جولاۋشىلارعا قىزمەت كورسەتۋ ساپاسى قاتاڭ باقىلاۋدا

استانا اكىمدىگىندە تاتيانا نانوشكينانىڭ 7 ناۋرىزدا №64 باعدارداعى اۆتوبۋستا ورىن العان جاعدايعا قاتىستى ءوتىنىشى قارالدى. جۇرگىزۋشى م. مىرزاحمەتوۆقا جانە كوندۋكتور ك. ومەشوۆاعا «№ 7 اۆتوپارك» جشس سوگىس جاريالادى, دەپ حابارلايدى قالا اكىمدىگىنىڭ رەسمي سايتى. استانا اكىمدىگى جولاۋشىلارعا قىزمەت كورسەتۋ ساپاسىنا, سەرۆيس دەڭگەيىنە جانە جۇرگزۋشىلەر مەن كوندۋكتورلاردىڭ تارتىبىنە باسا نازار اۋدارادى. وعان بيىلعى جىلدىڭ 12 قاڭتارىندا وتكىزىلگەن كولىك ماسەلەلەرى جونىندەگى قوعامدىق تىڭداۋ دالەل بولا الادى. شارا بارىسىندا حالىققا قىزمەت كورسەتۋ ماسەلەلەرى مەن ولاردى شەشۋ بويىنشا مىندەتتەر اتاپ كورسەتىلدى. وسىعان بايلانىستى, 10 ناۋرىزدا استانا قالاسىنىڭ جولاۋشىلار كولىگى باسقارماسىنىڭ باسشىسى ب. يگەنبەردينوۆتىڭ جەتەكشىلىگىمەن بارلىق اۆتوبۋس پاركتەرىنىڭ اكىمشىلىكتەرىنىڭ قاتىسۋىمەن قابىلدانىپ جاتقان شارالاردى تالداۋ بويىنشا جيىن وتكىزىلەدى. جيىندا اۆتوبۋس جۇرگىزۋشىلەرىنىڭ مارشرۋتتا ارالىقتى ساقتاۋ جانە جول قوزعالىسى ەرەجەلەرىن بۇزۋ سياقتى ءوز مىندەتتەرىن ورىنداماۋى, سونىمەن قاتار, حالىققا قىزمەت كورسەتۋ دەڭگەيىنىڭ تومەندىگى ءسوز بولماق.