ايتا كەتسەك, مەكتەپ تۇلەكتەرىنە تەگىن ءبىلىم, ياعني گرانت ۇتىپ الۋعا مۇمكىندىك بەرەتىن, سونداي-اق, دارىندى وقۋشىلاردى قولداۋ ماقساتىندا بيىل التىنشى رەت ۇيىمداستىرىلىپ وتىرعان ى.التىنسارين وليمپياداسى 3 ناۋرىز كۇنى ءبىلىم باسقارمالارىمەن, اۋداندىق ءبىلىم بولىمدەرىمەن بىرلەسە وتىرىپ رەسپۋبليكامىزدىڭ بىرقاتار وبلىستارىندا, ال 17 ناۋرىز كۇنى العاش رەت حالىقارالىق دەڭگەيدە وزبەكستان, قىرعىزستان, مونعوليا ەلدەرىندە وتكىزىلگەن ەدى.
ەلىمىزدە وتكەن اتالمىش بايقاۋ قازاق ءتىلى مەن ادەبيەتى, ورىس ءتىلى مەن ادەبيەتى, اعىلشىن ءتىلى, فيزيكا, بيولوگيا, گەوگرافيا, تاريح, حيميا جانە مەتەماتيكا پاندەرى بويىنشا وتكىزىلسە, شەتەلدىك تالاپكەرلەر قازاق تىلىنەن تەست تاپسىرۋ, ەسسە جازۋ جانە مانەرلەپ وقۋ بويىنشا 3 كەزەڭنەن تۇراتىن سىننان ءوتىپ, باقتارىن سىنادى. ەڭ جوعارعى كورسەتكىشى 100 باللدىق ءبىلىم سايىسى 2012 جىلدان بەرى قىزدار ۋنيۆەرسيتەتىنىڭ باسشىسى دينار نوكەتاەۆانىڭ باستاماسىمەن وتكىزىلىپ كەلەدى.
بيىلعى «ى.التىنسارين-2017» پاندىك وليمپياداسىنا ەلىمىزدىڭ بارلىق وبلىستارىنان 4000-عا جۋىق وقۋشى قاتىسسا, شەت ەلدەردە وتكەن ءبىلىم سىناعىنا 500-دەن استام مەكتەپ وقۋشىلارى قاتىسقان.
وليمپيادا قورىتىندىسى بويىنشا شەت ەلدە وتكەن ءبىلىم سايىسىندا 22 وقۋشى, رەسپۋبليكا بويىنشا 27 وقۋشى جەڭىمپاز اتاندى. ەلىمىزدەگى وليمپيادا دەڭگەيىنەن وتكەن 1253 قاتىسۋشى قىزدار پەداگوگيكالىق ۋنيۆەرسيتەتىنىڭ وقۋ تولەماقىسىنا جەڭىلدىك بەرەتىن ارنايى سەرتيفيكاتتارمەن ماراپاتتالدى. اتالمىش سەرتيفيكاتقا شەتەلدىك 136 مەكتەپ ءبىتىرۋشى يە بولدى.
سالتاناتتى ماراپاتتاۋ راسىمىنە ۋنيۆەرسيتەت باسشىلىعىمەن قاتار, ەلىمىزدەگى وليمپيادا جۇلدەگەرلەرى, وزبەكستان, قىرعىزستان, مونعوليانىڭ جەڭىمپاز اتانعان وقۋشىلارى مەن ولاردىڭ اتا-انالارى, ۇستازدارى قاتىستى. العاش رەت حالىقارالىق دەڭگەيدە وتكەن وليمپيادا جەڭىمپازدارىن ماراپاتتاۋ قۇرمەتى ەلىمىزگە بەلگىلى قوعام قايراتكەرى مۇرات ابەنوۆكە بەرىلدى.
