گۇل-كوكتەمنىڭ ك ۇلىمدەگەن كۇنىمەن بىرگە كەلىپ جەتكەن ارۋلار مەرەكەسىنە وراي, ەلباسىنىڭ جىل سايىن نازىك جاندار قاۋىمىنىڭ وكىلدەرىمەن جۇزدەسىپ, قۇتتىقتاۋى ءداستۇرگە اينالعان. بيىل دا ونەرىمەن, ەڭبەگىمەن ەلەنىپ جۇرگەن ارۋلارمەن مەملەكەت باسشىسىنىڭ «كوكتەم شۋاعى» اتتى كەزدەسۋى ءوتتى.
پرەزيدەنت كەزدەسۋگە كەلگەن قىز-كەلىنشەكتەردىڭ ارقايسىسىنا كوڭىل-ءبولىپ, ەمەن-جارقىن اڭگىمەلەستى.
– قىمباتتى حانىمدار! جىل سايىن اقوردادا ءداستۇرلى «كوكتەم شۋاعى» ءدال وسى كەزدە وتكىزىلەدى. ونى وزدەرىڭىز بىلەسىزدەر. الداعى كەلە جاتقان مەرەكە – ايەلدەر كۇنى بارشاڭىزعا قۇتتى بولسىن! باق-بەرەكە, جاقسىلىق تىلەيمىن! بۇگىن ءبىزدىڭ ورتامىزدا ايەل ازاماتتاردىڭ ءار سالادا قىزمەت ءىستەپ جۇرگەن وكىلدەرى بار. كوپ بالالى انالار, دەپۋتاتتار, عالىمدار, سوت, ديقان, كاسىپكەر, ونەرتاپقىش, ءدارىگەر, ءانشى, جۋرناليست, اكتريسا, سپورتشى, جاۋىنگەرگە دەيىن ارامىزدا وتىر,– دەگەن ەلباسى ەلىمىزدە ايەلدەردىڭ ءرولىنە ءار ۋاقىتتا نازار اۋدارىلىپ كەلە جاتقانىن ايتتى.
– ءبىز – انانى, ايەلدى ءار ۋاقىتتا قۇرمەتتەپ, جوعارى باعالاعان حالىقپىز. باتىر انالارىمىز ەل باسىنا كۇن تۋعاندا ەر-ازاماتتارمەن بىرگە قولىنا قارۋ الىپ, وتان قورعاعان. ەل ءۇشىن ەر-ازاماتتارمەن بىرگە جاۋعا شاپقان بوپاي حانىم, حيۋاز دوسپانوۆا, ءاليا, مانشۇكتەر وشپەس ەرلىكتەرىمەن ەلدىڭ ساناسىندا قالعانىن ءبارىمىز جاقسى بىلەمىز. قازاق ايەلدەرىنىڭ اراسىندا زور قۇرمەتكە ءبولەنگەن ۇلكەن انالارىمىز دومالاق انا, ايشا ءبيبى, ايعانىم حانشا, زەرە اجەلەرىمىز پاراساتتىڭ سيمۆولى بولىپ سانالادى. بۇگىنگى قازاقستان ايەلدەرى – سول پاراساتتى جالعاستىراتىن, اڭىزعا اينالعان انالارىمىزدىڭ جولىن جالعايتىن ءىزباسارلارى. ءبىز ارقاشان «ايەل – ءۇيدىڭ قازىعى» دەپ ايەلىن قۇرمەتتەگەن حالىقپىز. «قىز وسسە ەلدىڭ كوركى» دەپ قىزىن قۇرمەتتەگەن حالىقپىز. ۇلى دالادا قيلى زاماننان كەلە جاتقان يگى ءداستۇر قازىر دە جالعاسۋدا, – دەدى ن.نازارباەۆ.
