«بارىس» وتكىر شابۋىلدارعا شىعا المادى – ەدۋارد زانكوۆەتس

«بارىس» كومانداسىنىڭ باس باپكەرى ەدۋارد زانكوۆەتس ماگنيتوگورسكىنىڭ «مەتاللۋرگىنە» قارسى وتكەن العاشقى ويىن جايلى پىكىر ءبىلدىردى. «كوماندامىز ناشار وينادى دەپ ايتا المايمىن. بىراق جەڭىسكە جەتۋ ءۇشىن لايىقتى تۇردە قارسىلىق تانىتپادى. جىگىتتەر كەلەسى راۋندقا شىققان ەكەن. ەندى سوڭىنا دەيىن كۇرەسەتىن بولامىز. بۇل ويىنداعى كەمشىن تۇستارىمىز كوپ بولدى. ەڭ باستى قاتەلىگىمىز – وتكىر شابۋىلدارعا شىعا المادىق», – دەدى ەدۋارد زانكوۆەتس. «جاقسى قاقپاشى – جارتى كوماندا» دەمەكشى حەنريك كارلسسون كەزەكتى رەت جوعارى دەڭگەيدە ويىن كورسەتتى. «تراكتوردى» جەڭگەننەن كەيىن ارادا ءۇزىلىس بولعان, قازىرگى ۋاقىتتا ونى اۋىستىرۋدىڭ ەش قيسىنى جوق سەكىلدى», – دەدى باس باپكەر. ايتا كەتەيىك, كەشە «بارىس» ماگنيتوگورسكىدە وتكەن كەزدەسۋدە 0:4 ەسەبىمەن ويسىراي جەڭىلگەن بولاتىن. ماتچتا العاشقى گول 11-مينۋتتا سوعىلدى. بۇل تۇستا وسكار وسالا مەرگەندىگىمەن تانىلدى. كەزدەسۋدىڭ ەكىنشى كەزەڭى قانشالىقتى تارتىستى وربىگەنمەن, ەسەپ وزگەرىسسىز كۇيدە قالدى. ال سوڭعى 20 مينۋتتا ايدىن يەلەرىنىڭ مەرەيى ۇستەم بولىپ, ءبىزدىڭ كومانداعا ءۇش بىردەي شايبا سوعىپ كەتتى. الدىمەن, 44-مينۋتتا توماش فيليپپي جەرلەستەرىمىزدى قاپى قالدىرسا, اراعا بەس مينۋت سالىپ يان كوۆارج باسىمدىقتى ارتتىرا ءتۇستى. نەگىزگى ۋاقىتتىڭ اياقتالۋىنا ساناۋلى سەكۋندتار قالعاندا دانيس زاريپوۆ سوڭعى نۇكتەنى قويدى. قوس ۇجىمنىڭ اراسىنداعى كەلەسى ماتچ 11 ناۋرىز كۇنى ماگنيتوگورسكىدە وتەدى. كەزدەسۋ استانا ۋاقىتى بويىنشا 18:00-دە باستالادى. وسىدان كەيىنگى ەكى ويى استانادا 13 جانە 15 ناۋرىزدا وتەدى. كەلەسى كەزەڭگە ءتورت مارتە جەڭىسكە جەتكەن كوماندا جولداما الادى.