ستۋدەنتتەرگە مەملەكەتتىك گرانت بەرىلدى

ۇلتتىق بىرىڭعاي تەست ءومى­رى­مىزگە ەتەنە ەنىپ كەتكەلى قاشان. وسى تەست ءبىر بالانىڭ باعىن جان­دىرسا, ەكىنشىسىنىڭ جولىن بايلاپ جاتادى. باعى جانعانى بەلگىلى. ال جولى بايلاندى دەگەندە نەنى اي­تىپ وتىرمىز؟ ماسەلەن, تالاپكەر 100 بالدان ارتىق جينايدى. بىراق كونكۋرستىڭ جوعارىلىعىنان الگى جيناعان بالى ىسكە اسپاي قالادى. قىسقاسى, سىناقتان قۇلايدى. دەگەنمەن, ەسىل ەڭبەك پەن جيعان ءبىلىم دالاعا كەتپەۋى ءۇشىن اقىلى نەگىزدە وقۋعا تۇسەدى. كەلەر جىلى تاپسىرۋ ءۇشىن, وعان ۋاقىت كەتەدى. ءبىر جىلدان كەيىن بيىلعى ءبىلىم كومەسكىلەنىپ, ميدان وشە باس­تاي­دى. سونىمەن ءبىلىم-بىلىگىنە قارا­ماس­تان بالا اقىلى نەگىزدە وقۋعا ءماجبۇر بولادى. وسى ارادا بالانىڭ تاعدىرىنا مەملەكەت ارالاسىپ جاتىر. قالاي دەرسىز؟ ءبىرىنشى كۋرستىڭ قىسقى ءجا­نە جازعى ەمتيحانى كەزىندە ۇبت-دان جوعارى بالل جيناعان, وقۋعا اقىلى نەگىزدە تۇسكەن, سو­نى­مەن قاتار ەمتيحاندى جاقسى با­عاعا تاپسىرىپ, ءوزىنىڭ العىر­لى­عىمەن كوزگە تۇسكەن ستۋدەنتتەرگە مەملەكەت ارنايى ءبىلىم گرانتتا­رىن بولەدى. كەشە عانا اقىلى نەگىزدە وقىپ, اتا-اناسىنىڭ قالتا­سىنا ءتۇسىپ وتىرعان بالا ءبىر كۇن­دە مەملەكەتتىك گرانتقا اۋىسادى. وسىنداي قۋانىشتى جاعداي قور­قىتاتا اتىنداعى مەملەكەتتىك ۋنيۆەرسيتەتىندە دە ورىن الدى. جۇزدەرى بال-بۇل جانعان, شوق-شوق گۇل قۇشاقتاعان ستۋدەنتتەر­دىڭ قۋانىشى قوينىنا سىيماي جۇرگەنى بىردەن بايقالادى. ال ءاربىر ستۋدەنتتىڭ جانىندا جۇرگەن اتا-انانىڭ تەبىرەنىسى ءتىپتى بولەك. پەرزەنتتەرى القاشقى سىناقتا ءسۇ­رىنگەنىمەن, وزدەرىنىڭ ءبىلىم-بىلىگىن دالەلدەي وتىرىپ, مەملەكەتتىك گرانتقا يە بولىپ جاتىر. – ەلباسى نۇرسۇلتان نازارباەۆ نەگىزىنەن ءۇش مەملەكەتتىك باع­دارلامانى نازاردا ۇستايدى. ولار – دەنساۋلىق ساقتاۋ, ءبىلىم بەرۋ, ءتىل ماسەلەلەرى. جىل سايىن جوعارى وقۋعا تۇسكىسى كەلەتىن تالاپكەرلەرگە 35 مىڭ گرانت بولىنەدى. ارينە, گرانتقا ىلىنبەي قالعان, بىراق جو­عارعى بالل جيناعان بالالار قاي ايماقتان بولسا دا تابىلادى. سون­دىقتان, 2009 جىلدان باستاپ ەل­باسىنىڭ تىكەلەي تاپسىرما­سى­مەن رەسپۋبليكا بويىنشا قوسىم­شا گرانتتار بولىنەتىن بولدى. بۇگىن ءبىز اقىلى نەگىزدەن مەملەكەتتىك گرانتقا اۋىسقان 44 ستۋدەنتتى ماراپاتتاعالى وتىرمىز, – دەدى قورقىتاتا اتىنداعى مەملەكەتتىك ۋنيۆەرسيتەتتىڭ رەكتورى باي­زاق مومىنباەۆ. 44 ستۋدەنت مەملەكەتتىك گرانت­قا يە بولدى. بۇل – 44 تاعدىردىڭ ومىرىنە قۋانىش كىرىپ, مەملەكەت­تىڭ ىستىق الاقانىن سەزىندى دەگەن ءسوز. مۇنداي جاقسىلىق, شۋاقتى كۇن­دەر ۇمىتىلمايدى. سوندىق­تان وسى ستۋدەنتتەر ەرتەڭ مامان رەتىندە ەل دامۋىنا زور ۇلەس قو­سا­تىنى دا شىعار كۇندەي اقيقات. ەرجان بايتىلەس. قىزىلوردا.