گولوۆكين: الۆارەسپەن جەكپە-جەگىم كەلەسى جىلعا قالاتىن سياقتى

ورتا سالماقتا WBA (Super), IBO, WBC جانە IBF تۇجىرىمدارى بويىنشا الەم چەمپيونى قازاقستاندىق گەننادي گولوۆكين (36-0, 33 كو) قارسىلاستارىنا نەلىكتەن سىيلاستىقپەن قارايتىنىن, سونداي-اق مەكسيكالىق ساۋل «كانەلو» الۆارەسپەن وتەتىن جەكپە-جەگى كەلەسى جىلعا قالۋى مۇمكىن ەكەندىگىن مالىمدەدى. «بۇل ءومىر, ال بوكس – سپورت. اركىم ءوز مىندەتىن لايىقتى تۇردە ورىنداۋى قاجەت. مەن ءوز جۇمىسىمدى جاقسى بىلەمىن. قارسىلاستارىما بارىنشا سىيلاستىقپەن قاراۋعا تىرىسامىن», – دەدى گولوۆكين CBSsports.com تىلشىسىمەن سۇحباتتا. «الۆارەسپەن ءوتۋى ءتيىس جەكپە-جەگىم جايلى ايتار بولسام, پروموۋتەرىم توم لەففلەرمەن سويلەستىم. ول Golden Boy (الۆارەستىڭ پروموۋتەرلىك كومپانياسى) وكىلدەرىمەن بايلانىسقا شىققان ەكەن, مەكسيكالىق بوكسشىنىڭ تارابى تەك ءبىر جىلدان كەيىن ۇيىمداستىرايىق دەگەن جاۋاپ بەرىپتى. ونىمەن جۇدىرىقتاسۋعا ىلعي دا دايىنمىن. «كانەلو» ەكەۋىمىز جونىندە تىم كوپ جاڭالىقتار تاراپ كەتىپتى. بۇل تۋرالى كەيىنىرەك ايتارمىن. قازىرگى ۋاقىتتا ويىمنىڭ ءبارى دەننيەل دجەيكوبسپەن وتەتىن ايقاسىم جايلى», – دەدى قازاقستاندىق بوكسشى. ايتا كەتەيىك, گولوۆكين مەن الۆارەس اراسىنداعى جەكپە-جەك وتكەن جىلى ءوتۋى ءتيىس بولاتىن. بىراق قوس تاراپ ءالى كۇنگە دەيىن قارجى ماسەلەسىندە ورتاق ىمىراعا كەلە الماي ءجۇر. 18 ناۋرىزدا گەننادي WBA (Regular) بەلبەۋىنىڭ يەگەرى, امەريكالىق دەننيەل دجەيكوبسپەن جۇدىرىقتاسسا, «كانەلو» 6 مامىر كۇنى وتانداسى كىشى حۋليو سەزار چاۆەسپەن قولعاپ تۇيىستىرەدى.