مۇحتار اۋەزوۆتىڭ تۋعانىنا 120 جىل تولۋىنا وراي «اۋەزوۆ وقۋلارى-حV: قازاقستاننىڭ ءۇشىنشى جاڭعىرۋى: جاڭا تۇجىرىمدامالار مەن زاماناۋي شەشىمدەر» تاقىرىبىندا وتكەن حالىقارالىق كونفەرەنتسياعا اقش, ۇلىبريتانيا, گەرمانيا, فرانتسيا, جاپونيا, رەسەي, وڭتۇستىك كورەيا, قىتاي, مالايزيا, تۇركيا سەكىلدى مەملەكەتتەردەن بەلگىلى عالىمدار قاتىستى.
وتاندىق جوعارى ءبىلىمنىڭ ەكسپورتتىق الەۋەتىن ارتتىرۋعا ىقپال ەتەتىن كونفەرەنتسيا بارىسىنداعى پىكىرتالاس الاڭىنان تۋعان وي كوپ. تالابى تالانتىمەن ۇشتاسقان ۇلت ۇرپاعى ءبىلىم الىپ, ءىلىم ۇيرەنگەندە عانا, ەلباسى ماقالاسىندا ايتىلعانداي, وزگەلەرمەن يىق تىرەسەدى. مەملەكەت باسشىسى «بولاشاققا باعدار: رۋحاني جاڭعىرۋ» ماقالاسىندا تاياۋ ونجىلدىق ۋاقىتتا قازىرگى كاسىپتەردىڭ جارتىسى جويىلىپ كەتەتىنىن ەسكەرتتى.
«ەكونوميكانىڭ كاسىپتىك سيپاتى بۇرىن-سوڭدى ەشبىر داۋىردە مۇنشاما جەدەل وزگەرمەگەن. ءبىز بۇگىنگى جاڭا اتاۋلى ەرتەڭ-اق ەسكىگە اينالاتىن, ءجۇرىسى جىلدام داۋىرگە اياق باستىق. بۇل جاعدايدا كاسىبىن نەعۇرلىم قينالماي, جەڭىل وزگەرتۋگە قابىلەتتى, اسا ءبىلىمدار ادامدار عانا تابىسقا جەتەدى. وسىنى بەك تۇسىنگەندىكتەن, ءبىز بىلىمگە بولىنەتىن بيۋدجەت شىعىستارىنىڭ ۇلەسى جونىنەن الەمدەگى ەڭ الدىڭعى قاتارلى ەلدەردىڭ ساناتىنا قوسىلىپ وتىرمىز, دەلىنگەن ەلباسى ەڭبەگىندە. وسى ورايدا, ۋنيۆەرسيتەت ستۋدەنتتەردىڭ ءبىلىم-ءبىلىگىن ارتتىرۋ ءۇشىن شەت ەلدەردەگى ارىپتەستەرمەن تىعىز بايلانىس ورناتىپ, ءبىلىم ساپاسىن حالىقارالىق دارەجەگە كوتەرۋدە. كونفەرەنتسيا ماقساتى دا ءبىلىم ساپاسىن جاقسارتا ءتۇسىپ, ەلباسى ەڭبەگىندە ايتىلعان باسەكەلىك قابىلەتتى ارتتىرۋ», دەيدى م.اۋەزوۆ اتىنداعى ءوڭتۇستىك قازاقستان مەملەكەتتىك ۋنيۆەرسيتەتىنىڭ رەكتورى جۇماحان مىرحالىقوۆ.
ال وڭتۇستىككورەيالىق عالىم, تەحنيكا عىلىمدارىنىڭ دوكتورى كيم حۋاند دون بۇگىنگى زامان اعىمىنا قاراي قۇرىلىس سالاسى دا يننوۆاتسيالىق يگىلىكتەرگە تولى ەكەنىن ايتتى.
«ءبىزدىڭ مۇندا كەلگەندەگى ماقساتىمىز دا سول – سالاداعى زاماناۋي جاڭالىقتارمەن ءبولىسۋ. بۇل ءبىلىم ورداسىنىڭ وقىتۋشىلار مەن ستۋدەنتتەرى ءبىزدىڭ ەلگە ءجيى كەلەدى. ءبىلگەنىمىزبەن ءبولىسىپ ءجۇرمىز. عىلىم مەن بىلىمدەگى جاڭاشىلدىقتى جاريا ەتۋدەن جالىقپايمىز», دەيدى عالىم.
م.ۆ.لومونوسوۆ اتىنداعى ءماسكەۋ مەملەكەتتىك ۋنيۆەرسيتەتىندە كوپتەگەن قازاق جاستارى ءبىلىم الۋدا. كونفەرەنتسياعا ءوزىنىڭ عىلىمي ەڭبەكتەرىن الا كەلگەن ۋنيۆەرسيتەت قىزمەتكەرى, پروفەسسور ولگا ماليكوۆانىڭ ايتۋىنشا, قازاقستاننىڭ سوڭعى ۋاقىتتاعى جەتىستىكتەرى, اسىرەسە, سىرتتان قاراعان جانعا ايقىن سەزىلەدى. سونداي-اق, عالىم ءوندىرىس سالاسى قارقىن العان قازاقستاندا شيكىزات قورى مول ەكەنىن, ونى ءوندىرۋ جاعىنان بىلىكتى مامان دايارلاۋدى دا قولعا الىپ, بۇگىندە مول جەتىستىككە قول جەتكىزىلگەنىن اتاپ ءوتتى.
ەكسپو-2017 حالىقارالىق كورمەسىن وتكىزۋ اياسىندا جاڭارتىلعان ەنەرگەتيكا, ەنەرگيا ساقتاۋشى تەحنولوگيالار مەن رەسۋرستار; تىرشىلىك قاۋىپسىزدىگى جانە قورشاعان ورتانى قورعاۋ, «قازاقستاننىڭ ءۇشىنشى جاڭعىرۋى» اياسىندا ءوندىرىستى اۆتوماتتاندىرۋ مەن IT-تەحنولوگيالاردى دامىتۋ, ءۇشتىلدىلىك جالپىۇلتتىق ىلگەرىلەۋ, باسەكەگە قابىلەتتى تۇلعانى ءتاربيەلەۋ مەن دامىتۋداعى سپورتتىق-ساۋىقتىرۋ اسپەكتىلەرى سىندى بىرنەشە باعىتتار بويىنشا سەكتسيالىق جۇمىستار جۇرگىزىلگەن كونفەرەنتسيا بارىسىندا ەلباسى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن جۇزەگە اسىرۋدىڭ وزەكتى ماسەلەلەرى تالقىلاندى.
سادىبەك بەيسەنباەۆ,
پەداگوگيكا عىلىمدارىنىڭ دوكتورى
شىمكەنت
