«قازىر الماتى وبلىسىندا وقۋ-جاتتىعۋ جيىنىن وتكىزىپ جاتىرمىز. دايىندىق 8 ساۋىرگە دەيىن جالعاسادى. ال 15 ساۋىردەن باستاپ استانادا جالعاستىراتىن بولامىز», – دەدى مىرزاعالي ايتجانوۆ sports.kz باسىلىمىنا بەرگەن سۇحباتىندا.
«سوڭعى رەت گەرمانيادا «كىشى الەم چەمپيوناتى» سانالاتىن «Chemistry Cup» تۋرنيرىندە بوكسشىلارىمىز ۇلكەن جەتىستىكتەرگە جەتتى. دەگەنمەن, ءدال وسى جارىستان قاتەلىكتەرىمىزدى دە بايقادىق. الداعى ۋاقىتتا وسى كەمشىلىكتەرىمىزدىڭ ورنىن تولتىرۋىمىز كەرەك. ال الداعى اپتادان باستاپ تەحنيكالىق-تاكتيكالىق شەبەرلىلىكتەرىن دامىتۋمەن اينالىسامىز», – دەدى ۇلتتىق قۇرامانىڭ باس باپكەرى.
وسىعان دەيىن 81 كەلى سالماقتاعى ادىلبەك نيازىمبەتوۆ پەن جانىبەك ءالىمحان ۇلى جاراقاتتارىنا بايلانىستى ازيا چەمپيوناتىنا قاتىسا المايتىنىن ايتقان ەدىڭىز. ولاردىڭ ورنىن كىم باسپاق؟
«ازىرگە بۇل جونىندە ناقتى ءبىر شەشىم قابىلدامادىق. الداعى ۋاقىتتا باپكەرلەر قۇرامىمەن وسى ماسەلەنى تالقىلايتىن بولامىز. 75 كەلىدەگى جىگىتتەرىمىزدىڭ ءبىرى سالماعىن كوتەرۋى دە مۇمكىن. 81 كەلىدە بەكزات نۇرداۋلەتوۆ پەن بەك نۇرماعانبەت دەگەن ەكى بوكسشىمىز بار. جاستار اراسىنداعى الەم چەمپيوناتىندا دەڭگەيلەرىن بايقادىق. ولاردى دا نازارعا الامىز», – دەدى ول.
قازىر 75 كەلىدە تاشكەنتتە وتەتىن جارىسقا تۇرسىنباي قۇلاحمەت, ەرىك ءالجانوۆ, ءابىلحان امانقۇل ۇمىتكەر اتانىپ وتىر. ولار ءتۇرلى حالىقارالىق تۋرنيرلەردە جۇلدەلى ورىندارعا يە بولدى. ال باپكەرلەر القاسى بۇل جولى كىمگە تاڭداۋ جاساپ وتىر؟
«ءتۇرلى نۇسقالاردى قاراستىرىپ وتىرمىز. مىنە, وسى جىگىتتەردىڭ ءبىرىن 81 كەلىگە كوتەرۋىمىز مۇمكىن. ەكى وقۋ-جاتتىعۋ جيىنى وتكەننەن كەيىن دەڭگەيلەرىنە بايلانىستى شەشىم قابىلدايمىز. ايدىڭ سوڭىندا ازيا چەمپيوناتىنا قاتىساتىن بوكسشىلاردىڭ ءتىزىمى جاريالانادى», – دەدى ايتجانوۆ.
ۇلتتىق قۇرامانىڭ باس باپكەرى ريو وليمپياداسىنىڭ كۇمىس جۇلدەگەرى ۆاسيلي لەۆيت جايلى پىكىر ءبىلدىردى.
«ۆاسيلي 60-70%-عا دايىن. الداعى جيىنداردان كەيىن بارىنە دايىن بولادى دەپ سەنەمىن. ارينە, ءوز باسىم تاشكەنتتە وتەتىن جارىستا لەۆيتتەن تەك قانا التىن جۇلدە كۇتەمىن», – دەدى.
جەڭىل سالماقتا ۇلتتىق قۇراماداعى كارەراسىن اياقتاعان ءبىرجان جاقىپوۆتىڭ ورنىن ۇلتتىق قۇرامادا كىم باسۋى مۇمكىن؟
«قازىر ەكى جاس سپورتشىنىڭ دەڭگەيىن باقىلاپ وتىرمىز. «استانا ارلاندارى» ساپىندا جۇرگەن تەمىرتاس ءجۇسىپوۆ تە بار. سونىمەن قاتار, وسى سالماقتا ەل نامىسىن ەرجان جومارت, شالقار ايقىنباي, اسقات ءجۇسىپوۆ سىندى بىلعارى قولعاپ شەبەرلەرى قورعاۋى مۇمكىن», – دەدى.
«ازيا چەمپيوناتىندا باستى قارسىلاسىمىز وزبەك بوكسشىلارى بولاتىنى ءسوزسىز. دەگەنمەن, وزگە ەلدىڭ بوكسشىلارىن نازاردان تىس قالدىرۋعا بولمايدى. كەي سالماقتاردا قىرعىز جىگىتتەرى دە مىقتى. سونىمەن قاتار, سوڭعى جىلدارى قىتاي, وڭتۇستىك كورەيا, فيليپپين, تايلاند, يران سىندى مەملەكەتتەردە بوكس قارقىندى تۇردە دامىپ كەلەدى», – دەدى مىرزاعالي ايتجانوۆ.
«تاشكەنتكە ۇلكەن ماقسات قويىپ بارامىز. بىراق ريو وليمپياداسىندا وزبەك بوكسشىلارىنا كەتكەن ەسەمىزدى قايتارۋ باستى جوسپارىمىز. قازاقستان قۇراماسى ازيا چەمپيوناتىنا جاڭارتىلعان قۇراممەن بارادى. وليمپياداعا قاتىسقان ەكى بوكسشى عانا بارۋى مۇمكىن. جانكۇيەرلەرىمىزدى قۋانتۋ ءۇشىن بارىمىزدى سالامىز», – دەدى قازاقستان ۇلتتىق قۇراماسىنىڭ باس باپكەرى.
