تامارا اسار, ءانشى: انام اكەمدى حان سياقتى كۇتەدى

– تامارا, ەميگراتسياعا كەتكەن ءبىر اتاقتى جازۋشىدان: «ءسىز شەتەلگە قونىس اۋداردىڭىز, سودان ومىرىڭىزدە وزگەرىس بولدى ما؟» دەپ سۇراعان ەكەن, «ايتالىق, ءسىز ءبىر ۇيدەن باسقا ۇيگە كوشتىڭىز, سودان ءسىزدىڭ تانىم-تۇسىنىگىڭىز وزگەرە مە؟» دەپ قارسى جاۋاپ قايتارىپتى. الماتىدان استاناعا قونىس اۋداردىڭىز, شىعارماشىلىعىڭىزدا قانداي ەلەۋلى جاڭالىقتار بار؟ – استاناعا دەنساۋلىعىما بايلانىستى قونىس اۋداردىم. الماتىنىڭ اۋاسى ىلعالدى بولعاندىقتان, مەنىڭ تىنىس جولدارىما جاقپادى. ءتۇتىننىڭ ءيىسى قولقامدى قاۋىپ, جوتەلىم جيىلەپ كەتتى. «استانانىڭ اۋاسى كەڭ, وكپە, قولقا جۇمىسىنا قولايلى» دەپ اۋىستىق. تاعدىر ماعان دەنساۋلىقتىڭ قادىرىن ەرتەرەك بىلۋگە ءماجبۇر ەتتى, مەنىڭ دەنساۋلىعىم باسقالارعا قاراعاندا وزگەرەك قاراۋدى قالايتىن دەنساۋلىق. ال, شىعارماشىلىققا كەلسەك, الماتىداعى ونەر استاناعا كەلگەننەن كەيىن دە سونداي ىرعاقتا جالعاسىپ جاتىر. ەڭ باستىسى, جاقىن ادامدارىمنىڭ ءبارى جانىمدا. بالا ومىرگە كەلگەننەن كەيىن تاعدىر ستسەناريىن ءوزى جازادى. وتە ادەمى بالالىق شاعىم بولعانى ءۇشىن باقىتتىمىن. وتباسىندا التى اعايىندىمىز: تاريح پانىنەن ساباق بەرگەن اتا-انامىز ءتورت قىز, ەكى ۇل ءوسىرىپ-باقتى. مەن – بەسىنشى بالامىن. – تەلەديداردان جايناپ تۇرعان ءجۇزىڭىزدى كورىپ, اڭگىمەڭىزدەن وزىڭىزبەن, ومىرىڭىزبەن ۇيلەسىمدە ەكەنىڭىزدى اڭعارامىز. جول اپاتىنان كەيىن ومىرگە قايتا ورالعان ءسىزدىڭ باقىت تۋرالى ولشەمىڭىز دە بولەك بولۋى كەرەك؟ – باقىت وتكەن شاق تا ەمەس, وسى شاقتاعى قۋانىش تا ەمەس, ول ءدال وسى ساتتەگى سەزىنۋ. ءبىز كوبىنە «سول كەزدە باقىتتى بولعان ەكەنمىن-اۋ» دەپ وتكەن شاقتا تۇسىنەمىز. ادامنىڭ جۇرەك تىنىشتىعىنان تۋعان سابىرلى سەزىمىنە كوڭىل قۋانىشى قوسىلسا, ول ءسوزسىز ىشتەي جىميادى. وسى جىميۋدى ىشىڭىزگە ماڭگى ورنالاستىرا الساڭىز باقىت دەگەن سول, مەنىڭشە. سول سەزىمگە ماستانىپ, «باقىتتىمىن» دەسەڭ باسىن الىپ قاشىپ, باسقاعا بارىپ قوناتىن كوشپەلىلىگىن دە ۇمىتپاعان ءجون. «باقىت باسىمنان ۇشىپ كەتتى» دەپ باستى قوس قولداپ ۇستاپ, قايعىعا بەرىلۋ ءتىپتى قاۋىپتى. ەڭ باستىسى, بۇل جەكە ادامنىڭ ساناسىنا دا جاتىردا جاتقان كەزدە قالىپتاسادى. اناسى بەلى تالىپ, توعىز اي كوتەرىپ جۇرگەن كەزىندە قيىندىق كورىپ, قاجىسا, ەكى كوزىنەن جاس كەتپەي جىلاپ ءجۇرىپ سابيىنە جارىق دۇنيە سىيلاسا, ومىرگە كەلگەن بالانىڭ بەتىندە اناسىنىڭ وسى كوڭىل كۇيى ماڭگىلىك تاڭبالانىپ قالادى. اتا-انالارى وسى قاتەلىگىن ءتۇسىنىپ, بالاسىن ماحابباتپەن تاربيەلەسە, سانالى تۇردە وزىمەن دە, پەرزەنتىمەن دە جۇمىس ىستەسە, جىلدارمەن بىرگە بۇل كەمشىلىك جوندەلەدى. ءبىزدىڭ اجەلەرىمىز «باقىتتىمىن» دەپ ايعايلادى ما؟ «شۇكىر» دەپ قويىپ, ابىسىن-اجىنىن, كورشىلەرى مەن كەلىندەرىن جيناپ, باستاڭعىسىن جاساپ, ءجۇنىن ءتۇتىپ, ۇرشىعىن ءيىرىپ, كيىزىن باسىپ, ورمەگىن توقىپ, ءازىلىن ايتىپ, اڭگىمەسىنە ءۇيىرىپ, ءۇي توڭىرەگىن شۋاققا بولەپ جاتاتىن. ولاردىڭ بۇل كۇلكىسى ءبىزدىڭ بۇگىنگى ەكى ەزۋدى قۇلاققا قاراي زورلىقپەن جىلجىتىپ اپارىپ جىمياتىن جاساندى كۇلكىمىز ەمەس. گرۋزيننىڭ ناني برەگۆادزە دەگەن وتە عاجاپ ءانشىسى بار. سول كىسىنى 71 جاسىندا ارنايى ىزدەپ بارىپ, اڭگىمەلەستىم. «ءسىز قازىر قانداي سەزىممەن ءومىر ءسۇرىپ ءجۇرسىز؟» دەگەنىمدە, «مەن ءومىردى ەندى باستاعان سياقتىمىن» دەگەن ەدى. كۇيكى تىرلىكتىڭ بۇرالاڭ جولدارىنىڭ بارىمەن ءجۇرىپ كەلىپ, بارىنەن تازارىپ, بارىنەن ارىلىپ, ءومىردى ساف كۇيىندە تانىعان ادامنىڭ ءسوزى بۇل. كوزدەرىندە باقىت تولىپ تۇردى. جاستىق شاق – كارىلىكتىڭ ستاتسيونارى. ءبىز زەينەتكە شىققانشا نەمەسە ءبىر لاۋازىمنىڭ بيىگىنە جەتكەنشە تاجىريبە جينايمىز. سول جىلدارداعى بىرەۋگە جاساعان قياناتىمىز, كۇپىر ءسوزىمىز اعزامىزدىڭ ءار جەرىنەن سىزداۋىق بولىپ سىر بەرىپ, بورتكەن بوپ بەيمازالىققا ۇرىندىرىپ, جارا بوپ جانىڭدى قيناپ شىعۋى مۇمكىن. دۇنيە سىرىنا تولىقتاي بويلاي المايتىنىمدى, جۇمباعىن شەشىپ تاستامايتىنىمدى بىلەمىن, بىراق وزگەنى تاني الماسام دا, ەڭ بولماسا ءوزىمدى بىلەيىن, ءوزىمدى تانىسام, وزگەنىڭ دە, ءومىردىڭ دە شىندىعىن تابارمىن دەگەن ۇمىتپەن وسى عىلىمعا قىزىقتىم, بوي ۇردىم, ناعىز مامانى بولۋعا جانىمدى سالىپ كىرىستىم. – ونەردە ءجۇرىپ پسيحولوگيا جانە پەداگوگيكا عىلىمىنىڭ Ph.D اتانۋعا تالاپ قىلىپ جاتىر ەكەنسىز. قازاقتىلدى جاقسى پسيحولوگ تا, پسيحواناليتيك تە از عوي, ۆاكۋمدى تولتىرۋعا بەل شەشە كىرىسۋىڭىزدىڭ سىرى نەدە؟ – جىرتقىش اڭ ورماندى كەزگەندە نە ىزدەيدى؟ ازىق ىزدەيدى. سانا بەرىپ جاراتقان سوڭ مەن دە ءوزىمدى ومىردەن ماڭگى ىزدەيمىن. ىزدەنىس الدىمەن بىلىمنەن باستالادى. «ءبىلىم ىزدەيمىن» دەپ ءبىر كىتاپتىڭ ءۇش تاراۋىن وقىپ, ون كىتاپ وقىپ تاۋىسقانداي ءدىلمارسىپ اڭگىمە ايتۋ بۇگىنگى ءبىزدىڭ قوعامنىڭ ءبىرىنشى دەرتى. ءوزىمدى تەرەڭىرەك بىلگىم كەلگەندىكتەن پسيحولوگياعا باس ۇردىم. كەيىن وعان پەداگوگيكانى قوسىپ الدىم. سەبەبى, ادام وزگەگە ۇيرەتۋ ارقىلى ءوزى دە ۇيرەنەدى. مەن پەداگوگيكاعا عاشىق بولدىم. ال, پەداگوگيكاعا عاشىق ەتكەن – شالۆا اموناشۆيلي. جاڭاشىل باعىتتاعى پەداگوگ. وسى كۇنگە دەيىن ساباق بەرەدى, ءبىز ونىڭ سەمينارلارىنا بارىپ تۇرامىز. پەداگوگ دەگەن – تاربيەنىڭ ارحيتەكتورى. ول – ادام ىرگەتاسىن قالاۋشى. دالادا جاڭبىر جاۋىپ تۇرسا, ءبىز قولشاتىرمەن قورعانامىز. سول سياقتى قوعامنان دا قورعاناتىن قۇرال كەرەك. قورعانىسىڭ كۇشتى بولعان سايىن ىشكى دىڭگەك تە مىقتى بولادى. ىشكى دىڭگەكتىڭ السىرەۋى ەموتسياعا بايلانىستى. كيىمى قالىڭ ادام قىستا توڭبايدى, ىستىقتا وعان كۇن وتپەيدى, سول سەكىلدى ءومىردىڭ ىستىق-سۋىعىن تەك قانا سىرتقى قورعانىسىڭ – عىلىم مەن ءبىلىم جانە ىشكى دىڭگەك – اقىل عانا قورعاي الادى. – ەموتسيا دەمەكشى, ونى قانشالىقتى تەجەپ ۇستاي الاسىز؟ – ەموتسيانى تىزگىندەپ, سانانى سالقىنداتىپ, جۇرەكتى تىنىشتاندىرىپ تۇراتىن تەك قانا اقىل. ءوزىمدى اقىلدى سانامايمىن, مەنىڭ دە اقىلسىزدىققا سالىنىپ كەتەتىن كەزدەرىم بار, الدا ءالى دە بولادى, بىراق وزىمە توقتاۋ جاساي الامىن. مۇسىلماننىڭ تىلىندە مۇنى «ءناپسى» دەپ اتايدى. ءناپسىسىن باسىپ, تۇنشىقتىرىپ ۇستاي العان ادام – ەڭ ۇلى ادام. مۇنى ءتۇسىنىپ, ءبىلۋ ءۇشىن باستى بۇركەمەلەپ, ورانىپ-قىمتانىپ ءجۇرۋ شارت ەمەس. بۇگىنگى قوعامدا ءدىننىڭ تىلىمەن سويلەگەننەن عىلىمنىڭ ءتىلى بيىگىرەك تۇرعانىن قالايمىن. «ءدىن – اپيىن» دەگەن زاماندا ءوز اتام دا, ناعاشى اتام دا بەس ۋاقىت نامازىن وقىپ, قۇلشىلىقتان قولدارى بوساماعان. ەندەشە بۇل مەنىڭ ءدىندى تومەن تۇتقانىم ەمەس, اركىمنىڭ ءتىسى باتا بەرمەيتىن ءدىندى ويىنشىق جاساپ, دۇمشە بولعاننان گورى نە نارسەنىڭ دە عىلىمي نەگىزىن تانىماققا ۇمتىلۋ ادامعا الدەقايدا پايدا بەرمەك. – ءبىلىم تۋرالى پىكىرىڭىزدى بىلسەك؟ – ادامعا سالماقتى بولمىستى, ساليحالى مىنەزدى ءبىلىم سىيلايدى. «ينەمەن قۇدىق قازىپ», شاشى اعارعان, كوزاينەگى كەرەقارىس, شالبارىنىڭ سوڭعى رەت قاشان جاڭارعانى بەلگىسىز, دۇنيەنىڭ بار اتاعىن ءبىر ءوزى يەلەنسە دە, ادامعا ىلتيپاتپەن قاراۋدان شارشاماعان عالىمداردى كورگەندە قولىن الىپ, قۇتتىقتاۋعا شاق قالامىن. بۇل ءبىلىمنىڭ قۋاتى, كوپ بىلگەن سايىن تاۋداي تۇلعاسى تۇك بىلمەيتىندەي تۇقىرا تۇسكەن. – الەۋمەتتىك جەلىدە بەلسەندى ەمەس سياقتىسىز... – مەن وقشاۋ ءومىر سۇرگەندى ۇناتامىن. كوپشىلىكتىڭ ىشىندە جۇرسەڭ اداسىپ قالاسىڭ, ال ءوزىڭدى وڭاشادا عانا تاۋىپ, تاني الاسىڭ. مەيلى, بىرەۋلەر مەنى «جاڭالىقتان ماقۇرىم قالعان» دەپ ايىپتاسىن. مەن ول جاڭالىقتى ءۇش كۇننەن كەيىن, ءتىپتى ءبىر اپتادان سوڭ ەستۋىم مۇمكىن. ەگەر مەنىڭ ماماندىعىم سول جاڭالىقتى ءبىلۋىمدى مىندەتتەسە, راس, ايىپتى بولار ەدىم. بىراق مەن ونداي قىزمەتتە ەمەسپىن. «اتىپ كەتىپتى, شاۋىپ كەتىپتى» دەگەن اقپاراتتى ەستىگەنشە, مىناۋ قۋىس كەۋدەمدى بىلىممەن تولتىرايىن, ادام رەتىندە ءوسىپ, جەتىلۋىمە پايداسى بار رۋحاني ازىقپەن سۋسىندايىن. – تامارا, قازىر كەز-كەلگەن الەۋمەتتىك جەلىنى اشىپ قالساڭ, «جەتىستىككە جەتكىڭ كەلە مە, بىزگە كەل», «تابىستى بولۋدىڭ سىرىن بىزدەن ۇيرەن» دەگەن سەكىلدى تولىپ جاتقان تاقىرىپپەن جاپ-جاس بالالار ءتۇرلى ترەنينگ-سەمينارلارعا شاقىرادى. بۇلار ءوزى ءتىپتى كوبەيىپ بارادى. بىراق ءوزى العاشقى ميلليونىن جاساي الماي تۇرىپ جۇرتقا ميلليون دوللار تابىس تابۋدىڭ سىرىن قالاي ۇيرەتپەك؟ – الەمدەگى ميلليونەرلەردىڭ, ميللياردەرلەردىڭ ترەنەرى سانالاتىن ب.ترەيسيدىڭ ەڭبەكتەرىمەن تولىقتاي تانىسىپ شىقتىم. بىراق, قاجەت جەرىن عانا الدىم. م.