتىڭ بيىك شىڭى دەپ بىلەتىن قاۋىم ءۇشىن بۇل كەش ەرەكشە سىي بولدى. ءبىر ايتا كەتەتىن جايت, سيم­فونيالىق وركەستردىڭ كونتسەرتى الماتى قالاسىندا دا ءوتتى. جۇلدىز ءبايدىلدا.