وتكەن تۇندە چەمپيوندار ليگاسىنىڭ 1/8 فينالى اياسىندا «بارسەلونا» ءوز الاڭىندا فرانتسيانىڭ «پاري سەن جەرمەن» كومانداسىن 6:1 ەسەبىمەن جەڭىپ, فۋتبول تاريحىنداعى ەڭ ۇزدىك كامبەك جاساعان بولاتىن. العاشقى ويىندا كاتالوندىقتار 0:4 ەسەبىمەن ويسىراي ۇتىلعانىنا قاراماستان, جەڭىسكە جەتىپ, شيرەك فينالعا جولداما الدى. چەمپيوندار ليگاسىندا وسىعان ۇقساس قانداي ويىندار تىركەلگەن ەكەن؟
«باۆاريا» 1:2 «مانچەستەر يۋنايتەد»
1998/1999 ماۋسىمىنداعى فينال. نەمىس كومانداسى نەگىزگى ۋاقىتتىڭ سوڭىنا دەيىن ءبىر گول سوعىپ, الدا كەلە جاتقانمەن, قوسىمشا بەرىلگەن مينۋتتاردا ەكى بىردەي دوپ جىبەرىپ الىپ, قولدا تۇرعان جەڭىستەن ايىرىلىپ قالعان. گولداردى سوققاندار: باسلەر 5 – شەرينگەم 90, سۋلشەر 90.«دەپورتيۆو» 4:0 «ميلان»
2003/2004 ماۋسىمىنىڭ شيرەك فينالىنىڭ العاشقى ويىنىندا يتاليالىق كوماندا «دەپورتيۆونى» 4:1 ەسەبىمەن جەڭگەنمەن, ەكىنشى ماتچتا 0:4 بولىپ ۇتىلدى. گولداردى سوققاندار: پاندياني 5, ۆالەرون 35, لۋكە 44, فران 76.«ميلان» 3:3 (پەنالتي 2:3) «ليۆەرپۋل»
2004/2005 ماۋسىمىنىڭ فينالدىق كەزدەسۋى ءالى كۇنگە دەيىن جانكۇيەرلەردىڭ ەسىندە بولار. «ميلان» ءبىرىنشى تايمدا ءۇش گول سوعىپ, العا شىققانمەن, ويىننىڭ ەكىنشى بولىگىندە ءدال وسىنداي دوپ جىبەرىپ الدى. ال پەنالتي سەرياسىندا «ليۆەرپۋل» باسىم ءتۇسىپ, تاريحي جەڭىسكە قول جەتكىزگەن بولاتىن. گولداردى سوققاندار: مالديني 1, كرەسپو 39, 44 – دجەررارد 54, شميتسەر 56, حابي الونسو 60.«بورۋسسيا» 3:2 «مالاگا»
2012/2013 ماۋسىمىنىڭ 1/4 فينالىندا قوس ۇجىم جارتىلاي فينالدى ساراپقا سالدى. «مالاگانىڭ» الاڭىندا وتكەن كەزدەسۋ 0:0 ەسەبىمەن اياقتالعان سوڭ, ەكىنشى ماتچتا دورتمۋندىقتار فاۆوريت رەتىندە ەسەپتەلگەن. بىراق «سيگنال يدۋنا پارك» ستاديونىندا وتكەن ويىننىڭ نەگىزگى ۋاقىتىندا «بورۋسسيا» 1:2 ەسەبىمەن جەڭىلىپ جاتقان. نامىسقا تىرىسقان ولار قوسىمشا بەرىلگەن مينۋتتاردا ەكى گول سالىپ, قاجەتتى جەڭىسكە جەتتى. گولداردى سوققاندار: لەۆاندوۆسكي 40, رويس 90, سانتانا 90 – حواكين 25, ەليزەۋ 82.«استانا» 4:3 حيك
ەلوردا تورىندە وتكەن تارتىستى كەزدەسۋ قازاقستاندىق جانكۇيەرلەردىڭ ەسىندە ماڭگى قالار. 2015 جىلى وسى ءتۋرنيدىڭ ءۇشىنشى ىرىكتەۋ كەزەڭىندە فينليانديانىڭ كومانداسىمەن كەزدەسىپ, 4:3 ەسەبىمەن جەڭىسكە جەتكەن. ستانيمير ستويلوۆ شاكىرتتەرى 44-مينۋتقا دەيىن ەكى گول جىبەرىپ الىپ, جەڭىلىپ جاتقان. استانالىقتار بارىن سالىپ العاشقى تايمدا ەسەپ ايىرماشىلىعىن قىسقارتسا, كەلەسى تايمدا پەنالتيدەن ءارى دميتري شومكونىڭ ادەمى گولىنىڭ ارقاسىندا العا شىققان ەدى. بىراق ماتچتىڭ نەگىزگى ۋاقىتىنىڭ اياقتالۋىنا ءتورت مينۋت قالعاندا فينليانديالىقتار تارازى باسىن تەڭەستىرىپ ۇلگەردى. سوڭعى مينۋتتاردا «استانا» جەڭىستى گولدى سالىپ, كەلەسى كەزەڭگە جولداما العان ەدى. گولداردى سالعاندار: دجاللوۋ 4, بااح 42, زەنەلي 86 (پەنالتي) – تۆۋماسي 44, كانياس 47 (پەنالتي), شومكو 56, پوستنيكوۆ 90. ايتا كەتەيىك, كەلەسى كەزەڭدە ەلوردالىقتار اپوەل كومانداسىنان باسىم ءتۇسىپ, ءوز تاريحىندا العاش رەت چەمپيوندار ليگاسىنىڭ توپتىق كەزەڭىنە شىققان بولاتىن.
