الداعى ۋاقىتتا فرانتسيانىڭ ءتىزگىنىن كىم ۇستاۋى مۇمكىن؟ بۇل ماسەلە قازاقستاندىقتاردى دا بەلگىلى ءبىر دەڭگەيدە قىزىقتىراتىنى ءسوزسىز. ويتكەنى, فرانتسيا − قازاقستاننىڭ سەنىمدى سەرىكتەسى. ەكى ەل اراسىنداعى ءتۇرلى سالالار بويىنشا ىنتىماقتاستىق ءوز دەڭگەيىندە جولعا قويىلعان. اسىرەسە, ەكىجاقتى ساۋدا-ەكونوميكالىق بايلانىستاردىڭ ءجونى بولەك. ناقتىلاي ايتساق, فرانتسيا قازاقستاننىڭ ساۋدا ارىپتەستەرى اراسىنداعى العاشقى بەستىكتىڭ ىشىندە. مىنە, بۇل جايت فرانتسيانى الداعى بەس جىلدا كىم باسقاراتىنى ءبىز ءۇشىن ماڭىزدى ەكەنىن كورسەتەدى.
باستاپقىدا فرانتسيادا پرەزيدەنتتىكتەن ۇمىتكەر رەتىندە 50-گە جۋىق تۇلعا ءتىركەلگەن بولاتىن. بۇگىندە ولاردىڭ اراسىنان اتتوبەلىندەي از عانا توپ سۋىرىلىپ شىعىپ, ءوزارا باقتالاسىپ, ساياسي ناۋقاندى قىزدىرىپ وتىر. ولار: «ۇلتتىق مايدان» پارتياسىنىڭ جەتەكشىسى مارين لە پەن, بۇرىنعى ەكونوميكا ءمينيسترى ەممانۋەل ماكرون, ەكس-پرەمەر-مينيستر, رەسپۋبليكاشىل فرانسۋا فيون, سوتسياليستىك پارتيا وكىلى بەنۋا امون جانە «باس يمەيتىن فرانتسيا» قوزعالىسىنىڭ باسشىسى جان-ليۋك مەلانشون.
العاشقىدا ساراپشىلاردىڭ باسىم بولىگى پرەزيدەنتتىك سايلاۋدىڭ ەكىنشى تۋرىنا فرانسۋا فيون مەن مارين لە پەن وتەدى, ناتيجەسىندە 70 پايىزعا جۋىق كورسەتكىشپەن فرانسۋا فيون جەڭىسكە جەتەدى دەگەن بولجام ايتقان. ءبىراق, ناۋقان بارىسىندا فرانسۋا فييونعا قاراعاندا ەممانۋەل ماكروننىڭ سالماعى ارتا ءتۇسىپ, الگى بولجام ءوزىنىڭ ماڭىزىن جوعالتىپ العانداي.
ساياسي ناۋقان بارىسىندا جۇرگىزىلگەن الەۋمەتتىك سۇراۋ سالۋ ناتيجەلەرى باستى تارتىس ەممانۋەل ماكرون مەن مارين لە پەن اراسىندا وتەتىنىن مەڭزەيتىندەي. ءويتكەنى, ناۋرىز ايىنىڭ سوڭعى اپتاسى مەن بۇگىنگە دەيىنگى ارالىقتاعى الەۋمەتتىك ساۋالدامالار ناتيجەلەرى اتالعان ەكەۋدىڭ كوش باستاپ كەلە جاتقانىن كورسەتىپ تۇر. ماسەلەن, بيىلعى 25 ناۋرىزداعى ساۋالداما بويىنشا ءبىرىنشى ورىنعا ەممانۋەل ماكرون (26%), ەكىنشى ورىنعا مارين لە پەن (25%), ءۇشىنشى ورىنعا فرانسۋا فيون (17%), ءتورتىنشى ورىنعا جان-ليۋك مەلانشون (14%), بەسىنشى ورىنعا بەنۋا امون (11,5%) جايعاسقان بولاتىن. بۇل جەردە كوڭىل اۋدارار جايت, ءدال وسى كورسەتكىش بۇگىنگە دەيىن بالەندەي وزگەرە قويعان جوق – ەممانۋەل ماكرون (24%), مارين لە پەن (23%), فرانسۋا فيون (19,5%), جان-ليۋك مەلانشون (18%) جانە بەنۋا امون (8%) بۇعان دەيىنگى ورىندارىن ساقتاپ تۇر. دەمەك, بۇل كورسەتكىشتەر باستى ساياسي سايىس كىمدەردىڭ اراسىندا وتەتىنىن ايعاقتايتىنداي.
