بۇگىنگى تاڭدا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ «ءماڭگىلىك ەل» جالپىۇلتتىق يدەياسى ىنتىماققا شاقىرىپ, ءمادەنيەتى باي, ءداستۇرى كوركەم دالا ءوركەنيەتىنىڭ داڭقىن پاش ەتتى. بۇل ءبارىمىزدى تەك العا ۇمتىلدىرادى, باقىتتى بولاشاققا باستايدى.
ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» ماقالاسى الدىڭعى باعدارلامالىق قۇجاتتاردىڭ زاڭدى جالعاسى بولدى. ىسكە اسقان رەفورمالاردىڭ ارقاسىندا عاسىرلار بويعى مادەني قازىنانى بويىنا جيعان قازاقستان جاڭا سيپات, جاڭا كەلبەتپەن بۇكىل الەمگە ەسىك اشقانىن ماقتانىشپەن ايتۋعا ءتيىسپىز.
ماقالادا ادام ءمۇمكىندىكتەرىنىڭ ءباسەكەگە قابىلەتى, سانالى پراگماتيزم, ۇلتتىق ءبىرەگەيلىكتى ساقتاۋ, ءبىلىمنىڭ سالتانات قۇرۋى, ەلىمىزدىڭ ەۆوليۋتسيالىق دامۋى, كەلەشەك الەمدەگى سانانىڭ اشىقتىعى سەكىلدى باسىمدىقتار ءبىزدىڭ حالقىمىزعا باستى باعداردى قالتقىسىز تاڭداۋعا ءمۇمكىندىك بەرەدى. ال بۇلاردى مەملەكەت باسشىسى ءتۇسىندىرىپ قانا قويماي, تاياۋ جىلدارداعى كۇن ءتارتىبىن دە بەلگىلەپ بەرىپ وتىر. قازىرگى جىلدام ءوزگەرەتىن اۋمالى-توكپەلى زاماندا ءدال ءارى ناقتى ايقىندالعان باسىمدىقتار اداستىرماي, باستى باعىتتان اۋىتقىتپاي, ەڭ باستىسى, ۇلتتىق بىرەگەيلىك قالپىمىزدى جوعالتپاي العا ىلگەرىلەۋىمىزگە ىقپال ەتەتىنى انىق.
ۇلى اباي اتامىز:
ساۋلەڭ بولسا كەۋدەڭدە,
مىنا سوزگە كوڭىل ءبول, –
دەمەكشى, كوزى اشىق, كوكىرەگى وياۋ جانداردىڭ الداعى كۇندەردىڭ سىناقتارىنا قانشالىقتى دايىن بولۋى ولاردىڭ باسەكەگە قابىلەتىنە ءتىكەلەي بايلانىستى. سوندىقتان, ەلباسىنىڭ بۇل ماقالاسى ءاربىر وتانداسىمىزدان قولداۋ تابادى دەپ سەنەمىن.
نۇرلان قىلىشباەۆ,
پارلامەنت سەناتىنىڭ دەپۋتاتى