مەملەكەت باسشىسى ءوز سوزىندە ايەلدەر قاۋىمىنىڭ قازاقستان قوعامىن دامىتۋعا سۇبەلى ۇلەس قوسىپ كەلە جاتقانىن ايتتى. نازىك جاندىلار بۇگىندە قول قۋسىرىپ قاراپ وتىرماي, ەل ەكونوميكاسىنىڭ بارلىق سالاسىندا, مەملەكەتتىك قىزمەتتە, عىلىمدا, جەكە كاسىپكەرلىكتە, ءبىلىم بەرۋ مەن دەنساۋلىق ساقتاۋ سالالارىندا ەڭبەك ەتىپ جاتىر. بۇگىندە مەملەكەتتىك قىزمەتكەرلەردىڭ 55 پايىزىن ارۋلار قۇرايدى. ءبىلىم بەرۋ سالاسىندا – 65 پايىز, دەنساۋلىق ساقتاۋ ىسىندە 75 پايىز ايەلدەر جۇمىس ىستەيدى. جەكە كاسىپكەرلىكپەن اينالىساتىن جانداردىڭ تەڭ جارتىسىنا جۋىعى نازىك جاندىلار, شاعىن جانە ورتا بيزنەستىڭ 42 پايىزى ايەلدەر قاۋىمىنىڭ قولىندا. «بولاشاق» باعدارلاماسىمەن شەتەلدەردە ءبىلىم العان 12 مىڭنان استام جاستىڭ جارتىسى قىزدار.
– ءبىز قاسيەتتى تاۋەلسىزدىگىمىزدىڭ ءۇشىنشى مۇشەلىنە اياق باستىق. وسى جىلداردا مەملەكەتتىگىمىز نىعايىپ, اياعىنا نىق تۇرۋىنا ايەلدەردىڭ قوسقان ۇلەسى ەرەكشە. ەلىمىزدە ەڭبەك ەتەتىن ازاماتتاردىڭ تەڭ جارتىسىنان كوبى قىز-كەلىنشەكتەر. ايەلدەر ۇكىمەت قۇرامىندا, پارلامەنت قابىرعاسىندا, ءتۇرلى دەڭگەيدەگى اكىمدىكتەردە تابىستى جۇمىس اتقارۋدا,– دەدى ەلباسى.
مەملەكەت باسشىسى اتاپ وتكەندەي, قازىرگى تاڭدا ەلىمىزدە ەڭبەك ەتەمىن, تابىس تابامىن دەگەن جانعا بارلىق جاعداي جاسالىپ جاتىر. ەڭ باستىسى, ەل ىرگەسى تىنىش, تاتۋلىق پەن تۇراقتىلىق بار. بۇل ەڭ ماڭىزدى ماسەلە بولىپ تابىلادى.
– بۇۇ مالىمەتتەرىنە سۇيەنسەك, بۇگىندە جەر جۇزىندە 1 ميللياردقا جۋىق ادام اشتىقتان ازاپ شەگۋدە, 3 ميلليارد ادام تاقىر كەدەي, 16 ميلليون ادام قۇلدىقتا ءومىر سۇرەدى. 65 ميلليون ادام بوسقىن بولىپ, شىبىن جانى ءۇشىن جات جەردە باس ساۋعالاپ ءجۇر, ونىڭ جارتىسى جاستار مەن سابيلەر. وسىنداي الماعايىپ زاماندا ەلىمىزدىڭ بەيبىتشىلىككە بولەنۋى بىرلىك پەن بەرەكەگە ۇيىپ, تاتۋلىقتى تۋ ەتكەنىنىڭ ارقاسى. ەلىمىزدە جىل سايىن مىڭداعان جاڭا جۇمىس ورنى اشىلىپ جاتىر. ەڭبەك ەتەمىن دەگەن جانعا بارلىق مۇمكىندىك جاسالۋدا. ءبىز – تاۋبەسىنەن جاڭىلماعان ەلمىز. باردى باعالاپ, كوزدىڭ قاراشىعىنداي ساقتاي بىلگەن حالىقپىز. ءارى قاراي دا وسىنى ساقتاي ءبىلۋىمىز كەرەك. تاتۋ ەلدە تاقسىرەت بولمايدى, – دەدى پرەزيدەنت.
