ديماش ورىنداعان «دايديداۋ» ازيا اندەرىنىڭ رەيتينگىنە ەندى

قازاقستاندىق جاس ءانشى ديماش قۇدايبەرگەن وتكەن اپتادا قىتايداعى «I’m a Singer» ءان بايقاۋىنىڭ جەتىنشى كەزەڭىندە ونەر كورسەتىپ, اسپاناستى ەلىنە قازاقتىڭ ءانىن تانىتقان ەدى. بۇل كۇندە ديماش شىرقاعان «دايديداۋ» ءانى «ازيانىڭ جاڭا اندەرى» (Freshasia music) رەيتينگىندە 107 341 ۇپايمەن 15-ورىننان كورىندى. ال ونىڭ بۇعان دەيىنگى شىرقاعان «Adagio» مەن «SOS d'un terrien en détresse» اندەرى سايكەسىنشە 41 جانە 50-ورىنداردى يەلەندى, دەپ حابارلادى قازاقپارات. قازاقتىڭ «دايديداۋ» ءانى قىتاي تىلىندە دە شىرقالعان. شىڭجاڭدىق ءانشى گاو ءيىن 2012 جىلى اتالمىش ءان قامتىلعان حالىق اندەرى البومىن شىعارىپ, يتاليانىڭ «Premio Lunezia» سىيلىعىن جەڭىپ العان بولاتىن. ايتا كەتەيىك, ديماش قۇدايبەرگەن 2015 جىلى «سلاۆيان بازارى» حالىقارالىق ءان بايقاۋىندا وسى «دايديداۋ» انىمەن باس جۇلدەگە يە بولعان. «ازيانىڭ جاڭا اندەرى» رەيتينگى ازيالىق انشىلەردىڭ قىتايداعى تانىمالدىلىعىنا بايلانىستى جاسالادى. وندا اندەردىڭ تىڭدالىمى, اقىلى تۇردە جۇكتەپ الىنۋى بويىنشا ۇپايلار بەرىلىپ, رەيتينگ قۇرىلادى. ول ءار 10 مينۋت سايىن جاڭارتىلىپ, جىل سوڭىندا ۇزدىك رەيتينگ جاريالانادى.