بۇل – مەملەكەتتىك قىزمەتتىڭ ابىرويىن اسىراتىن قادام

بيلىككە دەگەن سەنىم مەملەكەتتىك قىز­مەت­شىدەن باستالادى. وتىز دامىعان ەلدىڭ قۇرامىنا ەنۋگە كەپىلدىك بەرەتىن «100 ناقتى قادام» ۇلت جوسپارىنىڭ العاشقى 15 قادامى مەملەكەتتىك قىزمەتتى ساننان ساپاعا قاراي كاسىبيلەندىرۋگە ارنالۋى دا زاڭدى قۇبىلىس. سەبەبى, ءوز ءىسىن جەتىك بىلەتىن, ماماندىعىنا ادال مەملەكەت­تىك قىزمەتشىلەر ەلگە قىزمەت ەتپەيىنشە, وركەنيەتتى ەلدەردىڭ قاتارىنا قوسىلا المايمىز. مەملەكەتتىك قىزمەتشىلەردى كەشەن­دى اتتەستاتتاۋدان وتكىزۋ ناۋقانى – مەم­لە­كەتتىك قىزمەتكە ەڭ لايىقتى ادام­دار­دى ىرىكتەپ, ولاردىڭ ابىرويىن, بىلىك­تىلىگىن, ەڭبەگىن ەسكەرەتىن جۇيەنى قالىپتاستىراتىن «ەلگە قىز­مەت ەتۋ» قاعيداسىنىڭ جۇزەگە اسۋى­نىڭ ايعاعى. مەنىڭ ءوزىم ۇزاق جىل بويى مەم­لەكەتتىك قىزمەتتە جۇمىس ات­قار­­دىم. سول ءۇشىن باقىتتىمىن. بىراق, قازىر­گى قول­دانىستاعى «قازاقستان رەسپۋب­لي­كا­­سىنىڭ مەملەكەتتىك قىزمەتى تۋرالى» زاڭىن­دا كورسەتىلگەندەي, ەشقاشان مەم­لەكەت­تىك قىزمەتشىنىڭ الەۋەتىن كوتەرۋ ءۇشىن مۇنداي جاعداي جاسالعان ەمەس. كۇنى كەشەگە دەيىن ءبىز مانساپتىق ءوسۋ, مەريتوكراتيا دەگەن سوزدەردى بىلمەپپىز. جاڭادان باسشى كەلسە, ۇجىمنىڭ ءبىراز بولىگى اۋىساتىن. وسىدان بولار, مەملەكەتتىڭ ەمەس, مەكەمە باسشىسىنىڭ كوڭىلىن تابۋمەن الەك بولاتىنبىز. ال, قازىرگى ساياساتتا ىسكەر مامانداردى مانساپتىق وسىرۋگە اسا ءمان بەرىلگەن. سوندىقتان, ءومىرىن مەملەكەتتىك قىز­مەت­پەن بايلانىستىرعىسى كەلگەن تا­لانتتى جاستار ءۇشىن الاڭسىز جۇمىس ىستەيتىن ۋاقىت تۋدى. ەندىگى جاعداي­دا, مەملەكەتتىك قىزمەتشىلەردىڭ قابى­لەتىنە قاراي ءوسۋ مۇمكىندىگى بار. سوندىق­تان, بۇرىنعىمەن سالىستىرعاندا مەملە­كەتتىك قىزمەتتە كادرلاردىڭ ورنىعۋى الدەقايدا ءوستى. نەسىن جاسىرايىق, قانشا جەردەن جۇمىسىمىزدىڭ العىر مامانى بولساق تا, زاڭنىڭ ءاربىر بابىن ەستە ساقتاۋ قيىن. ونىڭ ۇستىنە, ۋاقىتپەن ساناسپايتىن جۇمىس رەجىمى ول زاڭداردى قايتالاپ تۇرۋعا مۇرشا بەرمەيدى دە. تەك تىكەلەي جۇمىسقا قاتىستى نورماتيۆتەرمەن شەكتەلەمىز. سوندىقتان, الدىڭعى جىلدارى اتتەستاتتاۋ جاقىنداي باستاعاندا, ءبىز وسى قيىندىقتان شىعۋ ءۇشىن توتە جولداردى ىزدەي باستايتىنبىز. ال قازىرگى جاعدايدا ءوتىپ جاتقان اتتەستاتتاۋ سىبايلاس جەمقورلىقتىڭ قان­داي دا بولسىن تاۋەكەلىنە مۇمكىندىك بەرمەيدى. قازىرگى تاڭدا مەملەكەتتىك قىز­مەت­­شىلەر زامان تالابىنا وراي جەكە تۇل­عالىق سيپاتىن انىقتاۋدا باستاما­شىلدىق, شەشىم قابىلداۋ, جىلدامدىق, جاۋاپكەرشىلىك, سەرىكتەستىك, قىزمەتتى تۇتىنۋشىعا باع­دار­لانۋ, قىزمەتتى تۇتىنۋشىنى حابارلاندىرۋ سياقتى 11 قۇزىرەتتى انىقتاۋعا ارنالعان تەستىلەۋدەن ءوتىپ جاتىر. ولار كەلەسى كەزەكتە ارنايى اتتەستاتتاۋ كوميسسياسى الدىندا كاسىبيلىگىنە بايلانىستى اڭگىمەلەسۋدەن وتەدى. اتتەستاتتاۋ كوميسسياسىنا ءتيىستى مەكە­مەنىڭ باسشىلارىنان باسقا, ءماسليحات دەپۋتاتتارى, قوعامدىق بىرلەس­تىكتەر مەن ۇكىمەتتىك ەمەس ۇيىمدار­دىڭ, باق-تاردىڭ وكىلدەرى قاتىسۋى دا قۋانتارلىق جايت. بۇل كەزەڭ اشىقتىق, جاريالىلىق, ادىلدىك قاعيداتتارىن ساقتاۋ ماقساتىندا اۋديو جانە بەينەكامەرالارمەن سۇيەمەلدەنەدى. وسىلاي­شا جان-جاقتى قاراستىرىلىپ, پىسىقتال­عان اتتەستاتتاۋ ناۋقانى ەل سەنىمىن­دەگى ازاماتتاردىڭ ىسكەرلىك كەلبەتىن سومدايدى دەپ سەنەمىن. سوندىقتان دا مەملەكەتتىك قىزمەتشىنىڭ جۇمىسىن وبەكتيۆتى باعالاۋعا باعىتتالعان بۇل جۇيەنى قولدايمىن. كەزىندە اريستوتەل: «حالىققا قىز­مەت ەتىپ, جاقسىلىق جاساۋ ءۇشىن عالام­­دى توڭكەرىپ, باي بولىپ نەمەسە كۇللى ادامدى باسقارىپ, پاتشا بولۋ مىندەتتى ەمەس. تەك حالىققا ادال قىز­مەت ەتۋ كەرەك», دەپتى. شىنىندا دا, ەلىمىز­دىڭ ەرتەڭى – بۇگىنگى مەملەكەتتىك قىز­مەت­شىلەردىڭ ادامي جانە كاسىبي قۇندى­لىق­تارىنا, ەلجاندىلىعىنا بايلانىستى. ابدۋللا احمەتوۆ, ەڭبەكتى قورعاۋ جونىندەگى رەسپۋبليكالىق عىلىمي-زەرتتەۋ ينستيتۋتىنىڭ وڭتۇستىك قازاقستان وبلىسى بويىنشا فيليالىنىڭ ديرەكتورى شىمكەنت