سوڭعى كۇندەرى فرانتسيا مازاسىز كۇندەردى باسىنان كەشىرۋدە. دالىرەگى, پرەزيدەنتتىكتەن ۇمىتكەر تۇلعالارعا قارسى شەرۋلەر ۇيىمداستىرىلۋدا. مۇنداي جاعىمسىز كورىنىستەردىڭ ورىن الۋىنا پرەزيدەنتكە كانديداتتاردىڭ اشىق ءارى باتىل جەتكىزگەن كەيبىر مالىمدەمەلەرى سەبەپ بولدى. اسىرەسە, «ۇلتتىق مايدان» پارتياسىنىڭ جەتەكشىسى مارين لە پەننىڭ سوزدەرى تالايلاردى ءارى-ءسارى كۇيگە ءتۇسىردى.
تاراتا ايتار بولساق, جاقىندا پاريجدە جۇرتشىلىق الدىندا ءسوز ءسويلەگەن مارين لە پەن ەلدىڭ شەكاراسىن شەگەندەۋگە ۋادە بەردى. ال فرانتسيا شەكاراسىنىڭ شەگەندەلۋى ەلدى بۇگىنگى باعىتىنان باس تارتۋعا يتەرمەلەيتىنى ءسوزسىز. ەلگە اعىلعان بوسقىندار ءنوپىرىن ازايتىپ, ەۋروينتەگراتسياعا قارسى ساياسات ۇستاناتىن «ۇلتتىق مايدان» پارتياسىنىڭ جەتەكشىسى بيلىككە كەلسە, جەرگىلىكتى تۇرعىندار مەن بوسقىنداردىڭ قۇقىعى شەكتەلۋى مۇمكىن, دەپ دابىل قاعىپ جاتقانداردىڭ قاتارى قالىڭ. سوڭعى كۇندەرى پاريجدە ورىن العان شەرۋدى تاپ وسى توپتاعىلار ۇيىمداستىردى. ەرەۋىل ءا دەگەندە بەيبىت تۇردە باستالعان ەدى. ءبىراق, جيىلعان جۇرتشىلىق ءتارتىپ ساقشىلارىنا پيروتەحنيكالىق زاتتار مەن وت تۇتاناتىن بوتەلكەلەر لاقتىرعان, سونىڭ سالدارىنان پوليتسەيلەر لاجسىزدان كوزدەن جاس اعىزاتىن گاز قولدانعان.
جالپى, فرانتسيا بيلىگى مارين لە پەننىڭ پرەزيدەنتتىك سايلاۋدا جەڭىسكە جەتۋىن قۇپتاپ وتىرعان جوق. ويتكەنى, ونىڭ سايلاۋالدى باعدارلاماسى بۇگىنگى فرانتسيانىڭ دامۋ باعىتىنا كەرەعار كەلەدى. مارين لە پەن فرانتسياعا ەۋرووداقتان شىعۋ قاجەتتىگىن, ەلدىڭ ءوز ۆاليۋتاسى بولعانى ءجون ەكەنىن ايتۋدا. سونداي-اق, ول رەسەيمەن وڭتايلى قارىم-قاتىناس ورناتۋدى جاقتايدى. ال بۇل پىكىرلەردىڭ فرانتسيا بيلىگىنە ۇناي قويماسى انىق.
قازىرگى تاڭدا ۇلتشىلدار ليدەرىنىڭ رەيتينگى جوعارى. ساراپشىلاردىڭ پىكىرىنە قاراعاندا, ولار سوڭعى 30 جىلدان بەرى مۇنداي جەتىستىككە ماڭايلاي الماعان. دەمەك, بۇل جاعداي فرانتسۋز ۇلتىنا تىكەلەي قاتىستى ماسەلەلەردىڭ قوردالانىپ قالعانىن, ولاردىڭ وڭتايلى شەشىلۋىن قالايتىندار قاتارىنىڭ مول ەكەنىن بىلدىرەدى.
سونىمەن, 23 ءساۋىر كۇنى فرانتسيادا پرەزيدەنتتىك سايلاۋ وتەدى. ەگەر سول كۇنى كانديداتتاردىڭ ەشقايسىسى 50 پايىزدان ارتىق داۋىس جيناي الماسا, 7 مامىرعا سايلاۋدىڭ ەكىنشى كەزەڭى جوسپارلانعان.