ەلباسى ءسوز ەتكەندەي, قازاقستانداعى ءومىر ستاندارتى ورتاشا الەمدىك كورسەتكىشتەن اسىپ تۇسەدى. ەلىمىزدەگى تۇرعىنداردىڭ ادامي سۇرانىستارىنىڭ, قاجەتتىلىكتەرىنىڭ ارتۋى قالىپتى قۇبىلىس. بۇل تۋرالى پرەزيدەنت سينگاپۋرداعى جاعدايدى مىسالعا كەلتىرىپ ءوتتى:
– سينگاپۋر الەمدەگى باي مەملەكەتتەردىڭ ءبىرى سانالادى. مەن ەلدى ۇزاق ۋاقىت باسقارعان بۇرىنعى باسشىسىنان «ءسىزدەردە ءبىر ادامعا 60 مىڭ دوللاردان كەلەدى. حالىقتى باسپانامەن قامتاماسىز ەتتىڭىزدەر, ءبارى كۇيلى-قۋاتتى تۇرادى. ولاردىڭ سۇرانىستارى بار ما؟» دەپ سۇرادىم. ول: «ارينە, بولعاندا قانداي. پاتەردە تۇراتىندار جەكە ءۇيلى بولعىلارى كەلەدى. تويوتا ءمىنىپ جۇرگەندەر مەرسەدەسى بولعانىن قالايدى», دەپ جاۋاپ بەرگەن ەدى. بۇل دۇرىس تا. ادامنىڭ ىنتىزارلىعى جۇمىس ءىستەۋگە, اقشا تابۋعا يتەرمەلەيدى جانە ءبۇكىل قوعامدى ىلگەرىلەتەدى, –دەدى مەملەكەت باسشىسى.
ن.نازارباەۆ ەلىمىزدەگى دەموگرافيالىق ساياسات اياسىندا انالار مەن بالالاردى قولداۋعا ەرەكشە كوڭىل بولىنەتىنىنە دە توقتالىپ ءوتتى. وسى كەزدەسۋدە ايتىلعانداي, بيىلعى جىلى پرەزيدەنتتىڭ تىكەلەي تاپسىرماسى بويىنشا 2030 جىلعا دەيىنگى وتباسى جانە گەندەرلىك ساياسات تۇجىرىمداماسىن جۇزەگە اسىرۋ باستالادى. ءشىلدە ايىنان باستاپ دۇنيەگە كەلگەن ءسابي ءۇشىن بەرىلەتىن جورگەكپۇل 20 پايىزعا ارتادى. جىل سايىن انالار مەن بالالاردى قارجىلاي قولداۋ ءۇشىن بولىنەتىن شىعىن كولەمى 160 ميلليارد تەڭگەنى قۇرايدى. تاعى 120 ميلليارد تەڭگە اتا-انالارعا مەملەكەتتىك الەۋمەتتىك ساقتاندىرۋ قورىنان تولەنەدى. سوڭعى ون جىل ىشىندە ەلىمىزدە انالار ءولىمى – 3,7 ەسەگە, ال بالالار ءولىمى 1,5 ەسەگە تومەندەگەن. ءسوز جوق, انالار مەن بالالاردىڭ ءومىرىن ۇزارتۋعا قول جەتكىزۋ – اسا ماڭىزدى ماسەلەلەردىڭ ءبىرى.
نۇرسۇلتان نازارباەۆ ارۋلارعا ەلىمىزدەگى گەندەرلىك ساياساتتى نىعايتۋعا باعىتتالعان بىرقاتار مىندەتتى ايقىنداپ بەردى. ونىڭ ىشىندە وتباسى ينستيتۋتىن نىعايتۋ باستى مىندەتتىڭ ءبىرى بولىپ سانالادى. بۇل ورايدا, ەلباسى قازاقستاندا ەرلى-زايىپتىلاردىڭ جاۋاپكەرشىلىك ارقالاۋعا دايىن بولماۋىنىڭ سالدارىنان نەكەگە تۇرعان ءاربىر ءۇشىنشى جۇپتىڭ اجىراسىپ جاتقانى جونىندە مالىمەت كەلتىردى.
