«ەرتەڭ ءبىزدى ناعىز تەكە-تىرەس كۇتىپ تۇر. بۇل ماتچ ادەتتەگىدەي تارتىستى وتەرىنە سەنىمدىمىن. ەكى كوماندا دا جاقسى وينايدى. وقۋ-جاتتىعۋ جيىنى كەزىندەگى ويىنىمىزدى كورسەتە الامىز دەپ ۇمىتتەنەمىن. قانشا دەگەنمەن باستاپقى تۋرلاردا باسقاشا ويناعان ەدىك. الاڭ دا جاڭاردى, بۇل كومبيناتسيالى ويىنىمىزدى كورسەتۋىمىزگە مۇمكىندىك بەرەدى. جىگىتتەر بۇل ماتچتىڭ قانشالىقتى ماڭىزدى ەكەنىن بىلەدى, سوندىقتان ءبارىن سالۋعا دايىن», دەدى ستانيمير ستويلوۆ.
باس باپكەر سونداي-اق, «استانا ارەنانىڭ» جاڭا توسەلگەن گازونى جايلى پىكىر ءبىلدىردى.
«نەگىزى ونى قىسقى ءۇزىلىس كەزىندە دە توسەۋگە بولاتىن ەدى. ال ساپاسى جاتتىعۋ كەزىندە بەلگىلى بولادى. جاڭا گازون توسەلگەننەن كەيىن ۇيرەنۋگە ازداپ ۋاقىت كەرەك. دايىندىق كەزىندە كوماندا ءوزىن جايلى سەزىنەدى دەپ ۇمىتتەنەمىن», دەدى باس باپكەر.
قازىرگى ۋاقىتتا «قايراتتىڭ» باستى ەكى قاقپاشىسى دا جاراقات الىپ قالدى.
«جاراقات – فۋتبولدىڭ ءبىر بولىگى. بۇل ماتچقا ۆلاديمير پلوتنيكوۆ دايىن بولادى دەپ ويلايمىن. بىزدە ەريچ جاراقات الىپ قالدى. «قايرات» ويىنشىلارىنا تەزىرەك ايىعىپ, قاتارعا قوسىلۋىن تىلەيمىن. سەبەبى, ەكى كوماندانىڭ ۇزدىك ويىنشىلارى الاڭعا شىعاتىن بولسا, جانكۇيەرلەر قىزىقتى ماتچتىڭ كۋاسى بولادى», دەدى ستويلوۆ.
تۋرنيرلىك كەستەدە «استانا» ۇپاي سانى بويىنشا كوش باستاپ كەلەدى. بۇل ەلوردالىقتاردىڭ فاۆوريت كوماندا اتانۋىنا مۇمكىندىك بەرە مە؟
«استانا» مەن «قايرات» اراسىندا ەشقاشان فاۆوريت كوماندا بولمايدى. ءبارى ماۋسىم سوڭىندا بەلگىلى بولادى. ازىرگە بۇل بوس اڭگىمە. قازىر موينىمىزعا ۇلكەن جاۋاپكەرشىلىك ارتىلىپ وتىر. ءبارىن جۇيەلى تۇردە جۇزەگە اسىرىپ, جاقسى قىرىنىمىزدان كورىنۋىمىز كەرەك», دەدى «استانانىڭ» باس باپكەرى.
ەلوردالىقتار بىرنەشە ماتچ بويى گول جىبەرمەي كەلەدى. بۇل قورعاۋشىلار اراسىنداعى ۇيلەسىمدىلىكتىڭ ناتيجەسى مە, الدە قاقپاشى الەكساندر موكيننىڭ سەنىمدىلىگىنىڭ ارقاسى ما؟ ستانيمير ستويلوۆ مۇنى قورعانىستا ءجيى روتاتسيا جاساپ تۇراتىنىمەن ءارى كوماندانىڭ جەڭىسكە دەگەن قۇلشىنىسىمەن بايلانىستىردى.
«قورعانىستا ءجيى روتاتسيا جاساپ تۇرامىز. سوندىقتان قورعاۋشىلار اراسىنداعى وڭتايلى ۇيلەسىمدىلىك دەپ ايتۋعا كەلمەس. بىرەر اپتا بۇرىن ءبىرىنشى ليگانىڭ كومانداسىنا ەسە جىبەردىك, مۇنى ەستەن شىعارۋعا بولمايدى. ويىنعا دەگەن نيەتىڭ دۇرىس بولماسا, ەڭ وسال دەگەن قارسىلاستان جەڭىلۋىڭ مۇمكىن. باستىسى – جەڭىسكە دەگەن قۇلشىنىس. «قايراتپەن» وتەر ويىندا ءبارىن اقىلعا سالىپ, ءوزىمىزدىڭ كومبيناتسيالى فۋتبولىمىزدى كورسەتۋىمىز كەرەك. فۋتبولدا كىم وزىنە جوعارى تالاپ قويا بىلسە, سول كوماندانىڭ جەڭىسكە جەتۋ مۇمكىندىگى جوعارى بولادى», دەدى بولگاريالىق مامان.
ستانيمير ستويلوۆ «قايرات» كاپيتانى باۋىرجان يسلامحاندى ەلىمىدەگى ەڭ تالانتتى ويىنشى دەپ اتاپ, جىلى لەبىزدەرىن ءبىلدىردى.
«بۇل فۋتبولشى ماعان ىلعي دا ۇنايتىن. شاماسى, قازاقستانداعى ەڭ تالانتتى ويىنشى بولار. ول ءوزىن ءالى دە دامىتۋى كەرەك. بىراق ونىڭ دەڭگەيىنە ءوز باعاسىن تەك «قايراتتىڭ» باپكەرى بەرۋى كەرەك», دەدى جاتتىقتىرۋشى.
ستانيمير ستويلوۆ قازاقستان پرەمەر-ليگاسىنىڭ توعىز تۋرى وتسە دە, چەمپيوندىق اتاققا «استانا» مەن «قايرات» قانا تالاسادى دەپ ايتۋ ەرتە ەكەنىن ايتتى.
«ەكى كوماندا وزگەلەردەن وق بويى الدا كەلەدى دەپ ويلامايمىن. چەمپيوناتتى بىزدەن بىرنەشە ۇپاي عانا كەم اياقتايتىن كوماندالار بار. بىرىنشىلىكتە كىم از قاتەلىك جىبەرسە, سول ۇجىم چەمپيون اتانادى», دەدى ول.
بولگاريالىق باپكەر بىرىنشىلىكتىڭ جاڭا سحەماسى «استاناعا» ەش قيىندىق تۋدىرمايتىنىن ايتتى.
«شىنى كەرەك, بىزگە ءبارى-ءبىر. وسىعان دەيىن «التىلىق» بولىپ, ۇپايلارىن بولىسەتىن. بۇل كەيبىر كوماندالارعا ۇناماعانى انىق. ءبىز قانداي ءتارتىپ ورناتسا دا جەڭەمىز. كومانداڭ مىقتى بولسا, ۇپاي جيناپ, جەڭىسكە جەتەسىڭ. چەمپيوناتتا جولى بولماعان كوماندالار بۇل سحەما نە ءۇشىن ۇناماعانىن ويلاعانى ءجون», دەپ ءسوزىن قورىتتى «استانانىڭ» باس باپكەرى ستانيمير ستويلوۆ.
ايتا كەتەيىك, «استانا» مەن «قايرات» ەرتەڭ ەلورداداعى «استانا ارەنا» ستاديونىندا كەزدەسەدى. ماتچ استانا ۋاقىتىمەن 20:00-دە باستالادى.