نوربەكوۆتىڭ دە كەرەكتى تۇسىن ءتۇرتىپ الدىم. بۇلار وزگەنىڭ ءۇمىتىن ۇرلەي ءجۇرىپ وزدەرى دە ۇلگىگە اينالعاندار. جاڭاعى جاس بالالار دا ۋاقىتپەن بىرگە تاجىريبە جيناقتاي كەلە, سونداي ۇلكەن سوقپاققا ءتۇسۋى مۇمكىن. وسىدان 3-4 جىل بۇرىن مەن دە ترەنينگ وتكىزۋدى قولعا العانمىن. بىراق, توقتادىم. «ءوزىن-ءوزى قالىپتاستىرۋ», «تۇلعا تاربيەلەۋ» دەگەن تاقىرىپتاردا, «وزىڭمەن ءوزىڭ ۇيلەسىمدە بولۋ» دەگەن سەمينارىمدى مۇمكىندىگى شەكتەۋلى جاندارعا ارناپ وتكىزگەن ەدىم. كەيىن جاۋىپ تاستاۋىمنىڭ بىرنەشە سەبەبى بولدى. ەڭ ۇلكەن سەبەبى, ول جەردە الدىڭا سانا-سەزىمى, تانىم-تۇسىنىگى ءارتۇرلى دارەجەدەگى ادامدار كەلىپ وتىرادى. تۇسىنگەنىم, ترەنينگ وتكىزۋ ءۇشىن تەوريالىق ءبىلىمىڭ جەتكىلىكسىز. جان-جاقتى بىلىمگە قوسا, ءومىر مەكتەبىنىڭ قاجەتتى تاجىريبەسىن مولىنان جيناقتاعان بولۋىڭىز شارت. ءسىز وزگەگە ۇسىناتىن ءونىمىڭىزدىڭ جان-جاعىنداعى ۇشكىر, كەدىر-بۇدىر بۇرىشتارىن ابدەن تەگىستەپ, ونىڭ جاندى جەرىنە بارىپ قادالمايتىنداي, تەسىپ, كەسىپ, جارالامايتىنداي جۇپ-جۇمىر ەتىپ قىرناپ-جونىپ ادەمى زاتقا اينالدىرعاننان كەيىن عانا ۇسىنعانىڭىز ءجون. ال, ترەنەردىڭ تىلىمەن سويلەسەڭىز, ونىڭ جان جاراسىنىڭ اۋزىن اشىپ تاستايسىز. جارانىڭ اۋزىن اشىپ, باسقا اڭگىمەسىن جالعاستىرىپ كەتەتىن قازىرگى ترەنەرلەر وسى جاعىنا كوبىرەك ءمان بەرسە ەكەن دەيمىن. – ءسىزدىڭ پسيحولوگيا, پسيحواناليتيكا ماسەلەسىنە ءبىر بۇگىن ەمەس, ەرتە باستان دايىندالىپ, ۇزاق ۋاقىت ىزدەنىستەن كەيىن كەلگەنىڭىزدىڭ كۋاسىمىن. وسىنىڭ ءبارىن جيناقتاپ, قورىتىپ, كىتاپ جازۋ ويىڭىزدا جوق پا؟ – جازبالارىم بار, لىقسىپ كەلگەن ويىمدى ءتۇرتىپ قويۋ ادەتىمە اينالعان. بىراق «مەن ءان دە ايتا الامىن, بي دە بيلەيمىن, مەن سەكىرە دە, جۇگىرە دە الامىن» دەگەن ماقتانشاق الدەكىمنىڭ سيقىنا ەنىپ جۇرمەيىن دەپ, سول جازعاندارىمدى تولىقتىرىپ, كولەمدى دۇنيە جازۋعا ۇيالامىن. سول سەبەپتى كەمەلدى جاسقا كەلىپ, بەلگىلى ءبىر ناتيجە ۇلگىلەرىن كورسەتكەن سوڭ عانا ادەمى ويلارىڭدى كوپ بولماعانىمەن, از تيراجدا شىعارىپ, جاريالاۋعا بولادى دەپ ويلايمىن. – جازۋدى كوپتەن سەرىك ەتەسىز بە؟ – اۋەلى ەرتەگى جازىپ باستادىم. ەرتەگىدەن كەيىن ەستىگەن اڭىزدارىمدى قاعازعا تۇسىرۋگە كىرىستىم. ونىڭ سوڭى مىسال جازۋعا ۇلاستى. ەندى بىردە زەر سالسام, تۇيىندەلگەن تۇجىرىمداردان, ويماقتاي ويلاردان قاناتتى سوزدەر تۋىپتى. قاناتتى سوزدەر قازىر ماقال-ماتەلگە اينالدى. ماقالداپ سويلەمەسەڭ ءسوزىڭنىڭ ءسانى كەلىسپەي تۇراتىنداي كورىنەتىنى بار عوي, اقىرى ءوز جانىمنان ماقالدار تۋا باستاعانىن اڭعاردىم. كەيدە ۆاتساپپەن جازعان ءوز ءسوزىم وزىنە اينالىپ كەلىپ تۇراتىنى بار. سول ءسوزدىڭ قاي كۇنى, قانداي جاعدايدا تۋعانىن جاقسى بىلەمىن. مۇمكىن, بۇل اعىل-تەگىل ءبىلىمنىڭ دارياسى ءابىش اعام سەكىلدى جاقسىمەن ارالاسىپ, اڭگىمەسىن تىڭداعاننىڭ دا اسەرى دە بولار. ءابىش اعانىڭ اقىن وڭايگۇل تۇرجانوۆا تۋرالى: «گيمالاي مەن كارپاتتىڭ ار جاعىندا قانشاما شىڭدار بار, بىراق گيمالاي مەن كارپات جولىن بوگەپ كورسەتپەي تۇر» دەپ ايتقانى ەسىمدە. اقىن قارىنداسىنىڭ تالانتىن مويىنداي تۇرىپ, «سەن بىزدەن بيىكسىڭ, ءبىز بولعان سوڭ شىقپاي قالدىڭ» دەگەندى مەڭزەگەنى. ادەبيەت الىبى كەكىلباەۆتىڭ وسىنداي اڭگىمەلەرىنە قانىق بولعان سوڭ, ءبىزدىڭ «جازدىق» دەپ جەلپىنگەنىمىز ۇيات قانا ەمەس, اۋادا قالقىپ ۇشقان ميلليارد توزاڭنىڭ مولەكۋلاسىن ماعىناسىز قۋالاپ جۇرگەن كۇلكىلى تىرلىك سياقتى كورىنىپ, ءوز-وزىڭنەن تارتىنا باستايسىڭ. – دۇنيەگە وزگەرىستىڭ ءتان ەكەنى بارىنە بەلگىلى جايت قوي, بىراق ايەل الەمىنىڭ كۇرت وزگەرۋى ايەل بوپ جارالعان مەنىڭ ءوزىمدى كەيدە تاڭىرقاتادى. ايەلگە تەڭدىك اپەرگەن رەۆوليۋتسيانىڭ اسەرى دە مۇنشالىقتى قۋاتتى بولماعان سەكىلدى, ەرىن «ءپىرىم» دەپ, وتباسىن «التىن قازىعىم» دەپ تانىعان قازاق ايەلىنىڭ «كلاسسيكالىق» بەينەسىن قايتسە كومەسكى تارتقىزباۋعا بولادى دەگەن سۇراق ءسىزدى مازالاي ما؟ – ابزالىن ايتساق, ءار ايەل ءوز اناسىنا ۇقسايدى. مەن دە ءوز انامدى ايەلدىڭ دانىشپانى دەپ سانايمىن. ءومىرى داۋىس كوتەرىپ سويلەمەگەن, ماقتانىپ اڭگىمە ايتپاعان, كيىمىنىڭ جىلتىر جاعىن ىشىنە قاراتىپ كيگەن ادام. بۇل – ورەسىنىڭ بيىكتىگى. «بەدەۋ ايەلدىڭ جانىندا بالاڭدى ايتىپ ماقتانبا», «كورشىڭ سوقىر بولسا, ءبىر كوزىڭدى قىسىپ ءجۇر» دەگەن قازاقى قۇندىلىقتى قاتاڭ ۇستانعان ادامنىڭ ادەبى. قوعامدا ءبارى جىلتىراپ قىمبات كيىنىپ جۇرگەن جوق, سوعان سايكەس شەشەم دە كيىمىنىڭ جىلتىرىن جاسىرۋعا تىرىسادى. وزىنە كوڭىلى تولسا جەتەدى, بىرەۋگە ماقتانۋ مىندەت ەمەس. وسەك اڭگىمەنى ەستىگەندەي بولسا, قاباعى ءتۇسىپ تومەن