«بارىس» ءالى دە بولسىن جەڭىسكە جەتە الادى – داستين بويد

«بارىس» حوككەي كلۋبىنىڭ شابۋىلشىسى داستين بويد «مەتاللۋرگكە» قارسى سەريالى ماتچتا ءالى دە بولسىن جەڭىستەن ءۇمىت بارىن ايتتى. «جاعدايىمىزدىڭ قيىنداي تۇسكەنى ايتپاسا دا بەلگىلى. ماتچتىڭ تەك سوڭىندا عانا ويانىپ, قاۋىپتى شابۋىلدار ۇيىمداستىرعانىمىزبەن, تىم كەش ەدى. ويىن بارىسىندا مۇمكىندىگىمىز كوپ بولاتىن, بىرنەشە رەت ويىنشى باسىمدىعىنا دا يە بولدىق. وكىنىشكە وراي, ساتتىلىك جەتىسپەدى. العاشقى كەزەڭدە 1:2 ەسەبىمەن ەسە جىبەرسەك تە, ءبارى ءوز قولىمىزدا بولاتىن. بىراق ارىپتەستەرىمىزدىڭ بىرنەشە رەت ايدىننان قۋىلۋى كەرى اسەرىن تيگىزدى», – دەدى داستين بويد. «بارىس» فورۆاردىنىڭ ايتۋىنشا, ءالى دە ەشنارسە كەش ەمەس ەكەن. «ەندى باسقاشا جوسپار قۇرىپ, جاعدايىمىزدى وزگەرتۋگە بولاتىن جولدارىن قاراستىرۋىمىز كەرەك. ءبارىمىز ءوز دەڭگەيىمىزدەن جوعارى ويناۋىمىز قاجەت. برەندوننىڭ جاراقاتىنان ايىعىپ, قاتارىمىزعا قايتا قوسىلعانى جاقسى بولدى. ءتورتىنشى كەزدەسۋدە قاجەتتى ناتيجەگە قول جەتكىزەمىز دەپ ۇمىتتەنەمىن», – دەدى ول. ايتا كەتەيىك, كەشە «بارىس» ماگنيتوگورسكىنىڭ «مەتاللۋرگىمەن» ءۇشىنشى مارتە كۇش سىناسىپ, 3:5 ەسەبىمەن ەسە جىبەردى. «مەتاللۋرگ» ساپىنان دانيس زاريپوۆ ايدىن يەلەرىن ءۇش مارتە (28, 38, 56-مينۋتتار) قاپى قالدىرسا, سەرگەي موزياكين (48-مينۋت) مەن يان كوۆارج (54-مينۋت) ءبىر-ءبىر شايبانىڭ اۆتورى اتاندى. ال استانالىقتاردان داستين بويد ءۇش گولدىڭ (42, 58, 59-مينۋتتار) ءبارىن سالدى. قوس كوماندانىڭ اراسىنداعى جالپى ەسەپتە ماگنيتوگورلىكتەر 3:0-مەن الدا كەلەدى. كەلەسى ماتچ 15 ناۋرىزدا استانادا وتەدى.