جاناتتىڭ كەلەسى قارسىلاسى كىم بولۋى مۇمكىن؟

ورتالىق كوممۋنيكاتسيالار قىزمەتىندە جاقىندا عانا بوكستان الەم چەمپيونى اتاعىن جەڭىپ العان جانات جاقيانوۆپەن كەزدەسۋ ءوتتى. ول 11 اقپاندا اقش-تىڭ تولەدو قالاسىندا امەريكالىق روۋشي ۋوررەنمەن كەزدەسىپ, جەڭىل سالماقتا WBA (Super) جانە IBO تۇجىرىمى بويىنشا چەمپيون اتاعىن جەڭىپ العان ەدى. وسىعان بايلانىستى بوكسشى ءباسپاسوز ءماسليحاتىن وتكىزىپ, اقش-تا وتكەن جەكپە-جەك تۋرالى اڭگىمەلەپ بەردى. كەزدەسۋدە جاقيانوۆ روۋشي ۋوررەنمەن ايقاستىڭ وڭاي بولماعانىن, جەكپە-جەكتىڭ بارلىق راۋندتارىندا جاتتىقتىرۋشىسى ريككي حاتتوننىڭ اقىل-كەڭەستەرىن تىڭداپ, قارسىلاسىنا ەشقانداي مۇمكىندىكتى بەرمەۋگە تىرىسقانىن ايتتى. «مەنىڭ قارسىلاسىم وسال بولعان جوق. ول كەزىندە WBA (Super) جانە IBO تۇجىرىمى بويىنشا الەم چەمپيونى اتاعىن يەلەنگەن. وسى كەزدەسۋدە ۋوررەننىڭ اتاعىن جەڭىپ الدىم. ءبىرىنشى راۋندتا ۋوررەننىڭ سوققىلارىنىڭ جويقىن بولاتىنىن بىلگەنمىن. رينگكە سوعان دايىندالىپ شىقتىم. جەكپە-جەكتىڭ باسىندا ەكى رەت نوكداۋن الىپ قالدىم. بىراق, كەزدەسۋدى ءوزىمنىڭ قولىما الىپ, سوڭىنا دەيىن جەتكىزدىم. ەل نامىسى سىنعا ءتۇسىپ جاتقاندا جەڭىلۋ دەگەندى بىلمەيمىن, بىلگىم دە كەلمەيدى. سودان بولار, جەكپە-جەكتە ارقام قىزىپ, ۋوررەندى قۋالاپ ءجۇرىپ ساباعىم كەلدى. ول بەسىنشى بۇرىش ىزدەپ كەتكەندە بوساڭسىماي, ىشىمنەن شارۋانى سول جەردە شەشۋ كەرەك دەپ شەشتىم. شارشى الاڭدا ايقىن باسىمدىقپەن جەڭگەنىمدى سەزدىم. قازىلار القاسى دا ماعان باسىم داۋىسپەن باعا بەردى», – دەدى ول. بريفينگتە جاقيانوۆ وسى ايقاسقا WBA جانە IBO تۇجىرىمى بويىنشا ءبىرىنشى ورتا سالماقتاعى الەم چەمپيونى ريككي حاتتوننىڭ جەتەكشىلىگىمەن دايىندالعانىن, جاتتىعۋلاردىڭ ءبارى ۇلىبريتانيادا وتكەنىن ايتتى. «ريككي حاتتون تاماشا جاتتىقتىرۋشى. مەن ونىڭ كومانداسىمەن بىرنەشە جىلدان بەرى جۇمىس ىستەپ كەلەمىن. ول 2007 جىلى كاسىپقوي بوكسقا كەلگەنىمدە مەنى بايقاپ, وزىنە شاقىردى. سودان بەرى وسى كەزگە دەيىن 28 جەكپە-جەك وتكىزىپ, 27 رەت جەڭىسكە جەتتىم. ءبىزدىڭ جاتتىعۋلار ۇلىبريتانيادا وتەدى. وندا ءبارى جاقسى ۇيىمداستىرىلعان. مىسالى, سوڭعى جەكپە-جەككە 10 اپتا دايىندالدىم», – دەدى جانات جاقيانوۆ. سونىمەن بىرگە, ول شەتەلدەن شاقىرتۋلار كەلىپ جاتسا ەشقايدا كەتپەيتىنىن, كەرىسىنشە, وزىنە قولداۋ كورسەتىپ, دەمەۋشىلىك جاساپ جاتقان سولتۇستىك قازاقستان وبلىسىنىڭ اكىمدىگى مەن وبلىستىق سپورت باسقارماسىنا العىسىن ءبىلدىردى. «مەن ەشقايدا كەتپەيمىن. كەتكىم دە كەلمەيدى. كەتپەيمىن دە. مەنىڭ وتانىم – قازاقستان. قازاق ەلىنىڭ نامىسىن قاي جەردە بولسا دا جىرتىپ, اسپان ءتۇستى تۋىمىزدى بيىكتەن جەلبىرەتىپ جۇرەمىن. قازىر پەتروپاۆل قالاسىندا وبلىستىق بالالار جانە جاسوسپىرىمدەرگە ارنالعان مەكتەپ-ينتەرناتتا جاتتىقتىرۋشى بولىپ قىزمەت ەتەمىن. بيىل ءبىزدىڭ مەكتەپتىڭ ءۇش تاربيەلەنۋشىسى سپورت شەبەرى اتاندى. الداعى كەزدە دە سپورت ورداسىنان تالاي جاس تالانتتى بوكسشىلاردىڭ تۇلەپ شىعاتىنىنا سەنىمدىمىن. قازىر وبلىستا بوكسقا بارعىسى كەلىپ جۇرگەن بالالار كوپ. مۇنىڭ ءبارى وبلىس اكىمى مەن سپورت باسقارماسىنىڭ سپورت مەكتەپتەرىنە كورسەتىپ جاتقان قولداۋىنىڭ ارقاسى», – دەيدى بوكسشى. كەزدەسۋ سوڭىندا جاقيانوۆ كەلەسى قارسىلاسى دجەيمس ماكدونالدستىڭ بولۋى مۇمكىن ەكەنىن ايتتى. داستان كەنجالين, «ەگەمەن قازاقستان»