استاناعا قاراعاندا الماتىدا ءۇي قۇرىلىسى جاقسى جۇرۋدە

تۇرعىن ءۇي قۇرىلىسى رەكورد جاڭارتىپ جاتىر. 2017 جىلدىڭ قاڭتار ايىندا قۇرىلىس كومپانيالارى بىلتىرعىدان 1,37 ملن شارشى مەتر ارتىق سالدى. بۇل وتكەن جىلعىمەن سالىستىرعاندا 80 پايىزعا كوپ. بۇل تۋرالى energyprom.kz ساراپتاما قىزمەتى جازادى. سايتتىڭ حابارلاۋىنشا, ينۆەستيتسيا اعىمىنىڭ كوپتىگى دە الداعى ۋاقىتتا بۇل سالانىڭ قارقىنىن جوعالتپايتىنىنان حابار بەرەدى. قاڭتار ايىندا سالاعا سالىنعان كاپيتال كولەمى 59 ملرد تەڭگە بولعان. جاڭا سالىنعان ۇيلەردىڭ كوپتىگى جاعىنان الماتى كوش باسىندا. قاڭتار ايىندا سالىنعان 475,4 مىڭ شارشى مەتر قۇرىلىس وتكەن جىلدىڭ وسى ۋاقىتىمەن سالىستىرعاندا 3,6 ەسە ارتىق. الماتىداعى قۇرىلىس جالپى ەلدەگى سالىنعان پاتەرلەردىڭ 34,8 پايىزىن قۇرايدى. ال ەكىنشى ورىنداعى استانانىڭ ۇلەسىنە ەلدەگى پايدالانۋعا بەرىلگەن پاتەر كولەمىنىڭ 22,2 پايىزى تيەسىلى. مۇنداعى سالىنعان 302,9 مىڭ شارشى مەتر بىلتىر وسى ايداعى كورسەتكىشپەن سالىستىرعاندا 71,5 پايىزعا ارتىق. جالپى ءۇي قۇرىلىسىنىڭ 47,9 پايىزىن قۇرىلىس كومپانيالارى سالسا, 44,5 پايىزىن حالىق سالعان. ال 7,6 پايىزى مەملەكەتتىڭ ۇلەسىندە. ايتا كەتەرلىگى, مەملەكەتتىڭ قۇرىلىس سالۋ كورسەتكىشى بىلتىرعىمەن سالىستىرعاندا 12,6 پايىزعا ازايعان. 2017 جىلى "نۇرلى جەر" باعدارلاماسى بويىنشا, 10 ملن شارشى مەتردەن استام ءۇي سالۋ جوسپارلانعان. سونڭ ىشىندە 1,6 ملن شارشى مەتر (28 مىڭ پاتەر) مەملەكەتتىك ينۆەستيتسيا ەسەبىنەن سالىنسا, تاعى 8 مىڭدايى العاشقى باسپانا الۋ ءۇشىن يپوتەكالىق قارىزعا, قالعان 600 مىڭ شارشى مەترى قۇرىلىس كومپانيالارىنىڭ نەسيەلەرىن سۋبسيديالاۋ ەسەبىنەن سالىنباق. كوپجىلدىق كورسەتكىشكە قارايتىن بولساق, ەلدەگى قۇرىلىس سالاسى جىل سايىن رەكورد جاڭاتىپ كەلەدى. 2016 جىلعى سالىنعان ءۇيدىڭ جالپى اۋماعى (10,51 ملن شارشى مەتر) 2015 جىلعى كورسەتكىشتەن 17,6 پايىزعا ارتىق بولعان. ال 2015 جىلى 2014 جىلعى كورسەتكىشتەن 18,9 پايىزعا ارتىق سالىنعان.