جيىنعا سەمەي, پاۆلودار, وسكەمەن, كۋرچاتوۆ قالالارىنداعى اسكەري بولىمدەردىڭ جاۋىنگەرلەرى قاتىستى. ولار رادياتسيالىق, حيميالىق, بيولوگيالىق قورعانىس ماسەلەلەرى بويىنشا سىنعا ءتۇستى.
– ارينە, دالادا جاتتىعۋ جۇمىستارىن وتكىزۋ وڭاي بولمادى, – دەيدى ۇلتتىق ۇلاننىڭ «شىعىس» وڭىرلىك قولباسشىلىعى ءباسپاسوز قىزمەتىنىڭ جەتەكشىسى باعدات امانگەلدى. – اۋا رايى توسىن مىنەز تانىتسا دا جاۋىنگەرلەر تالاپ ۇدەسىنەن شىعا ءبىلدى. وقۋ باعدارلاماسى تولىق ورىندالدى دەپ ايتا الامىز. دالادا اسكەري قىزمەتكەرلەر اسكەري تەحنيكا مەن قارۋ-جاراقتاردى, جەكە قۇرامدى ءتۇرلى رادياتسيالىق, حيميالىق, بيولوگيالىق قالدىقتاردان تازارتتى. جانە وسىنداي قاۋىپتى زاتتاردىڭ قاي جەردە بار ەكەندىگىن دە انىقتاي الدى.
پوليگونداعى جاتتىعۋ جۇمىستارى اياقتالعان سوڭ, قورىتىندى ەسەپتەرى تاپسىرىلدى. سونداي-اق, قورعانىس مينيسترلىگى «شىعىس» وڭىرلىك قولباسشىلىعىنداعى رادياتسيالىق, حيميالىق, بيولوگيالىق (رحب) قورعانىسى قىزمەتىنىڭ باسشىسى, پولكوۆنيك قايرات تۇرعىنبەكوۆ پەن ۇلتتىق ۇلاننىڭ «شىعىس» ايماقتىق قولباسشىلىعىنداعى رحب قورعانىسى قىزمەتىنىڭ جەتەكشىسى, پودپولكوۆنيك اباي قاسەنوۆ وقۋ-جاتتىعۋ جۇمىستارىنىڭ ناتيجەسى بويىنشا ەستافەتا وتكىزدى.
– مەن ءبىرىنشى رەت رحب قورعانىسى دەگەننىڭ نە ەكەندىگىن تاجىريبە بارىسىندا كوردىم, سەبەبى وسىنداي دالالىق پوليگون جۇمىستارىنا تۇڭعىش رەت قاتىسۋىم, – دەيدى ۇلتتىق ۇلاننىڭ «شىعىس» ايماقتىق قولباسشىلىعىنىڭ 6679 اسكەري بولىمىندەگى رحب قورعانىسى قىزمەتىندە دوزيمەترشى-مامان, قاتارداعى جاۋىنگەر ميراس قاليەۆ. – الداعى ۋاقىتتا وسى ۇلتتىق ۇلان مەن وڭىرلىك قولباسشىلىق بىرىگىپ, ءتۇرلى اپاتتى جاعداي ورىن العان جەرلەر بولسا, سونداي قاۋىپتى ايماقتارداعى رادياتسيالىق, حيميالىق, بيولوگيالىق زياندى زاتتاردى قاۋىپسىزدەندىرىپ, تازارتۋعا مۇمكىندىكتەرى بار دەپ ويلايمىن.
– ءبىزدىڭ وسىنداي جۇمىستارىمىز ماماندارىمىزدىڭ كاسىبيلىگىن ارتتىرۋعا كومەكتەسەدى دەپ ويلايمىز, – دەيدى ۇلتتىق ۇلاننىڭ «شىعىس» ايماقتىق قولباسشىلىعىنداعى رحب قورعانىسى قىزمەتىنىڭ جەتەكشىسى, پودپولكوۆنيك اباي قاسەنوۆ. پوليگونداعى جاتتىعۋلاردىڭ ناتيجەسىندە ۇلتتىق ۇلاننىڭ «شىعىس» وڭىرلىك قولباسشىلىعى ءبىرىنشى ورىندى جەڭىپ الدى.
راۋشان نۇعمانبەكوۆا
سەمەي