– قازىر ەلىمىزدە اتا-انانىڭ تەك بىرەۋىنىڭ عانا اسىراۋىنداعى تولىق ەمەس جارتى ميلليون وتباسى بار. بۇل ماسەلەنى شەشۋ ءجونىندە شارالار قابىلداۋ قاجەت, – دەدى پرەزيدەنت. سونىمەن بىرگە, مەملەكەت باسشىسى بالالارعا قاتىستى كەز كەلگەن زورلىق-زومبىلىقتى جويىپ, وسكەلەڭ ۇرپاق تاربيەسىن ارناۋلى ۇيىرمەلەر مەن مەكەمەلەردە پاتريوتتىق سەزىمدى كۇشەيتۋ ارقىلى قامتاماسىز ەتۋ قاجەتتىگىنە نازار اۋداردى.
ەلباسى ايتىپ وتكەندەي, الداعى ۋاقىتتا ءتورت جىلدا ءبىر رەت وليمپيادا جەڭىمپازدارى جەتەكشىلىك ەتەتىن بۇكىلقازاقستاندىق بالالار وليمپياداسىن وتكىزۋ ءمۇمكىندىگىن قاراستىرۋعا بولادى. تاعى ءبىر ءماسەلە – ايەلدەردىڭ ورتاشا كىرىس دەڭگەيى ەركەكتەرمەن سالىستىرعاندا ءالى كۇنگە دەيىن ۇشتەن ءبىر مولشەرگە تومەن. مۇنداي جاعدايدىڭ ورىن الۋىنىڭ باستى سەبەبىنىڭ ءبىرى – ۇكىمەت بەكىتكەن ايەلدەر ەڭبەگىن قولدانۋعا تىيىم سالىنعان جۇمىستار ءتىزىمى.
ەلباسى گەندەرلىك ساياساتتىڭ باسىمدىعى بار ءبىر باعىتى رەتىندە انالار مەن بالالار ءۇشىن قولايلى ورتا قالىپتاستىرۋ, سونداي-اق اناعا دەگەن سىيلاستىق ءمادەنيەتىن جانداندىرۋ قاجەتتىگىن ايتىپ ءوتتى.
– بالكىم, بالالار ءۇشىن جالپىۇلتتىق اشىق ەسىك كۇندەرىن وتكىزىپ وتىرۋ كەرەك بولار. قۇرمەتتى حانىمدار, سىزدەردىڭ قولداۋلارىڭىزبەن ءبىز بارلىق جوسپارىمىزدى ىسكە اسىرا الامىز دەپ ۇمىتتەنەمىن, – دەدى مەملەكەت باسشىسى.
جىل سايىن اقوردادا 8 ناۋرىز مەرەكەسىنە وراي وتەتىن كەزدەسۋگە ءار سالادا ەل ءومىرىنە ەلەۋلى ەڭبەك سىڭىرگەن قىز-كەلىنشەكتەر كەلەتىنى بەلگىلى. بيىلعى جۇزدەسۋگە كەلگەن ارۋلاردىڭ اراسىندا دا ەكونوميكا, ونەر, سپورت, دەموگرافيا, دەنساۋلىق ساقتاۋ سىندى سان ءتۇرلى سالادا سۇبەلى ەڭبەك ءسىڭىرىپ جۇرگەن نازىك جاندىلار بار.
