وسىعان دەيىن سەن-پەردىڭ ءوزى دە قازاقستان اتىنان حالىقارالىق تۋرنيرلەرگە قاتىسقىسى كەلەتىنىن اشىق ايتقان بولاتىن.
«ۇلتتىق قۇرامانىڭ دەڭگەيىندە ويناماعان ەدىم. ەگەر قازاقستان قۇراماسىنان ۇسىنىس تۇسەر بولسا, قۋانا-قۋانا كەلىسەر ەدىم», – دەگەن بولاتىن مارتەن سەن-پەر.
دەگەنمەن, حوككەيشىنىڭ بيىلعى الەم چەمپيوناتىنا قاتىساتىنى بەلگىسىز. سەبەبى, قازاقستان قۇراماسىنىڭ باس باپكەرى ەدۋارد زانكوۆەتس بۇل جونىندە ناقتى جاۋاپ بەرمەدى.
الەم چەمپيوناتىندا ءبىرىنشى ديۆيزيوننىڭ «ا» توبىنداعى ويىندار كيەۆ قالاسىندا 22-28 ءساۋىر كۇندەرى وتەدى. ال جوعارى ديۆيزيوننىڭ ەكى جولداماسى ءۇشىن قازاقستان, ۋكراينا, اۆستريا, پولشا, ۆەنگريا جانە وڭتۇستىك كورەيا ەلدەرى تالاسادى.
ايتا كەتەيىك, ۇلتتىق حوككەي ليگاسىندا سەن-پەر «چيكاگو بلەكحوس», «بوستون بريۋنيز» جانە «مونرەال كاناديەس» ۇجىمدارىندا ويناعان. وسى كوماندالاردا بارلىعى 39 ويىنعا قاتىسىپ, سەگىز (3+5) ۇپاي جينادى.
ال قۇرلىقتىق حوككەي ليگاسىندا «نەفتەحيميك», «مەدۆەشچاك», «بارىس» جانە سۋپەرليگادا «حيميك» كوماندالارىنىڭ نامىسىن قورعادى. مۇندا ول بارلىعى 198 ويىنعا قاتىسىپ, 103 ۇپاي (33+70) جينادى.
33 جاستاعى مارتەن سەن-پەردىڭ «بارىسقا» كەلگەنىنە ەكى جىل بولدى. ەندى قازاقستان اتىنان سىنعا تۇسۋگە تولىقتاي قۇقى بار. ۇلتتىق قۇرامانىڭ ساپىنا وسىمەن بەسىنشى سولتۇستىكامەريكالىق حوككەيشى قوسىلىپ وتىر. بۇعان دەيىن كانادالىق كەۆين داللمەن, نايدجەل دوۋس, داستين بويد جانە امەريكالىق برەندون بوچەنسكي تارتىلعان.
كەۆين داللمەن 2013 جىلدىڭ قاڭتار ايىندا قازاقستان ازاماتتىعىن الدى. بۇگىنگە دەيىن ول 2014 جىلعى وليمپيادا ويىندارىنىڭ ىرىكتەۋ كەزەڭىنە, 2014 جىلى مينسكىدە الەم چەمپيوناتىنا, 2015 جىلى الەم چەمپيوناتىنىڭ ءبىرىنشى ديۆيزيونىنا قاتىستى.
نايدجەل دوۋس كانادا قۇراماسىمەن 2004 جانە 2005 جىلدارى جاستار اراسىندا الەم چەمپيوناتىنا قاتىسىپ, سايكەسىنشە كۇمىس جانە التىن جۇلەگەر اتاندى. ال 2016 جىلى قازاقستان قۇراماسىنىڭ نامىسىن قورعاۋعا مۇمكىندىك الدى.
داستين بويد تا العاشىندا ءوز ەلىنىڭ اتىنان ءىرى جارىستارعا قاتىسقان. كانادا ۇجىمىمەن 2006 جىلى جاستار اراسىندا الەم چەمپيونى اتانعان. ال قازاقستان ازاماتتىعىن العاننان كەيىن 2016 جىلى ماسكەۋدە الەم چەمپيوناتىنا قاتىستى.
ال امەريكالىق برەندون بوچەنسكي 2014 جىلى قازاقستان ازاماتى اتاندى. ماسكەۋدە وتكەن الەم بىرىنشىلىگىنە قاتىستى.
