ترانزيتتىك تاسىمال تابىس اكەلەدى

ينۆەستيتسيالار جانە دامۋ مينيسترلىگىنىڭ وكىلدەرى مەملەكەت باسشىسى نۇرسۇلتان نازارباەۆتىڭ قازاقستان حالقىنا ارناعان ءداستۇرلى جولداۋىن جۇزەگە اسىرۋ جانە قولداۋ ماقساتىندا ءباسپاسوز ءماسليحاتىن وتكىزدى. وندا ۆەدومستۆونىڭ ترانزيتتىك جانە كولىكتىك لوگيستيكانى دامىتۋ دەپارتامەنتى ديرەكتورىنىڭ ورىنباسارى سەرىك باشيموۆ 2020 جىلعا قاراي ترانزيتتىك تاسىمالدىڭ جىلدىق كولەمىن ارتتىرۋدى قامتاماسىز ەتۋ جونىندەگى شارالارمەن تانىستىردى. «قازاقستاننىڭ گەوگرافيالىق ورنالاسۋى ازيا – ەۋروپا باعى­تى بويىنشا جۇك تاسىمالداۋدا قو­لايلى جاعداي تۋدىرادى. وسى ماقساتتا كولىك-لوگيستي­كا كەشەنىن دامىتۋ, ترانسقازاق­ستاندىق دالىزدەردىڭ جاڭا ءساۋ­لەتىن قالىپتاستىرۋ مينيسترلىك جۇمىسىنىڭ باسىم باعىتى. وتكەن جىلى ترانزيتتىك تاسىمال­دان 267 ملرد تەڭگە پايدا ءتۇستى, بۇل بۇرناعى جىلعى كورسەت­كىشتەن 40 پايىزعا ارتىق», دەدى س.باشيموۆ. ونىڭ ايتۋىنشا, ءۇش جىلدان كەيىن قازاقستان ارقىلى وتەتىن ترانزيتتىك تاسىمالدان تۇسەتىن تابىستىڭ كولەمى 4 ملرد دوللارعا جەتۋى ءتيىس. ۇكىمەتتىڭ الدىندا وسىنداي مىندەت تۇر. «قىتاي – ەۋروپا – قىتاي با­عىتىنداعى تەمىر جول قا­تى­ناسى ارقىلى كونتەينەرلىك تاسىمالدان شامامەن 1,5 ملرد دوللار تۇسەدى دەگەن بولجام بار. قىتاي – يران – يراك تەمىر جو­لىنان 400 ملن, سونداي-اق, قىتاي – كاۆكاز – ىستانبۇل باعى­تىنداعى كونتەينەرلىك تاسىمال­دان 400 ملن دوللار ءتۇسۋى ءتيىس», دەگەن مينيسترلىك وكىلى قا­زاقستاننىڭ اۋە كەڭىستىگى ارقىلى جولاۋشىلاردىڭ ترانزيتتىك تاسىمالى دا پايدا اكەلەتىنىن ايتتى. سوڭعى بەس جىلدا اتالعان كورسەتكىش ءتورت ەسەگە وسكەن. 2012 جىلى قازاقستان تەرريتو­رياسى ارقىلى ۇشىپ وتەتىن جولاۋ­شىلاردىڭ سانى 120 مىڭ ادام بولسا, 2016 جىلدا ولاردىڭ سا­نى 478 مىڭ ادامعا ارتتى. اعىم­داعى جىلدىڭ سوڭىندا جولاۋ­شىلاردىڭ ترانزيتتىك تاسىمالى 600 مىڭ ادامعا جەتەدى دەگەن بولجام بار. وتكەن جىلى وسى تاسىمالدان تۇسكەن تابىستىڭ كولەمى 267 ملرد تەڭگەنى قۇراعان. ترانزيتتىك جانە كولىكتىك لوگيستيكانى دامىتۋ دەپارتامەنتى ديرەكتورىنىڭ ورىنباسارى سە­رىك ءباشيموۆتىڭ مالىمەتىنشە, اقى­لى جولداردى ەنگىزۋدىڭ ارقا­سىندا قازاقستان ارقىلى وتەتىن جۇكتەردەن دە تابىس تۇسەدى. ونىڭ جالپى كولەمى 18 ملن دوللارعا دەيىن جەتۋى كەرەك. اسحات رايقۇل, «ەگەمەن قازاقستان»