"دامۋدان" ءبىر جىلدا 10 مىڭ كاسىپكەر نەسيە العان

"دامۋ" قورىنىڭ باعدارلامالارى بويىنشا قارجىلىق قولداۋ العان جوبالاردىڭ جالپى قۇنى 2016 جىلى 650 ملرد تەڭگە بولدى, دەپ حابارلايدى قوردىڭ ءباسپاسوز قىزمەتى. جەڭىلدەتىلگەن قارجىلاندىرۋ باعدارلاماسى بويىنشا ەكىنشى دەڭگەيلى بانكتەر ارقىلى جالپى قۇنى 336 ملرد تەڭگە بولاتىن 7053 جوبا قولداۋ تاپتى. 2016 جىلى نەسيەنىڭ پايىزدىق ۇستەمەسىن سۋبسيديالاۋ بويىنشا 2029 جوباعا جالپى قۇنى 282 ملرد تەڭگە قارجى ءبولىندى. ال جىلجىمايتىن م ۇلىك جەتپەگەن جاعدايدا نەسيەنى كەپىلدەندىرۋ بويىنشا 1104 جوباعا 32 ملرد تەڭگە كومەك بەرىلدى. "دامۋ" قورىنىڭ جاڭا باعدارلامالارىنىڭ اراسىندا ەڭ كوپ تانىمالدىققا يە بولعان «دامۋ ميكرو» شاعىن نەسيەلەندىرۋ جوباسى. 2016 جىلى وسى باعدارلاما ارقىلى 333 كاسىپكەر 502,3 ملن تەڭگەگە نەسيە الدى. بۇلار نەگىزىنەن كوتەرمە جانە بولشەك ساۋدا, اۆتوكولىك پەن موتوتسيكلدەردى جوندەۋ سەكىلدى 286 جوبا. «دامۋ بليتس» تەحنولوگياسى بويىنشا 2016 جىلى 79 كاسىپكەر جالپى قۇنى 1 ملرد 83 ملن تەڭگەنىڭ نەسيەسىن راسىمدەگەن. "دامۋ وپتيما" باعدارلاماسى بويىنشا 28 جوبا جالپى قۇنى 567 ملن تەڭگە الدى. ال تاعى 12 جوبا بىلتىر "دامۋ" قورى باعدارلاماسىنىڭ كومەگىمەن فرانشيزا اشۋعا مۇمكىندىك الدى. ولاردىڭ العان نەسيە سوماسى 516 ملن تەڭگە.