وسىدان ون جەتى جىل بۇرىن قالالىق دەڭگەيدە باستالعان تۋرنير جىل ساناپ قاناتىن كەڭگە جايىپ, قازىر ايماقتىق جارىسقا اينالدى. بيىلعى تۋرنيرگە جەزقازعان, ساتباەۆ قالالارى مەن ۇلىتاۋ اۋدانىنىڭ بورسەڭگىر اۋىلى, جەزدى كەنتى جانە كەڭگىر اۋىلىنان 50-دەن اسا جاس شاحماتشى قاتىستى.
– مەنىڭ اكەم شاحماتتى وتە جاقسى كورەتىن, قولى قالت ەتكەندە دوس-جاراندارىمەن شاحمات وينايتىن. اكەمىزگە قاراپ اعام دا, ءىنىم دە, مەن دە وسى ويىنعا ۇيىرسەك بولىپ وستىك. سوندىقتان, وسىدان ون جەتى جىل بۇرىن سول كەزدەگى قالا باسشىلىعى تاراپىنان مەنىڭ اتىما وقۋشىلار اراسىندا شاحماتتان تۋرنير وتكىزۋ تۋرالى ۇسىنىس ءتۇسكەندە قۋانا قابىلداعان بولاتىنمىن. ايماقتاعى جاس شاحماتشىلاردىڭ تۋرنيردە باق سىناسىپ جاتقانىن كورۋ كوڭىلدى ودان ءارى وسىرە تۇسەدى, – دەدى جارىستىڭ اشىلۋ سالتاناتىنا قاتىسقان مۇحامبەت كوپەەۆ.
ساتباەۆ قالاسىنىڭ اكىمى اسقار ىدىرىسوۆ شاحماتتىڭ سپورتتىق تارتىس قانا ەمەس, «اقىل-وي گيمناستيكاسى» ەكەندىگىنە دە توقتالدى. ول كەيىنگى جىلدارى رەسپۋبليكامىزدا جاس شاحماتشىلاردىڭ الەمدىك جارىستاردا الدىڭعى ورىنداردان تابىلىپ جۇرگەندىگىن ايتتى, جاستاردى سولارعا قاراپ بوي تۇزەۋگە شاقىردى.
تۋرنير قورىتىندىسى بويىنشا «ەڭ قىسقا پارتيا» نوميناتسياسى بويىنشا جەزقازعاندىق اسىلبەك ومراكۋنوۆ, «ەڭ ادەمى پارتيا» نوميناتسياسى بويىنشا ساتباەۆتىق قازىبەك ق ۇلىبەك پەن جەزقازعاندىق ولجاس دوسەتوۆ, ۇلىتاۋ اۋدانى, بورسەڭگىر اۋىلىنىڭ وقۋشىسى زارينا قۇرال «جەڭىسكە دەگەن جىگەرى ءۇشىن», جەزقازعاندىق ءسالىمجان ساقباەۆ «ەڭ جاس قاتىسۋشى» نوميناتسياسى بويىنشا جەڭىمپاز اتاندى.
ساتباەۆتىق گۇلجامال جالبىروۆا «تاڭداۋلى جاتتىقتىرۋشى» اتانسا, «ءادىل تورەلىگى ءۇشىن» نوميناتسياسىنىڭ ءجۇلدەسى ۆلاديمير ولەگوۆيچ كنيازيۋككە بۇيىردى. جارىس قورىتىندىسىندا كوماندالىق ەسەپ بويىنشا «ساتباەۆ قالاسى-1» كومانداسى ءبىرىنشى ورىندى جەڭىپ الدى.
جارىس جەڭىمپازدارىنا گراموتالار مەن باعالى سىيلىقتار تاپسىرىلدى.
ابدوللا داستانوۆ,
جۋرناليست
قاراعاندى وبلىسى,
ساتباەۆ قالاسى