اتاپ ايتار بولساق, كەزدەسۋگە پارلامەنت ءماجىلىسىنىڭ دەپۋتاتى, بالا قۇقىقتارى جونىندەگى ۋاكىل زاعيپا باليەۆا, عالىم-ميكروبيولوگ, «بولاشاق» باعدارلاماسىنىڭ تۇلەگى, «ۇزدىك جاس عالىم-2014» بايقاۋىنىڭ جەڭىمپازى ءاليا ەرنازاروۆا, جۋىردا الماتىدا ءوتكەن ۋنيۆەرسيادا-2017 چەمپيونى اننا شەۆچەنكو, قحا مۇشەسى, اۋىل مەكتەبىنىڭ ديرەكتورى, قازاق ءتىلى مەن ادەبيەتى ءپاندەرىنىڭ مۇعالىمى يرينا سەدوۆا, «جاس اتامەكەن» جاس كاسىپكەرلەر كلۋبىنىڭ پرەزيدەنتى زارينا كوكجانوۆا, اقىن, «شابىت» حالىقارالىق بايقاۋىنىڭ لاۋرەاتى تولقىن قابىلشا, ءانشى, حالىقارالىق بايقاۋلاردىڭ جەڭىمپازى ماريا گاليتسكايا, «تەڭىزشەۆرويل» جشس ادام رەسۋرستارىن باسقارۋ باس مەنەدجەرى شولپان التىباەۆا, اۋداندىق اۋرۋحانانىڭ باس دارىگەرى, اۋداندىق ءماسليحات دەپۋتاتى قارلىعاش رازيەۆا, ۇلتتىق ەكونوميكا ۆيتسە-ءمينيسترى ءمادينا ءابىلقاسىموۆا, «استانا-بالەت» تەاترىنىڭ جەتەكشى بالەريناسى ميلانا بۋكانوۆا, كوپ بالالى انا, «كۇمىس القا» يەگەرى وكسانا مۇقاشەۆا, قوبىزشى, حالىقارالىق بايقاۋلاردىڭ لاۋرەاتى اقەركە تاجىباەۆا, استانا قالالىق كامەلەتكە جاسى تولماعاندار ءىسى جونىندەگى مامانداندىرىلعان اۋدانارالىق سوتتىڭ ءتورايىمى نازيليا راززاق, اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ سوليسى وكسانا داۆىدەنكو, قازاقستان رەسپۋبليكاسى قارۋلى كۇشتەرىنىڭ پاراشيۋتپەن سەكىرۋگە دايىنداۋ ورتالىعىنىڭ اعا مامانى ريمما رامازانوۆا, بەلگىلى اكتريسا, ەسترادا ءانشىسى سالتانات باقاەۆا, جۋرناليست, رەسپۋبليكالىق بايقاۋلاردىڭ جەڭىمپازى ۆەنەرا ميرلانقىزى سىندى تانىمال جاندار بولدى.
ەلباسىمەن جۇزدەسكەن نازىك جاندىلار العاشىندا تولقىنىستارىن باسا الماعانى بايقالىپ تۇردى. ولار ەلباسىنا دەگەن لەبىزدەرىن ءبىلدىرىپ, شەكسىز العىستارىن جەتكىزدى. مەملەكەت باسشىسى ولاردى ىقىلاسپەن تىڭداپ, ادەمى ءازىل, ماعىناسى تەرەڭ ءتامسىل ايتىپ وتىردى.
سولتۇستىك قازاقستان وبلىسى ۆوزۆىشەنكو ورتا مەكتەبىنىڭ ديرەكتورى, ۇلتى نەمىس, بالالارعا قازاق ءتىلى مەن ادەبيەتىنەن ساباق بەرەتىنى جوعارىدا ايتىلعان يرينا سەدوۆا وسى كەزدەسۋدە ەلباسى نۇرسۇلتان نازارباەۆقا دومبىرا سىيلادى.
– ءبىزدى الىس-الىس اۋىلداردان, ەلىمىزدىڭ تۇكپىر-تۇكپىرىنەن شاقىرىپ, وسىنداي شۋاقتى كەزدەسۋ ۇيىمداستىرعانىڭىز ءۇشىن سىزگە العىسىم شەكسىز. بۇل – ءبىز ءۇشىن ۇمىتىلماس تاريحي وقيعا! قۇرمەتتى نۇرسۇلتان ءابىش ۇلى, مەنىڭ قازاق ءتىلىن ءبىلۋىم تاعدىرىما ەرەكشە اسەر ەتتى. قازىرگى تاڭدا ءوزىم ءبىلىم العان مەكتەپتىڭ ديرەكتورىمىن ءارى سوندا قازاق ءتىلى مەن ادەبيەتىنەن ساباق بەرەمىن. ەندى اعىلشىن ءتىلىن ۇيرەنىپ ءجۇرمىن. مەملەكەتتىك ءتىلدى ءبىلۋ ءاربىر ازاماتتىڭ پارىزى دەسەك, وزگە ءتىلدى ءبىلۋ ءوزىڭ ءۇشىن كەرەك. سوندىقتان ءسىزدىڭ ءۇش ءتىلدى ءبىلىم بەرۋ تۋرالى باستاماڭىزدى قولدايمىن. اسا قۇرمەتتى ەلباسى! قازاقتىڭ شارشاعانىن باساتىن دا, جان سارايىن اشاتىن دا – قاسيەتتى دومبىرا. ءسىزدىڭ دومبىرانى جاقسى تارتاتىنىڭىزدى ءبارىمىز دە بىلەمىز. مەن سىزگە 9 پەرنەسىنە قازاقستانداعى 9 ميلليون ايەلدىڭ وزىڭىزگە دەگەن ىقىلاسى سىياتىن دومبىرا سىيلاعىم كەلەدى, – دەدى يرينا سەدوۆا.
