ءان, كۇي, رومانس, ۋۆەرتيۋرا, پوەما, كانتاتا, وپەرا, بالەت سياقتى ءتۇرلى مۋزىكالىق جانرلار اياسىن قامتىعان 500-دەن استام ءتول تۋىندىنىڭ اۆتورى, قازاق مۋزىكالىق مادەنيەتىنە ولشەۋسىز ۇلەس قوسقان ايگىلى كۇيشى-سازگەر, تالانتتى ديريجەر نۇرعيسا اتاباي ۇلى تىلەنديەۆتىڭ مول مۇراسىن وسكەلەڭ ۇرپاق ساناسىنا ءسىڭىرىپ, كەڭىنەن ناسيحاتتاۋ ماقساتىندا جىل سايىن وتكىزىلىپ وتىراتىن اتالمىش كونفەرەنتسيانى ن.تىلەنديەۆ اتىنداعى حالىقارالىق قور ۇيىمداستىردى. نۇراعاڭنىڭ ومىردە جانىنا جاقىن تۇتقان جاندارى مەن ونەردەگى دوستارى, ءىزباسارلارى باس قوسقان ايتۋلى جيىننىڭ وتۋىنە مۇرىندىق بولعان قور ديرەكتورى ورالجان ماساتباەۆ نۇرعيسا تىلەنديەۆ مۇراسىنىڭ زەرتتەلمەي جاتقان تۇستارىنا توقتالا وتىرىپ, قازاق مۋزىكاسىنىڭ دامۋىن بۇتىندەي ءبىر عاسىرعا العا سۇيرەي بىلگەن بىرەگەي تۇلعانى ۇلىقتاپ وتىرۋ – ەلىنىڭ ۇلكەن پارىزى ەكەنىن اتاپ ءوتتى.
بەلگىلى قوعام قايراتكەرى كيم سەرىكباەۆ, قازاقستاننىڭ ەڭبەك سىڭىرگەن قايراتكەرى, پروفەسسور پەرنەبەك مومىنوۆ, قۇرمەت وردەنىنىڭ يەگەرى, ونەرتانۋشى عالىم جارقىن شاكارىم, «وتىرار سازى» وركەسترىنىڭ ديريجەرى, كومپوزيتوردىڭ شاكىرتى جالعاسبەك بەگەندىكوۆ, م.اۋەزوۆ اتىنداعى ادەبيەت جانە ونەر ينستيتۋتىنىڭ اعا عىلىمي قىزمەتكەرى ءزۇلفيا قاسىموۆا, قاراساي اۋدانىنداعى تۇڭعىش پرەزيدەنت مۋزەيىنىڭ جەتەكشىسى, قۇرمەت وردەنىنىڭ يەگەرى رىمكەش بايقونىسوۆا, كۇيشى تالاپ قاراش, اقوردا رەسپۋبليكالىق قوزعالىسى توراعاسىنىڭ ورىنباسارى قانات مۇساعۇلوۆ سىندى تۇلعالار قاتىسقان جيىننان تىلەنديەۆ تۇلعاسىنىڭ دارالىعى تولىق اشىلعانداي. ال سازگەردىڭ جارى, ن.تىلەنديەۆ اتىنداعى حالىقارالىق قور پرەزيدەنتى داريعا تىلەندىكەلىنىنىڭ كوزىنە جاس الا وتىرىپ ايتقان ەستەلىكتەرى حالقىنىڭ نۇر-اعاسىنا دەگەن ساعىنىشىن, ايرىقشا قۇرمەت-ىقىلاسىن ارتتىرا تۇسكەندەي بولدى.
سازگەر-كۇيشىنىڭ شالقار تەڭىزدەي شالقىعان شىعارماشىلىعىنداعى كەيبىر شاشىلىپ قالعان, ياكي بەلگىلى-بەلگىسىز سەبەپتەرمەن جوعالىپ كەتكەن, جارىق كورمەي قالعان جاۋھار تۋىندىلارىن جيناقتاپ, زەرتتەپ, كوپشىلىك نازارىنا ۇسىنۋدا كوپ ەڭبەك اتقارىپ جۇرگەن نۇرعيساتانۋشى قاۋىم كۇيشىنىڭ 90 جىلدىعى اتالىپ وتكەن 2015 جىلدان بەرى دە باسى قايىرىلعان قىرۋار شارۋا جايىندا ەسەپ بەرىسىپ, وي ءتۇيىستى, پىكىر الماستى.
كەش بارىسىندا ايگىلى سازگەر تۋرالى «حابار» تەلەارناسى تۇسىرگەن «قۇستار قايتىپ بارادى» اتتى ەكى بولىمنەن تۇراتىن فيلمنەن ءۇزىندى كورسەتىلىپ, «وتىرار سازى» وركەسترىنىڭ ورىنداۋىنداعى نۇراعاڭ كۇيلەرى تىڭدالدى. بو-
يىنا تۇنعان سان قىرلى تالانتىمەن, جۇرەگىنە سىيماي بۇلكىلدەگەن اۋەن-سازىمەن ءبۇتىن قازاق دالاسىن تەربەي بىلگەن دارىن يەسى ءومىرىنىڭ كەيبىر ساتتەرى تۋرالى تەمىربەك جۇرگەنوۆ اتىنداعى ونەر اكادەمياسى ستۋدەنتتەرى قويعان شاعىن قويىلىمدار جينالعان قاۋىمدى ءبىر ساتكە تىلەنديەۆ الەمىنە جەتەلەگەندەي ەدى.
ميرا بايبەك,
«ەگەمەن قازاقستان»
الماتى