«كوپ جىلدىق تاريحى بار, بەدەلى بار ايرىقشا وقۋ ورنىنىڭ بۇل وليمپيادانى وتكىزۋى ۇلكەن ماڭىزعا يە. ەلىمىزدەگى پەداگوگيكا سالاسىن دامىتۋ, ونىڭ ىشىندە ءار ءپان بويىنشا جاقسى ماماندار دايىنداۋ, بارلىق كەزدە بار جاعىنان الدىڭعى قاتاردا بولۋ كەز-كەلگەن وقۋ ورنىنىڭ قولىنان كەلە بەرمەيدى. 60 مىڭنان اسا پەداگوگتاردى دايىنداپ شىعارعان كيەلى شاڭىراق – قىزدار ۋنيۆەرسيتەتى ۇلتتىق رەيتينگ بويىنشا پەداگوگيكالىق جوعارى وقۋ ورىندارى اراسىندا 1 ورىنعا يە بولىپ قانا قويماي, QS Stars University Ratings حالىقارالىق رەيتينگىسى بويىنشا ءۇش جۇلدىزدى تۇڭعىش قازاقستاندىق پەداگوگيكالىق ۋنيۆەرسيتەت اتانىپ وتىر. «ۇستازدار ۇستاحاناسى» سانالاتىن قىزدار ۋنيۆەرسيتەتىنىڭ قازاق قىزدارىنا شەت ەلدە ءبىلىم الۋعا مۇمكىندىك بەرەتىن قوسديپلومدى ءبىلىم بەرۋ باعدارلاماسىنىڭ ەنگىزىلگەنى قۋانتتى. بۇل وليمپيادانىڭ قازاقستاندا عانا ەمەس, حالىقارالىق دەڭگەيدە ءوتۋى جاستارعا بەرىلگەن ۇلكەن مۇمكىندىك», – دەدى مۇرات ابەنوۆ.
شارا بارىسىندا «Talent Management Centre» جشس باس ديرەكتورىنىڭ ءبىرىنشى ورىنباسارى ديدار بولتاەۆ, وزبەكستان رەسپۋبليكاسىنىڭ قازاق مادەني ورتالىعى, ءبىلىم جانە عىلىم دەپارتامەنتى توراعاسىنىڭ ورىنباسارى كلارا سادىرباەۆا, مونعوليا رەسپۋبليكاسى بايان-ولگي ايماعى ءبىلىم, مادەنيەت, ونەر باسقارماسىنىڭ قازاق ءتىلى مامانى اسەمگۇل يبراگيمقىزى جانە وزگە دە قوناقتار ءسوز سويلەپ, شەتەلدىك قانداس قىزدارىمىزعا بەرىلىپ وتىرعان ۇلكەن مۇمكىندىكتەر ءۇشىن وقۋ ورنىنىڭ باسشىلىعىنا ريزاشىلىقتارىن ءبىلدىردى.
«ەكى ەل اراسىنداعى دوستىق قارىم-قاتىناستى نىعايتۋدا مادەنيەت, سپورتپەن قاتار, ءبىلىم سالاسىنداعى ىنتىماقتاستىق شارالارىنىڭ دا ورنى ەرەكشە. ءبىز شەتەلدەگى اعايىنداردىڭ بالالارىن دا سىرت قالدىرماي, ءوز وتاندارىندا ءبىلىم الۋعا مۇمكىندىك بەرىپ وتىعان قىزدار ۋنيۆەرسيتەتى باسشىلىعىنا شەكسىز العىسىمىزدى بىلدىرەمىز», – دەدى وزبەكستاندىق قوناق كلارا سادىرباەۆا.
وزبەكستان رەسپۋبليكاسى بويىنشا ءبىرىنشى ورىن جەڭىمپازى مەرۋەرت پەرنەەۆا مەن موڭعوليا رەسپۋبليكاسى بويىنشا ءبىرىنشى ورىن يەگەرى, بايان ولگي ايماعى, رۋحانيات مەكتەبىنىڭ 12 سىنىپ وقۋشىسى جۇزىك تولەۋحان تەبىرەنە ءسوز سويلەپ, قۋانىشتارىن جىر جولدارىمەن جەتكىزىپ, ارناۋ ولەڭدەرىن وقىپ بەردى.
شارا اياسىندا قوناقتار ۋنيۆەرسيتەت كامپۋستارىن, كىتاپحانا مەن سپورت كەشەندەرىن ارالاپ, ءار ماماندىق تۋرالى تولىق ماعلۇمات, ۇسىنىلاتىن جەڭىلدىكتەرى تۋرالى اقپاراتتار الدى.
ميرا بايبەك,
«ەگەمەن قازاقستان»
الماتى