– مەملەكەتتىك ءتىلدى بىلەسىڭ, ورىس ءتىلىن بىلەسىڭ. ءوزىڭنىڭ انا ءتىلىڭ – نەمىس ءتىلىن دە بىلەسىڭ. جارايسىڭ!– دەگەن ەلباسى سىيعا تارتقان دومبىرانى قابىل الىپ, ءبىر-ەكى رەت شەرتىپ تە كوردى.
«اقىنعا قارا سوزدەن ولەڭ وڭاي» دەگەن قىزىلوردالىق اقىن تولقىن قابىلشا ەل پرەزيدەنتىنە ارنالعان ولەڭىن وقىپ بەردى.
– ءوزىڭىز الاشتىڭ اناسىنا بالاعان سىر ولكەسىنىڭ, قاسيەتتى قىزىلوردا حالقىنىڭ ىستىق سالەمىن الا كەلدىم. بۇگىنگىدەي شۋاقتى مەرەكەدە جۇزدەسۋ, ديدار-عانيبەت بولۋ ءبىز ءۇشىن ايرىقشا مارتەبە, زور قۋانىش دەپ بىلەمىن. رۇقسات ەتسەڭىز, بۇگىنگى اياۋلى مەرەكەدە جۇرەكجاردى جىرىمدى وقىپ بەرەيىن:
جان بولىپ ءوستىم يبالى, جەتەلەپ يگى
وي-ارمان,
وتاننىڭ سۇلۋ ديدارى, نۇرىنا تاڭنىڭ
بويالعان.
ەركە ءوستىم ەركىن ەلدە مەن,
ايالاپ ازاتتىعىمدى,
پاش ەتتىم بارلىق جەرگە مەن, جاسامپاز
قازاقتىعىمدى.
ارماندى سول ءبىر تىلەدىم, اقيقات
قىلعان جولداسىن,
قازاقتىڭ ءاربىر جۇرەگىن,
تاۋەلسىز قىلعان ەلباسىم,
الىپ تا تۋار انادان, ءتامسىلدى وسى
ويعا الدىم.
ەلباسىن تۋعان دارا ادام,
انادان ءسىزدىڭ اينالدىم.
وتاندى ۇلى بايتاعىم, كوركەيتكەن
سىزگە ارىسىم,
ءيىلىپ راحمەت ايتامىن, ۇرپاعىم
ءۇشىن, ءبارى ءۇشىن,
– دەدى اقىن قىز.
ءوز كەزەگىندە ەلباسى تولقىن قابىلشاعا: «اقىن قىزدارىمىزدىڭ جولىمەن ءجۇرىپ كەلە جاتىرسىڭ. تابىستى بول, ارۋاقىتتا وركەنىڭ ءوسسىن! شابىتىڭ تاسي بەرسىن!» –دەپ تىلەگىن ءبىلدىردى.
بەلگىلى ءانشى مارينا گاليتسكايا وسى كەزدەسۋدە قازاقتىڭ تانىمال كومپوزيتورى بەكەن جاماقاەۆتىڭ «ماحاببات ءۆالسى» اتتى تانىمال ءانىن شىرقاپ بەردى. مەملەكەت باسشىسى ءانشى قىزدىڭ ونەرىنە ريزا بولىپ, تاعى ءبىر ءان ورىنداۋىن ءوتىندى. مارينا دا پرەزيدەنتتىڭ ءوتىنىشىن قابىل الىپ, تاعى ءبىر ءان ورىندادى.
