ەلباسى قازاقستاننىڭ جاھاندىق باسەكەگە قابىلەتتىلىگىن دامىتۋدى كوزدەيتىن مىندەتتەردىڭ اۋقىمدى ەكەندىگىن ايتتى.
قازاقستان پرەزيدەنتى تاۋەلسىزدىك جىلدارىندا ماڭعىستاۋدىڭ ەل ونەركاسىبىندەگى ۇلەسىنىڭ ارتقانىنا توقتالدى.
– وتكەن جىلداردا ماڭعىستاۋ وبلىسىنىڭ ەكونوميكاسى ايتارلىقتاي ءوستى. تاۋەلسىزدىك العان كەزدەن باستاپ وڭىرلىك جالپى ءونىم 32 ەسە كوبەيىپ, 2 تريلليون تەڭگەدەن استى. 7 ميلليون شارشى مەتر تۇرعىن ءۇي سالىندى. 2016 جىلى وڭىرگە تارتىلعان ينۆەستيتسيا 400 ميلليارد تەڭگە بولدى. بۇل – 2000 جىلمەن سالىستىرعاندا 12 ەسە ارتىق, – دەدى نۇرسۇلتان نازارباەۆ.
مەملەكەت باسشىسى ماڭعىستاۋ وبلىسىنىڭ ەلەۋلى ەنەرگەتيكالىق, ونەركاسىپتىك جانە كولىك-لوگيستيكالىق الەۋەتى بار ەكەنىن ايتتى.
– ەۋرازيانىڭ ءدال ورتاسىندا ورنالاسقان قازاقستان ءاردايىم قۇرلىقتاعى ەل بولىپ سانالىپ كەلدى. بۇگىنگى تاڭدا ءبىز قۇرلىق اۋقىمىمەن شەكتەلىپ قالماي, توماعا-تۇيىقتىق شەڭبەرىن بۇزدىق. اقتاۋدا زاماناۋي تەڭىز پورتىن سالدىق, بەينەلەپ ايتقاندا, «جولسىز جەردەن جول اشتىق», – دەدى ەلباسى.
سونداي-اق, قازاقستان پرەزيدەنتى جۇيەلى دامۋدىڭ جارقىن مىسالى رەتىندە «اقتاۋ تەڭىز پورتى» ارنايى ەكونوميكالىق ايماعىن اتاپ ءوتتى.
نۇرسۇلتان نازارباەۆ شەكارا ماڭىنداعى ىنتىماقتاستىقتىڭ ماڭىزى الەۋەتىن پايدالانۋ قاجەتتىگىنە توقتالدى.
– قازاقستان ءاردايىم كورشىلەس ەلدەرمەن دوستىق قارىم-قاتىناس ورناتىپ كەلەدى. كەشە عانا مەن ازەربايجاندا بولدىم. بۇل ەلمەن ىنتىماقتاستىقتى كەڭەيتۋ ءۇشىن مۇمكىندىكتەرىمىز مول. سوڭعى ەكى جىلدىڭ وزىندە ماڭعىستاۋ وبلىسى مەن ازەربايجان اراسىنداعى ءوزارا تاۋار اينالىمى بەس ەسە وسكەن. ايماقتارىڭىز قازاقستاندى جاھاندىق جانە وڭىرلىك نارىقتارمەن بايلانىستىراتىن اسا ماڭىزدى ترانزيت تورابى بولىپ سانالادى. بۇل وراسان زور الەۋەتتى تولىق پايدالانا بىلگەن ءجون, – دەدى مەملەكەت باسشىسى.
سونىمەن بىرگە, قازاقستان پرەزيدەنتى ءوڭىردىڭ الەۋمەتتىك سالاداعى جەتىستىكتەرىن اتاپ ءوتتى.
– تاۋەلسىزدىك جىلدارى وبلىس تۇرعىندارىنىڭ سانى ەكى ەسە ءوسىپ, 640 مىڭ ادام بولدى. حالىقتىڭ ءومىر جاسى دا ۇزارىپ كەلەدى. وسى جىلدار ىشىندە 271 مىڭ بالا دۇنيەگە كەلدى. بۇل رەسپۋبليكا بويىنشا ەڭ جوعارى كورسەتكىش بولىپ تابىلادى. تاريحي وتانىنا 125 مىڭنان استام ادام ورالدى. بۇل – تۇتاس ءبىر قالا. شيرەك عاسىردا مەديتسينا مەكەمەلەرىنىڭ سانى ەكى جارىم ەسە, ال مەكتەپتەر ەكى ەسە ارتقان. 229 بالاباقشا پايدالانۋعا بەرىلدى, – دەدى نۇرسۇلتان نازارباەۆ.
ماڭعىستاۋ وبلىسىنىڭ اكىمى ە.توعجانوۆ وبلىستاعى الەۋمەتتىك-ەكونوميكالىق جاعداي مەن ونى دامىتۋ پەرسپەكتيۆالارى تۋرالى باياندادى.
جۇرتشىلىق وكىلدەرى سويلەگەن سوزدەرىندە ءوڭىردى دامىتۋ ماسەلەلەرىنە ۇدايى كوڭىل اۋدارىپ, ءتيىمدى مەملەكەتتىك ساياساتى جۇرگىزىپ وتىرعانى ءۇشىن مەملەكەت باسشىسىنا ريزاشىلىق ءبىلدىردى.
سوڭىندا مەملەكەت باسشىسى جيىنعا قاتىسۋشىلاردىڭ نازارىن ەلىمىزدىڭ تابىستى دامۋىنىڭ كەپىلى بولىپ سانالاتىن بىرلىكتى, تاتۋلىق پەن دوستىقتى ساقتاۋ قاجەتتىگىنە اۋدارىپ, ماڭعىستاۋلىقتارعا زور دەنساۋلىق جانە باق-بەرەكە تىلەدى.