قارايدى – جاقتىرماعانى, قۇلاعىنا جاقسى ءسوز تيسە, ەكى يىعىن تىكتەپ, باسىن كوتەرىپ وتىرادى – جانىنا جاققانى. مىنە, ناعىز قازاق ايەلىنىڭ ەموتسياسى وسىنداي بولۋى كەرەك. شەشەمنەن ءومىر بويى ەستىگەنىم: «مال قۇلاعى ساڭىراۋ» «جۇمىرتقا بىتەۋ», «بالىق ساقاۋ». اڭگىمە ايتقىزبايدى, ساپىرىپ سويلەۋگە جول بەرمەيدى. ۇيدە اتامنىڭ جاتقان توسەگى ءالى تۇر. قازىر انامنىڭ جاسى 75-تە, ءالى كۇنگە دەيىن قايىناتاسىنىڭ توسەگىنە تىزە بۇگىپ وتىرعان ەمەس. اتامنىڭ كيىمى, توسەگى, زاتتارى قالعان بولمەگە سالەم جاساپ كىرەدى. بۇل جەردە ەشقانداي پافوس جوق, ءتىرى پەندە كورىپ تۇرعان جوق, ۇيدە جالعىز ءوزى بولسا دا, داعدىعا اينالعان سول قۇرمەتىنەن جاڭىلماعان. وزىنە ۇياتى, وبالى تيەتىن نارسەنى وڭاشادا دا جاساۋعا ءداتى بارماۋ قازاق ايەلىنەن باسقانىڭ قولىنان كەلمەيتىن قۇدىرەت پە دەيمىن. اكەمە قالاي تابىناتىنىن كورسەڭىز! ءالى كۇنگە دەيىن تاڭ بوزىنان تۇرىپ اكەمە قاراقۇمىق جارماسىن ازىرلەيدى, ءتاتتى سالاتى ءبىر بولەك, اششى سالاتى ءبىر بولەك, تاڭعى اسىن ازىرلەيدى. اكەم داستارقان باسىنا وتىرماي تۇرىپ, ءبىر ءتۇيىرىن اۋزىنا سالىپ ءدامىن دە تاتپايدى. بىلاي قاراساڭ, جىگىت ەمەس, وزىنە دايىنداعان بوتقاسىن دا بەرە سالسا بولادى عوي, جوق, شالىن حان سياقتى كۇتەدى. – بالالارى پاتشا بولدى ما؟ – شۇكىر, ءبارىمىز دە اتا-انامىزدىڭ ءجۇزى جەرگە قارامايتىنداي بولىپ جەتىلدىك. ءبىزدىڭ اۋىلدا شالى الدەقاشان و دۇنيەلىك بولعان 80-گە كەلگەن اجە توسەكتەن تۇرا الماي جاتسا دا, وزىنەن ەكى جاس ۇلكەن قۇربىسى كەلسە, سالەم سالىپ يشاراسىن جاساپ جاتادى. كەيدە «سەندەلگەن ايەلدىڭ سۇيكىمسىز ساياساتى» دەگەن ءسوزدى ايتۋعا ءماجبۇر بولامىن. قازىرگى ءبىز سياقتى ءموبيلدى كەلىنشەكتەردىڭ ءومىر ءسۇرۋ سالتى باسقا. وسىعان بايلانىستى ايەلدەردىڭ تۇرمىسى مەن مىندەتىن دۇرىس ۇيلەستىرەتىن يدەولوگيالىق جاقسى ءبىر كەڭەس قۇرىلسا دەگەن تىلەگىم بار. ايەل ءوزى نازىك بولسا دا, ىشكى-سىرتقى تاسقىننان بالاسىنان بۇرىن ءوزى قورعانا الاتىن, جاقسى-جاماندى ەكشەي الاتىن ىشكى تەگەرشىگى مىقتى ادامعا اينالسا دەيمىن. – اڭگىمەڭىزگە راحمەت.   اڭگىمەلەسكەن ايگۇل احانبايقىزى, «ەگەمەن قازاقستان»