وسى كەزدەسۋدە مەملەكەت باسشىسى كوپ بالالى انا, «كۇمىس القا» يەگەرى وكسانا مۇقاشەۆانى ارۋلار مەرەكەسىمەن قۇتتىقتاپ, «التىن القامەن» ماراپاتتادى. وكسانا اناتولەۆنا مۇقاشەۆا سەمەي قالاسىنداعى ەمحانادا مەدبيكە بولىپ جۇمىس ىستەيدى. سەرىك مۇقاشەۆ ەسىمدى ۇلتى قازاق ازاماتىنا تۇرمىسقا شىققان. مۇقاشەۆتار وتباسى بالالارىنىڭ الدى بۇگىندە وقۋ وزاتى, كاراتە كەوكۋشينكاي سىندى سپورت تۇرىنەن وبلىستىق, رەسپۋبليكالىق جارىستاردا توپ جارىپ ءجۇر ەكەن.
– بار بولعانى 38 جاستا, «باتىر انا» اتاعىنىڭ يەگەرى. ءتورت ۇل, ءۇش قىزدى تاربيەلەپ وتىر. «التىن القانى» ۇلكەن ىقىلاسپەن تابىستايمىن,– دەدى ەلباسى نۇرسۇلتان نازارباەۆ.
كوكتەممەن ىلەسىپ كەلگەن ارۋلار مەرەكەسىندە ءار سالادا ەڭبەگىمەن ەلەنىپ, ەلدىڭ دامۋىنا سۇبەلى ۇلەس قوسىپ جۇرگەن نازىك جاندىلارمەن جۇزدەسكەن ەلباسى ولارمەن ەمەن-جارقىن اڭگىمەلەسىپ, ەلىمىزدىڭ بارلىق ايەلدەر قاۋىمىنا تىلەگىن ايتتى. ءجۇزدەسۋگە قاتىسقان ارۋلار دا وسى كەزدەسۋ ءۇشىن مەملەكەت باسشىسىنا العىستارىن جەتكىزدى. وزدەرىنىڭ كاسىبي جانە كۇندەلىكتى ومىردەگى جەتىستىكتەرىمەن ءبولىستى. كەزدەسۋ سوڭىندا پرەزيدەنت ارۋلارعا اقوردا عيماراتىن ارالاتىپ, ەكسكۋرسيا جۇرگىزدى.
* * *
اقورداداعى سالتاناتتى شارادان كەيىن جىلداعى داستۇرمەن استاناداعى «قازاقستان» ورتالىق كونتسەرت زالىندا 8 ناۋرىز حالىقارالىق ايەلدەر كۇنىنە ارنالعان مەرەكەلىك كونتسەرت ءوتتى.
اق جاۋلىقتى انالار مەن قىرمىزىداي قىز-كەلىنشەكتەردىڭ قۇرمەتىنە ارنالاتىن وسى كونتسەرت مول اسەرگە, ماحاببات پەن شاپاعاتقا, مەيىرىم مەن شۋاققا تولى بولاتىنىن كوزىمىز كورىپ ءجۇر. بۇل جولى دا ايەلدەر كۇنى مەرەكەسىنە ارنالعان باستى كونتسەرت ەلباسى ن.نازارباەۆتىڭ قاتىسۋىمەن ءوتتى.
نەبارى ءبىر ساعاتقا جۋىق ۋاقىتقا سوزىلعانىمەن, كورەرمەندەر سالتاناتتى باعدارلامانىڭ كۋاسى بولدى. ولار بالالاردىڭ انالارىنا ارناعان جۇرەك سىرلارىنا ەلجىرەدى, وتاندىق ونەرپازداردىڭ زاماناۋي جانە ءداستۇرلى اندەرى مەن وپەرانى دا سۇيسىنە تىڭدادى. شارادا سۇندەت بايعوجين, التىناي جوراباەۆا, قاراقات ءابىلدينا, ايقىن تولەپبەرگەن, «جىگىتتەر» توبى جانە تانىمال انشىلەر مەن بي ۇجىمدارى اسەم ءان مەن بيدەن شاشۋ شاشتى. ايتا كەتەيىك, «الەمنىڭ جارىعى» دەگەن اتپەن ۇيىمداستىرىلعان كونتسەرتكە وسى كۇنى اقوردادا پرەزيدەنتتىڭ قابىلداۋىندا بولعان, قوعامدىق ءومىردىڭ ءار سالاسىندا تابىستى قىزمەت اتقارىپ جۇرگەن 18 قىز-كەلىنشەك قاتىستى.
