ونىڭ ناقتى ءبىر مىسالىنا قازاقستان حالقى اسسامبلەياسىن اتاۋعا بولادى. بۇگىندە بۇل قۇرىلىم شەتەلدىك قاۋىمداستىقتار تاراپىنان ساياسي جاڭاشىلدىق رەتىندە مويىندالىپ, بىرەگەي ينستيتۋتقا اينالدى. ءبىر شاڭىراق استىندا تۇراتىن ەتنوستاردى ورتاق ماقساتقا جۇمىلدىرىپ, ەتنوسارالىق, كونفەسسياارالىق كەلىسىمنىڭ قۋاتتى قۇرالى رەتىندە ەل دامۋىنا ولشەۋسىز ۇلەس قوسىپ كەلە جاتقانى تالاسسىز شىندىق.
ەلباسى ن.نازارباەۆ ەلىمىز تاۋەلسىزدىگىنىڭ العاشقى جىلىن مەرەكەلەۋ قارساڭىندا قازاقستان حالقىنىڭ فورۋمىن وتكىزۋ جونىندە ۇسىنىس جاساعانى ەسىمىزدە. وسى القالى جيىندا پرەزيدەنت جاڭا قوعامدىق ينستيتۋت قۇرۋ يدەياسىن العا تارتقانىن دا ۇمىتا قويعان جوقپىز. باستاپقىدا كەڭەسشى ورگان رەتىندە سانالسا, كەيىن اسسامبلەيا قىزمەتى اتا زاڭىمىزعا نەگىزدەلىپ, قۇقىقتىق مارتەبەسى كەڭىدى. سودان بەرگى ارالىقتا بەيبىتشىلىك پەن رۋحاني كەلىسىم باعىتىندا كوپتەگەن كەلەلى ىستەر تىندىرىلدى. ۇلتتىق-مادەني ورتالىقتاردىڭ, ەتنوستاردىڭ مۇددەسىن ءبىلدىرىپ, سىندارلى ۇندەسۋلەردى قامتاماسىز ەتىپ كەلەدى. ءومىرلىك ماڭىزى زور الەۋمەتتىك ماسەلەلەرگە دە بەلسەندىلىكپەن ارالاسىپ, شەشىلۋىنە ىقپال جاسايدى. جۇرتشىلىقتىڭ مۇڭ-مۇقتاجدارىنا قۇلاق اسىپ, قوعامدىق قابىلداۋلار ۇيىمداستىرادى. ءتۇرلى دەڭگەيلەردە وتەتىن كەزدەسۋلەردە, باسقوسۋلاردا ەل تىنىشتىعى, شاڭىراقتىڭ بەرىكتىگى ءبىرىنشى كەزەكتە ەسكەرىلىپ وتىرادى.
جەرگىلىكتى جەرلەردە دە اسسامبلەيا مۇشەلەرى مەن ەتنومادەني بىرلەستىك وكىلدەرىنىڭ ءوزارا ىنتىماقتاستىعى ارقاسىندا ۇلتارالىق كەلىسىمگە جەتۋدىڭ ۇيلەسىمدى دە سىندارلى جولدارى ۇتىمدى شەشىلگەن. ۇلتتىق ءتىلدى, مادەنيەتتى دامىتۋعا, كوتەرۋگە باعىتتالعان شارالار سان-سالالى. وسكەلەڭ ۇرپاق بويىندا قازاقستاندىق پاتريوتيزم ۇلگىلەرىن ۇيالاتۋ, داستۇرلەردى جاڭعىرتۋ, وزىق قۇندىلىقتاردى ساقتاۋ ماسەلەلەرىنە ءجىتى كوڭىل بولىنگەن. وبلىستىق قازاقستان حالقى اسسامبلەياسىنىڭ باستاماسىمەن ۇلتتىق جاڭعىرۋ مەكتەبى اشىلىپ, نەمىس, ارميان, پولياك, تاتار, كورەي, چەشەن, ازەربايجان, ۋكراين, ەۆرەي, بەلورۋس بولىمشەلەرىندە 200-دەن استام بالا وقيدى. ەتنوستىق ۇيىمدار ءتۇرلى مەرەكەلەر شەڭبەرىندە مازمۇندى باعدارلامالار ۇسىنىلىپ, ءداستۇرلى دوستىق, ازاماتتىق تاتۋلىق دارىپتەلەدى. تۇرمىسى تومەن وتباسىلار مەن از قامتىلعان جاندار ءۇشىن قايىرىمدىلىق اكتسيالارى جۇيەلى ۇيىمداستىرىلادى.
ستۋدەنت-جاستاردى بەيبىتشىلىك پەن رۋحاني كەلىسىم رۋحىندا تاربيەلەۋ ماقساتىمەن م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى جانىندا قازاقستان حالقى اسسامبلەياسىنىڭ كافەدراسى قۇرىلىپ, جۇمىس ىستەپ كەلە جاتقانىنا ءۇشىنشى جىلعا اياق باستى. كافەدرانىڭ نەگىزگى مىندەتى – جاس ۇرپاقتى ءدىني ساۋاتتىلىققا, جوعارى ادامگەرشىلىك قاسيەتتەرگە باۋلىپ, شىعارماشىلىق قابىلەتتەرىن دامىتۋ. پروفەسسورلىق-وقىتۋشىلار قۇرامىنان جانە قوعامدىق ۇيىمدار وكىلدەرىنەن قۇرالعان عىلىمي-ادىستەمەلىك بىرلەستىك ەتنوسارالىق ماسەلەلەرمەن شۇعىلدانادى. ادىستەمەلىك قۇرالدار جاسالىپ, وقۋ ۇدەرىسىنە ەنگىزىلدى. ستۋدەنتتەرگە «ەتنوستىق-كونفەسسياارالىق كەلىسىمنىڭ قازاقستاندىق مودەلى» جانە «ءدىنتانۋ» كۋرستارى وقىتىلادى. ەندى «ماڭگىلىك ەل – ءبىزدىڭ قۇندىلىعىمىز» اتتى ءپان ازىرلەنۋدە. «مەنىڭ سان قىرلى قازاقستانىم» فوتوسۋرەتتەر ونلاين-سايىسىنا, «ءبىر مەملەكەت – ءبىر وتباسى», «قازاقستانعا قالاي تاپ بولدىم؟», «پاتريوت دەگەن...», «تەگى ءارتۇرلى – تەڭدىگى ءبىر», «تاۋەلسىزدىك تۇعىرى» اتتى ەسسەلەر, «مەنىڭ وتانىم – قازاقستان» اتتى جوبالار بايقاۋىنا قاتىسۋشىلار شوعىرى قالىڭ بولدى.
ستۋدەنتتەردىڭ ساياسي, مادەني ءومىرىندە قازاقستان حالقى اسسامبلەياسى كافەدراسىنىڭ الاتىن ورنى ەرەكشە. الداعى كەزەڭگە جوسپارلاپ وتىرعان شارالار از ەمەس. مۇنىڭ ءبارى قوعامدى توپتاستىرۋعا, ەتنوكونفەسسيالىق قاتىناستاردى ۇيلەستىرۋگە, ۇلتارالىق كەلىسىمدى نىعايتۋعا باعىتتالا بەرەتىن بولادى.
ليۋدميلا گريۆەننايا,
م.قوزىباەۆ اتىنداعى سقمۋ جانىنداعى قازاقستان حالقى اسسامبلەياسى كافەدراسىنىڭ مەڭگەرۋشىسى
سولتۇستىك قازاقستان وبلىسى
