«لەستەر» كلاۋديو رانەريدى قىزمەتىنەن بوساتتى

وتكەن ماۋسىمنىڭ قورىتىندىسى بويىنشا انگليا پرەمەر-ليگاسىندا چەمپيون اتانعان «لەستەر» كومانداسى وسى ماۋسىمداعى ءساتسىز ويىنى ءۇشىن باس باپكەرى كلاۋديو رانەريدى قىزمەتىنەن بوساتتى. بۇل تۋرالى eurosport.ru حابارلادى. «لەستەردىڭ» ۆيتسە-پرەزيدەنتى اياۆاتت شريۆاددحاناپرابحا مۇنداي قادام كوماندانىڭ اپل-دە قالۋىنا سەپتىگىن تيگىزەتىنىن مالىمدەدى. «كلۋبقا كەلگەن جەتى جىل ىشىندەگى ەڭ قيىن شەشىمىم بولدى. كلاۋديونىڭ ورنى ءبىز ءۇشىن ەرەكشە. ونىڭ مىنەزى, بىلىكتىلىگى, وزىندىك يدەياسى بىزگە وراسان زور پايداسىن تيگىزدى. وعان دەگەن العىسىمىز شەكسىز. بىراق ءبىز العا قاراۋىمىز كەرەك. ءبىرىنشى كەزەكتە «لەستەردىڭ» بولاشاعىن ويلاعانىمىز ءجون», – دەدى اياۆاتت شريۆاددحاناپرابحا. «ارينە, شىندىققا كوز جۇما قاراماۋىمىز كەرەك. ۇجىمنىڭ بىلتىرعى ەرلىگى بيىل دا قايتالانادى دەپ كۇتكەن جوقپىز. ماۋسىم باسىندا ادەتتەگىندەي پرەمەر-ليگادان شەت قالماۋدى باستى ماقسات ەتتىك. بىراق قازىرگى جاعدايىمىز تىپتەن قيىنداپ كەتتى. سوندىقتان كومانداعا وزگەرىس قاجەت دەپ شەشتىك. قالعان 13 ويىندا بارىنشا ساق ويناپ, العا قويعان جوسپارىمىزعا جەتەمىز دەپ ۇمىتتەنەمىن», – دەدى ۆيتسە-پرەزيدەنت. قازىرگى ۋاقىتتا «لەستەر» 25 ماتچتان كەيىن 21 ۇپايمەن 17-ورىندا كەلەدى. ال پرەمەر-ليگادان شىعىپ قالار ورىننان نەبارى ءبىر-اق ۇپاي الدا كەلەدى. سوڭعى 9 ويىندا تەك ءبىر عانا جەڭىسكە جەتتى. وتكەن جىلى كلاۋديو رانەريدىڭ كومانداسى ءوز تاريحىندا العاش رەت چەمپيون اتاندى. ال يتاليان مامانى 2016 جىلدىڭ قورىتىندىسىندا فيفا نۇسقاسى بويىنشا ۇزدىك باپكەر اتاندى. ايتا كەتەيىك, «لەستەردىڭ» جاڭا باپكەرى بولىپ روبەرتو مانچيني تاعايىندالۋى مۇمكىن.