ارنۇر اسقار,
ايگۇل سەيىلوۆا,
«ەگەمەن قازاقستان»
سۋرەتتەر پرەزيدەنتتىڭ ءباسپاسوز قىزمەتىنەن الىندى
لەبىزدەر لەگى
پاراشيۋتپەن العاش سەكىرگەننەن گورى, ەكىنشى رەت سەكىرۋ قيىن بولدى. سەبەبى, العاش سەكىرەتىن كەزدە كوپ ويلانبايسىڭ. ەكىنشى رەت سەكىرەتىن كەزدە قورقىنىش كۇشتىرەك بولادى, مەنىڭ تىزەم دىرىلدەپ كەتكەنىن دە مويىندايمىن. ۇشۋ قۇرىلعىسىنىڭ بورتىنان سونشاما بيىكتەن ءوز ەركىڭمەن سەكىرۋ كىم-كىمگە بولسا دا وڭاي تيمەيدى.
بىراق, بۇگىن مەن پاراشيۋتپەن سەكىرۋگە قاراعاندا, پرەزيدەنتپەن كەزدەسۋ قيىنىراق ەكەنىن ءتۇسىندىم. بۇل – مەنىڭ ومىرىمدەگى ەڭ تولقىنىستى ءسات. قۋانىشتان كوزىمە جاس كەلدى.
ريمما رامازانوۆا,
قازاقستان رەسپۋبليكاسى قارۋلى كۇشتەرىنىڭ پاراشيۋتپەن سەكىرۋگە دايىنداۋ ورتالىعىنىڭ اعا مامانى
وسى كەزدەسۋگە قاتىسقانىما, ەل پرەزيدەنتىنىڭ الدىندا ءان شىرقاعانىما وتە قۋانىشتىمىن. مۇنداي ءمۇمكىندىك ومىردە ءبىر-اق رەت بەرىلۋى مۇمكىن. سونداي ءمۇمكىندىك ماعان بەرىلگەنىنە قالاي قۋانبايىن؟!
بەلگىلى كومپوزيتور بەكەن جاماقاەۆتىڭ ءانىن ورىنداۋعا الدىن الا دايىندالعانمىن. بىراق ءبارىبىر بۇگىن ەرەكشە تولقىدىم. ءاندى پرەزيدەنت تە, كەزدەسۋگە قاتىسقان باسقالار دا جاقسى قابىلداعان سياقتى. ەكىنشى ءانىم تىم سالماقتىلاۋ سەكىلدى كورىندى, بىراق ول دا ۇنادى عوي دەپ ۇمىتتەنەمىن.
ءوزىمدى باقىتتى سەزىنىپ تۇرمىن. مەنى تاربيەلەپ وسىرگەن, وقىتقان, ونەرىمە قولداۋ كورسەتكەن جاندارعا راحمەت! بۇگىنگى كەزدەسۋگە شاقىرعان جاندارعا دا العىسىم شەكسىز!
مارينا گاليتسكايا,
ءانشى
ءوز باسىم بۇگىنگى كەزدەسۋدەن قاتتى اسەرلەندىم. پرەزيدەنت ەلىمىزدىڭ دامۋ بارىسىندا انالار مەن بالالارعا جاسالىپ جاتقان مەملەكەتتىك قولداۋلار, قوعامداعى ايەلدەر قاۋىمىنىڭ ءرولىن ارتتىرۋ تۋرالى باياندادى. بۇگىنگى كەزدەسۋگە قاتىسىپ, ەلباسىمەن جۇزدەسكەنىم ءۇشىن وتە قۋانىشتىمىن.
مەرەكەگە وراي, قازاقستانداعى بارشا ايەلدەر قاۋىمىنا مىقتى دەنساۋلىق, سارقىلماس قۋانىش, مول باقىت تىلەيمىن! ءار وتباسىندا تاتۋلىق, قايىرىمدىلىق, مولشىلىق بولسىن!
ءمادينا ابىلقاسىموۆا,
ۇلتتىق ەكونوميكا ۆيتسە-ءمينيسترى
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
