اۋىر اتلەتيكا
تۇرىكمەنستان استاناسى اشحابادتا اۋىر اتلەتيكادان ازيا چەمپيوناتى ءوتىپ جاتىر. بۇگىنگە دەيىن ءتورت زىلتەمىرشىمىز ونەر كورسەتتى. ءۇش كۇننىڭ قورىتىندىسى بويىنشا, قازاقستان ۇلتتىق قۇراماسىنىڭ قورجىنىندا ء بىر التىن مەدال بار. جالعىز جۇلدەنىڭ يەگەرى – 69 كيلو سالماقتا سىنعا تۇسكەن البەرت ليندەر.
ەندى جارىس تۇعىرىنا تاعى ءۇش قازاقستاندىق سپورتشى شىعادى. ازيا چەمپيوناتى 30 ءساۋىر كۇنى اياقتالادى.
حوككەي
حوككەيدەن قازاقستان ۇلتتىق قۇراماسى كيەۆتە ءوتىپ جاتقان الەم چەمپيوناتىنىڭ ءبىرىنشى ديۆيزيون كوماندالارى اراسىنداعى دوداسىنا قاتىسۋدا. حوككەيشىلەرىمىز وسىعان دەيىن مۇز ايدىندا ءتورت كەزدەسۋ وتكىزىپ, ۇشەۋىندە جەڭىسكە جەتىپ, ءبىر رەت ۇتىلىپ قالدى. ءتورت ويىن قورىتىندىسى بويىنشا, جەرلەستەرىمىز سەگىز ۇپايمەن ءوز توبىندا ەكىنشى ورىندا كەلەدى. توپتاعى سوڭعى ويىندى قازاقستان قۇراماسى بۇگىن ۆەنگريا حوككەيشىلەرىمەن وتكىزەدى.
ايتا كەتەيىك, الەم چەمپيوناتىنىڭ ەليتالىق ديۆيزيونىنا ءوز توبىندا ءبىرىنشى جانە ەكىنشى ورىن العان كوماندالار عانا شىعادى.
فۋتبول
قازاقستان فۋتبول فەدەراتسياسى شىمكەنتتىڭ «ورداباسى» كلۋبىنا ءوز الاڭىندا ويىن وتكىزۋگە شەكتەۋ قويدى. قفف وكىلدەرىنىڭ ايتۋىنشا, قاجىمۇقان مۇڭايتپاسوۆ اتىنداعى ورتالىق ستاديوننىڭ جارىعى فيفا تالاپتارىنا ساي كەلمەيدى.
ەسكە سالساق, قازاقستان فۋتبول فەدەراتسياسى وسىعان دەيىن «اتىراۋ» جانە «اقتوبە» كلۋبتارىنا دا ءوز الاڭىندا ويىن وتكىزۋگە شەكتەۋ قويعان بولاتىن.
بوكس
گەننادي گولوۆكيننىڭ ماۋسىم ايىندا جەكپە-جەك وتكىزبەيتىنى بەلگىلى بولدى. بۇل تۋرالى بوكسشىنىڭ پروموۋتەرى توم لەففلەر مالىمدەدى. ونىڭ ايتۋىنشا, دجەيكوبسقا قارسى جەكپە-جەكتەن كەيىن گولوۆكين ءۇشىن بريتاندىق بوكسشى سوندەرسپەن كەزدەسۋ وتكىزۋگە ۋاقىت تىم ازدىق ەتەدى. سوندىقتان, ول جەكپە-جەكتەن گولوۆكيننىڭ كومانداسى باس تارتقان.
لەففلەر 6 مامىردا وتەتىن الۆارەس («كانەلو») – چاۆەس كەزدەسۋىنىڭ جەڭىمپازى گولوۆكيننىڭ كەلەسى قارسىلاسى بولۋى ىقتيمال ەكەنىن ايتادى.
ازىرلەگەن
ءالي بيتورە,
«ەگەمەن قازاقستان»
